नागपूर: मुंबई हायकोर्टाच्या नागपूर खंडपीठातील वरिष्ठ न्यायमूर्ती झेड. ए. हक हे नागपुरात परतले आहेत. २० एप्रिलपासून ते कार्यभार सांभाळणार आहेत. यापूर्वी हक यांचे मुख्यालय औरंगाबाद हायकोर्ट करण्याच्या निर्णय घेण्यात आला होता.
हक यांचे मुख्यालय बदलण्याच्या निर्णयाचा हायकोर्ट बार असोसिएशनच्या सदस्यांनी विरोध केला होता. हा निर्णय आता रद्द करण्यात आला आहे. त्यामुळे न्या. हक यांना पुन्हा नागपूर हायकोर्टात पाठविण्यात आले आहे. न्या. हक यांची अचानक नागपूर खंडपीठातून औरंगाबाद येथे बदली करण्याचा निर्णय तत्कालीन मुख्य न्यायमूर्ती प्रदीप नंदराजोग यांनी घेतला होता. न्या. हक यांची केवळ बदलीच नव्हे तर मुख्यालय बदलण्यात आले होते. त्यामुळे न्या. हक यांना निवृत्तीपर्यंत औरंगाबाद येथेच रहावे लागणार होते.
हायकोर्ट बार असोसिएशनने या निर्णयाचा विरोध केला होता. सर्वसाधारण सभेत न्या. हक यांच्या बदलीचा विरोध करणारा ठराव मंजूर करण्यात आला. वरिष्ठ न्यायमूर्तींबबात अशाप्रकारे मुख्यालय बदल करणे अयोग्य आहे. त्याचा नवोदीत वकीलांवरही मोठा परिणाम होईल, असे नमूद करण्यात आले होते. न्या. हक यांनी नेहमीच बारच्या सदस्यांना प्रोत्साहन दिले. नवोदीतांना ते मार्गदर्शन करीत होते. त्यामुळे न्या. हक यांचे मुख्यालय पुन्हा नागपूर करण्यात यावे, अशी विनंती करण्यात आली. त्या ठरावानंतरही निर्णय बदलण्यात न आल्याने वकीलांनी कोटावर पांढरी रिबिन लावून निषेधदेखील केला.
त्यानंतर मुख्य न्यायमूर्ती प्रदीप नंदराजोग निवृत्त झालेत्त. त्यांच्या जागी नागपुरातीलच न्या. भूषण धर्माधिकारी यांची मुख्य न्यायमूर्ती म्हणून नियुक्ती झाली. न्या. धर्माधिकारी यांच्याकडे एचसीबीएने नव्याने ठराव सादर केला. त्या ठरावाची दखल घेत न्या. धर्माधिकारी यांनी न्या. हक यांचे नागपूर मुख्यालय करण्याचा निर्णय घेतला. त्यांना २० एप्रिलपासून रूजू होण्याचे आदेश देण्यात आलेत. त्यानुसार न्या. हक हे आता नागपुरात येणार आहेत. निवृत्ती कालावधीपर्यंत ते येथेच राहणार आहेत. मुख्य न्यायमूर्ती धर्माधिकारी यांनी घेतलेल्या निर्णयावर नागपुरातील वकीलांनी आनंद व्यक्त केला आहे.
आमचे चॅनल subscribe करा
