मुंबई, दि. 4 : शेगावच्या श्री संत गजानन महाराज संस्थानाचे विश्वस्त, व्यवस्थापक कर्मयोगी शिवशंकरभाऊ पाटील यांच्या निधनाबद्दल मुख्यमंत्री उद्धव ठाकरे यांनी शोक व्यक्त केला आहे.
श्रद्धा आणि कर्मयोगाचे मूर्तीमंत रुप काळाने हिरावून नेले आहे, अशा शब्दांत मुख्यमंत्र्यांनी श्रद्धांजलीही अर्पण केली आहे.
मुख्यमंत्री शोक संदेशात म्हणतात, श्री. संत गजानन महाराज यांच्या ज्ञान, भक्ती आणि कर्माच्या त्रिवेणी शिकवणीवर नितांत श्रद्धा ठेवून शिवशंकरभाऊ जगले. त्यांनी आपल्या कर्मयोगातून शिक्षण आणि आरोग्य क्षेत्रातही संस्थांची बांधणी केली. त्याद्वारे गोरगरिब आणि वंचिताची सेवाही केली. त्यांच्या निस्वार्थतेचे दाखले हे दंतकथा वाटतील अशा पण सत्य आहेत.
श्री. गजानन महाराज संस्थानाची कारभाराचे नियोजन, व्यवस्थापन हा जगभरातील तज्ज्ञांसाठी अभ्यासाचा विषय राहीला आहे. त्यांच्या निधनाने सेवा कार्यासाठी आयुष्य वेचलेला कर्मयोगी काळाने हिरावून नेला आहे.
लाखो भाविकांचे श्रद्धास्थान असलेल्या श्रीसंत गजानन महाराज संस्थानाचे व्यवस्थापकीय विशवस्त कर्मयोगी शिवशंकरभाऊ पाटील यांची प्रकृती मागील काही दिवसांपासून चिंताजनक होती.त्यांच्यावर त्यांच्या निवासस्थानीच उपचार सुरु होते. मला कुठल्याही रुग्णालयात उपचारासाठी नेऊ नका असे त्यांनी सांगितले होते मात्र आज बुधवारी त्यांची प्राणज्योत मावळली.
आमचे चॅनल subscribe करा
