नागपूर,ता. २८ डिसेंबर: फेसबूवर ओळख झाली,ओळखीचे रुपांतर मैत्री व प्रेमात झाले,दोन मुलांची आई असल्याचे प्रियकराकडून लपवून ठेवले मात्र अखेर बिंग फूटले,यानंतर नात्यात निर्माण झालेला दुरावा,भांडणे शेवटी प्रेयसीचा दूर्देवी अंत,एखाद्या हिंदी चित्रपटात शोभावी अशी शोकांतिका मात्र महाराष्ट्राच्या उपराजधानीत शनिवारी घडली.
सदर हल्दीरामजवळ महिलेला जाळून ठार मारण्याच्या प्रकरणात रविवारी नवीन वळण आले. प्रियकराने जाळून प्रेयसीचा खून केल्याचे प्राथमिक तपासात समोर आले. याप्रकरणी सदर पोलिसांनी खून व पुरावा नष्ट केल्याचा गुन्हा दाखल करून प्रियकराला अटक केली आहे.
शादाब आफताब आलम (वय ३२, रा. आकार बिल्डर, बैरामजी टाउन) असे अटकेतील प्रियकराचे नाव आहे. तो अभियंता असून, गुगल कंपनीसाठी काम करतो, अशी माहिती पोलिसांनी दिली. शबाना अब्दुल जावेद (वय ४० रा. महेंद्रनगर) असे मृत महिलेचे नाव आहे.
शादाब हा मूळ पाटण्यातील रहिवासी आहे. २०१७ मध्ये शादाबची फेसबुकच्या माध्यमातून शबानासोबत ओळख झाली. यावेळी शबानाने फेसबुकवर ‘बनावट आयडी’ तयार केला होता. दोघांमध्ये संवाद वाढला. ते फुटाळा तलाव येथे भेटले. त्यानंतर दोघांमध्ये प्रेमसंबंध निर्माण झाले. विवाहित असून दोन अपत्ये असल्याची माहिती तिने शादाबला दिली नाही.
जानेवारी महिन्यात शबाना ही विवाहित असल्याचे तसेच दोन मुलांची आई असल्याचे शादाबला कळाले. त्यानंतर त्याने शबानासोबत संपर्क तोडला. परंतु, शबाना त्याला लग्नाची गळ घालत होती. शुक्रवारी सायंकाळी शबाना ही शादाब याला भेटायला त्याच्या घरी गेली. सदरमधील हल्दीरामसमोर त्यावेळी दोघांमध्ये वाद झाला. शादाबने तिच्या अंगावर पेट्रोल टाकून तिला जाळले. त्यानंतर तिला घेऊन खासगी हॉस्पिटलमध्ये गेला. नातेवाइकांना माहिती देऊन शादाब पसार झाला.
दरम्यान, हॉस्पिटलमध्ये उपचारादरम्यान शनिवारी सकाळी शबानाचा मृत्यू झाला. याप्रकरणी सदर पोलिसांनी गुन्हा दाखल करून शादाबला अटक केली. सदर पोलिसांनी रविवारी त्याला न्यायालयात हजर केले. न्यायालयाने त्याची १ जानेवारीपर्यंत पोलिस कोठडीत रवानगी केली.
मृत्यूच्या दारातही प्रियकराचाच विचार!पोलीसांना दिले खोटे बयाण
खासगी रुगण्यालयात उपचारादरम्यान पोलिसांनी शबानाचे मृत्यूपूर्वी बयाण नोंदविले. एका युवकाने जाळल्याचे तिने बयाणात सांगितले. भर चौकात ही घटना घडल्याने पोलिसांनी सदरमधील संपूर्ण सीसीटीव्ही फुटेजची पाहणी केली. नागरिकांकडूनही घटनेची माहिती घेतली. मात्र, अशाप्रकारची घटना घडलीच नसल्याचे स्पष्ट झाले.यावरुन मृत्यूच्या दारात असताना देखील शबानाला प्रियकराचाच विचार होता,हे लक्ष्ात येतं.त्याला शिक्ष्ा होऊ नये यासाठी तिने पोलीसांना खोटे बयाण दिले.
मात्र अशी कोणतीही घटना सार्वजनिक ठिकाणी घडली नसल्याने स्पष्ट झाल्यानंतर पोलिसांनी शबानाचे मोबाइल कॉल रेकॉर्ड तपासले. त्यावेळी शादाबचे नाव समोर आले. पोलिसांनी त्याला अटक केली. शबानाने स्वत: जाळून आत्महत्या केल्याचे शादाबने पोलिसांना सांगितले. आपण तिला वाचविण्याचा प्रयत्न केला, असेही सांगितले. शबानाने आत्महत्या केली असती तर शादाबने पोलिसांना माहिती दिली असती. शिवाय, तिला वाचविताना शादाबही होरपळा असता. मात्र, त्याला कोणतीही इजा झाल्याचे दिसत नाही. त्यामुळे पोलिसांचा संशय बळावला. पोलिस कोठडीदरम्यान शादाबची चौकशी करण्यात येईल. त्यानंतर या घटनेमागील आणखी काही तथ्ये समोर येतील, असे पोलिसांनी सांगितले.
आमचे चॅनल subscribe करा
