मुंबई: मुख्यमंत्री देवेंद्र फडणवीस यांच्या पत्नी अमृता फडणवीस यांनी पंतप्रधान नरेंद्र मोदी यांना वाढदिवसानिमित्त शुभेच्छा दिल्या आहेत. यावेळी त्यांनी मोदींचा उल्लेख ”फादर ऑफ कंट्री’असा केला आहे. त्यामुळे आश्चर्य व्यक्त करण्यात येत आहे. पंतप्रधान नरेंद्र मोदी यांचा आज ६९ वा वाढदिवस आहे. त्यानिमित्त त्यांना भाजपसह विविध पक्षाच्या नेत्यांनी शुभेच्छा दिल्या आहेत.
मोदींच्या वाढदिवसानिमित्त देशभरात विविध कार्यक्रमांचं आयोजनही करण्यात आलं आहे. मुख्यमंत्री देवेंद्र फडणवीस यांच्या पत्नी अमृता फडणवीस यांनीही मोदींना शुभेच्छा देणारं एक ट्विट केलं आहे. या ट्विटसोबत एक व्हिडिओही पोस्ट करण्यात आलं आहे. ‘समाजाच्या भल्यासाठी सातत्याने प्रेरणा देणारे ‘फादर ऑफ कंट्री’ नरेंद्र मोदी यांना वाढदिवसाच्या शुभेच्छा,’ असं ट्विट अमृता यांनी केलं आहे. महात्मा गांधी यांना संपूर्ण देश ‘फादर ऑफ नेशन्स’ संबोधत असताना अमृता यांनी मोदींना थेट ‘फादर ऑफ कंट्री’ संबोधल्याने आश्चर्य व्यक्त केलं जात आहे. अमृता यांच्या या ट्विटवर अनेक नेटकऱ्यांनी प्रतिक्रिया व्यक्त करत तीव्र नाराजीही व्यक्त केली आहे.
या ट्विटसोबत ‘मिट्टी के सितारे’ या रिअलिटी शोच्या ‘ओ रे मनवा तू तो बावरा है तू ही जाने तू क्या सोचता है’ या गाण्याचा एक व्हिडिओही पोस्ट करण्यात आला आहे. या व्हिडिओच्या माध्यमातूनही मोदींना वाढदिवसाच्या शुभेच्छा देण्यात आल्या आहेत.
आमचे चॅनल subscribe करा
