पालघरच्या तहसीलदाराची असंवेदनशील कृत्य
मुंबई: परराज्यांतील मजुरांसाठी पालघर स्थानकातून रेल्वेगाड्या सोडण्यात येत आहेत. त्यासाठी आर्यन स्कूलच्या मैदानात मजुरांना टोकन देण्यात येत होते. टोकन घेण्यासाठी गेलेल्या एका मजुराला पालघरच्या तहसीलदारांनी शिवीगाळ करून लाथाबुक्क्यांनी मारहाण केल्याची घटना घडली आहे. हा व्हिडिओ सोशल मीडियावर व्हायरल झाला आहे. त्यानंतर राज्याच्या महसूल मंत्र्यांनी या घटनेच्या चौकशीचे आदेश दिले आहेत.
लॉकडाउनमुळं परराज्यांतील अनेक मजूर राज्यात अडकले आहेत. बेरोजगार झाल्यानं आर्थिक चणचण जाणवत आहे. उपासमारीची वेळ आल्याने अनेक मजूर आपापल्या गावी जात आहेत. त्यांच्यासाठी विविध ठिकाणांहून रेल्वेगाड्या सोडण्यात येत आहेत. मजुरांना त्यांच्या राज्यात सोडण्यासाठी २० मे रोजी पालघर रेल्वे स्थानकातून उत्तर प्रदेशसाठी ट्रेन सोडण्यात आल्या. आपल्या राज्यात परतण्यासाठी हजारोंच्या संख्येने मजूर पालघर येथील आर्यन स्कूलच्या मैदानात जमले होते. या ठिकाणी टोकन दिले जात होते. अनेक जण टोकन कधी मिळेल याची वाट पाहत होते. पालघरचे तहसीलदार सुनील शिंदे हे मजुरांना टोकन, खाद्यपदार्थ आणि इतर वस्तूंचे वाटप करत होते. त्याचवेळी अचानक शिंदे यांनी गर्दीतील एका मजुराला लाथाबुक्क्यांनी मारहाण करण्यास सुरुवात केली. ही घटना गर्दीमधील अनेक मजुरांनी आपल्या मोबाइलमध्ये चित्रीत केली. हा व्हिडिओ सोशल मीडियावर व्हायरल झाला.
या घटनेचा व्हिडिओ व्हायरल झाल्यानंतर सोशल मीडियावर अनेक प्रतिक्रिया व्यक्त होत आहेत. या घटनेची महसूल मंत्री बाळासाहेब थोरात यांनी दखल घेतली असून, गुरुवारी चौकशीचे आदेश दिले आहेत. जिल्ह्यातील संबंधित अधिकाऱ्यांना अहवाल सादर करण्यास सांगितले आहे, अशी माहिती थोरात यांनी दिली.
आमचे चॅनल subscribe करा
