मुंबई: बँक घोटाळ्याच्या प्रकरणात चौकशीसाठी स्वत:हून सक्तवसुली संचालनालयाच्या [ईडी] कार्यालयात जाण्याचा निर्णय राष्ट्रवादी काँग्रेसचे अध्यक्ष शरद पवार यांनी तूर्त रद्द केला आहे. मुंबई व महाराष्ट्रातील कायदा-सुव्यवस्थेची स्थिती बिघडू नये म्हणून हा निर्णय घेतला आहे, असं खुद्द पवार यांनी आज स्पष्ट केलं.
महाराष्ट्र राज्य सहकारी बँकेतील कर्जवाटप घोटाळ्याच्या प्रकरणात ईडीनं शरद पवारांसह ७० नेत्यांवर गुन्हा दाखल केला आहे. बँकेशी काहीही संबंध नसताना गुन्हा दाखल झाल्यानं पवार यांनी स्वत: ईडीच्या कार्यालयात जाऊन आपली भूमिका मांडण्याचा निर्णय घेतला होता. त्यांच्या या भूमिकेनंतर राष्ट्रवादी काँग्रेसनंही संघर्षाचा पवित्रा घेतला होता. राज्यभरात कार्यकर्ते रस्त्यावर उतरले होते. त्यामुळं राजकीय घडामोडींना वेग आला होता. कायदा-सुव्यवस्थेचा प्रश्न निर्माण होण्याची शक्यता होती.
याचा अंदाज आल्यानंतर मुंबईचे पोलीस आयुक्त संजय बर्वे व सह पोलीस आयुक्त (कायदा-सुव्यवस्था) विनय चौबे यांनी स्वत: पवारांची भेट घेऊन ईडीच्या कार्यालयात न जाण्याची विनंती केली. त्यांची विनंती मान्य करून पवारांनी तूर्त आपला निर्णय मागे घेतला. पोलीस आयुक्तांच्या भेटीनंतर पवार यांनी स्वत: मीडियाला सामोरं जात निर्णय जाहीर केला.
ते म्हणाले, ‘पोलीस आयुक्तांनी मला महाराष्ट्रातील सध्याच्या परिस्थितीची माहिती दिली. आपण ईडीच्या कार्यालयात जाण्यावर ठाम राहिल्यास परिस्थिती चिघळू शकते, असं त्यांनी सांगितलं. मी स्वत: अनेकदा गृहखात्याची जबाबदारी सांभाळली आहे. मला या सगळ्या गोष्टीची जाणीव आहे. माझ्यामुळं कायदा-सुव्यवस्थेचा प्रश्न निर्माण होऊ नये आणि सामान्य माणसाला त्रास होऊ नये म्हणून मी ईडीच्या कार्यालयात जाण्याचा निर्णय तहकूब केला आहे.’
शरद पवार यांनी यावेळी राज्य व केंद्रातील सत्ताधारी भाजप सरकारवरही तोफ डागली. ‘बँकेशी कसलाही संबंध नसताना माझ्यावर गुन्हा दाखल झाला. विरोधी पक्षाच्या नेत्यांची प्रतिमा जनमानसामध्ये मलिन करण्याचा हेतू त्यमागे होता. त्यामुळं लोकांमध्ये संताप होता. महाराष्ट्राच्या शहराशहरात त्याचे पडसाद उमटत होते. महाराष्ट्र अन्याय, अत्याचार सहन करत नाही हेच लोकांनी या निमित्तानं दाखवून दिलं,’ असा टोला पवारांनी लगावला.
ईडी’ने शरद पवार यांच्यावर गुन्हा दाखल केल्यानंतर काँग्रेससह विरोधी पक्षाच्या अनेक नेत्यांनी पवारांना ठाम पाठिंबा दर्शवला होता. काँग्रेस नेते राहुल गांधी, माजी पंतप्रधान मनमोहन सिंग यांनी फोन करून पवारांशी चर्चा केली होती. तर, शिवसेनेचे नेते संजय राऊत यांनीही काहीही संबंध नसताना पवारांवर गुन्हा दाखल करणं चूक आहे, असं मत मांडलं होतं. या सर्वांचे पवारांनी यावेळी आभार मानले.
आमचे चॅनल subscribe करा
