हिवाळी अधिवेशन मुंबईत!

करोनाच्या पार्श्वभूमीवर चर्चेला ऊत

नागपूर,ता. ७ नोव्हेंबर: जागतिक महामारी कोविड-१९ चा उद्रगे आद्याप जगभराज आटोक्यात आला नसताना महाराष्ट्राच्या उपराजधानीत नागपूरात येत्या ७ डिसेंबरपासून हिवाळी अधिवशेनाच्या तयारीचा आढावा घेणे सुरु आहे.करोना परत येण्याचे संकट आणि तयारीसाठी असणारा केवळ एक महिना लक्षात घेता राज्य विधिमंडळाचे हिवाळी अधिवेशन या पार्श्वभूमीवर मुंबईत होण्याची दाट शक्यता आहे.हिवाळी एेवजी ‘अर्थसंकल्पीय’ अधिवेशन घेऊन नागपूर कराराचे पालन व्हावे, यासाठी प्रयत्न होणार असल्याचे संकेत मिळत आहे.

हिवाळी अधिवेशनाच्या तयारीबाबत प्रधान सचिव राजेंद्र भागवत आज, शुक्रवारी आढावा घेणार आहेत. तथापि, प्रशासन सज्ज असले तरी, विविध कारणांमुळे अनेक अडचणी आहेत. एकीकडे करोनाचे संकट तर, दुसरीकडे दिवाळी यातून अधिवेशनाबाबत प्रश्न उपस्थित करण्यात येत आहे.

काँग्रेसचे शहराध्यक्ष विकास ठाकरे यांनी हिवाळी अधिवेशन मुंबईत घेऊन हा निधी नागपूर-विदर्भाला करोना संबंधी अद्यावत उपचारावर तसेच सोयी-सुविधांवर खर्च करावा,अशी मागणी एक महिन्यापूर्वीच केली. त्यांच्या या मागणीला विविध पक्ष व संघटनांनी पाठिंबा दिला. अधिवेशनावर होणारे कोट्यवधी रुपये आरोग्य यंत्रणेसाठी मिळावेत, अशी मागणी रेटण्यात आली. यात भाजपने अलिप्ततेची भूमिका घेतली. त्यांच्या पक्षाचे कृष्णा खोपडे यांनी मात्र नागपुरात अधिवेशन घेण्यास विरोध केला. दरम्यान, विधानसभा अध्यक्ष नाना पटोले यांनी नागपुरात अधिवेशन घेण्याची आग्रही भूमिका मांडली. नागपूर करारानुसार एक अधिवेशन व्हावे, या त्यांच्या भूमिकेमुळे सरकार व विरोधी पक्षातील अनेक नेत्यांना भूमिका मांडता आली नाही.

हिवाळी अधिवेशनासाठी प्रशासनाने तयारी सुरू केली. विधानभवनसह अन्य कार्यालये, निवास व्यवस्थेची डागडुजी करण्यापासून मंत्री, अन्य पदाधिकारी व अधिकाऱ्यांना आवश्यक सर्व सोयी उपलब्ध करून देण्याचे नियोजन करण्यात आले.

सार्वजनिक बांधकाम विभागाने सुमारे दीडशे कामांच्या निविदा निश्चित केल्या तरी कार्यादेशासाठी सरकारने मान्यता दिलेली नाही. विधिमंडळ सचिवालयानेही ऑनलाइन प्रश्न व लक्षवेधी स्वीकारण्याची तयारी केली. अधिवेशनाच्या तयारीचा आज घेण्यात येणारा आढावा विधान परिषदेचे सभापती व अध्यक्षांना सादर करण्यात येईल. याआधारे कामकाज सल्लागार समितीची बैठक होईल. उपमुख्यमंत्री अजित पवार व विधानसभेतील विरोधी पक्षनेते देवेंद्र फडणवीस करोनाबाधित झाल्याने कामकाज सल्लागार समितीची बैठक झाली नाही. उभय नेत्यांना रुग्णालयातून सुट्टी झाली असून बैठकीत ऑनलाइन सहभागी होऊ शकतात.

पुढच्या आठवड्यात सल्लागार समितीच्या बैठकीत अधिवेशन मुंबईत घेण्यावर शिक्कामोर्तब होण्याचे संकेत आहेत.