नागपूर,ता.१७ जुलै २०२२: भारतीय स्वातंत्र्याच्या अमृतमहोत्सवानिमित्त विष्णूजी की रसोई येथे या विश्वविक्रमी उपक्रमाचे आयोजन करण्यात आले होते. ७५ प्रकारच्या तांदळापासून भाताचे ७५ प्रकार मनोहर यांनी तयार केले आणि उपस्थित खवय्ये आणि रसिकांना त्यांचा आस्वाद घेण्याची संधी दिली. आंबेमोहोर, पार्वती सूत, लुचई, एचएमटी, जय श्रीराम, बासमती, हातसडीचा या नेहमीच्या तर इतर अनेक प्रकारच्या तांदळांचा उपयोग करून भात तयार करण्यात आला. सलग पाच तास स्वयंपाक करून मनोहर यांनी भाताचे ७५ प्रकार शिजविले. तब्बल ३७५ किलोचा भात त्यांनी या उपक्रमादरम्यान शिजविला. हा तयार झालेला भात सर्व खवय्यांना वितरीत करण्यात आला. यातील काही भाग दिव्यांगांच्या शाळा, अनाथाश्रम, वृद्धाश्रम, अंधविद्यालय इत्यादी ठिकाणीही देण्यात आला.
७५ प्रकारच्या तांदळाचे वाण गोळा करण्याच्या कामात लातूरचे दिनेश मित्तल यांचे मोलाचे सहकार्य लाभले. या ७५ प्रकारच्या तांदळांची नावे, वाण, प्रदेश आणि यांपासून कुठला पदार्थ तयार होतो आहे, यांची विस्तृत माहिती भात तयार होत असतानाच देण्यात येत होती. हळद, तिखट, मीठ, साखर, हिंग, जिरे, मोहरी, आले, लसूण, लिंब, कढीपत्ता, टोमॅटो प्युरी, चिरलेला कांदा, सोया सॉस, चिली सॉस, बटाट्याचा चिवटा, स्वीट कॉर्न, कोकम, बटाटे, मेथी, खोबरे, पनीर, दही, दाण्याचा कूट, आले, लसूण पेस्ट आदी या स्वयंपाकासाठी वापरण्यात आले. उपस्थितांसाठी संगीत मैफलीचेही आयोजन करण्यात होते.
विष्णू मनोहर यांनी तयार केलेला एकएक प्रकार तोंडाला पाणी आणणारा होता. यावेळी तयार केलेल्या भातांमध्ये पिनट राइस, तोंडली भात, पनीर याखनी पुलाव, स्प्राउट राइस, हरियाली पुलाव, बांबूशूट राइस, भरडा भात, कैरी भात, मेयॉनीज राइस, अद्रकी चावल असे अनेक प्रकार यावेळी तयार करण्यात आले.
आमचे चॅनल subscribe करा
