आता राष्ट्रवादीला सत्तास्थापनेचं आमंत्रण; २४ तास हातात!

Advertisements

Advertisements

Advertisements

Advertisements

मुंबई: महाराष्ट्राचे राज्यपाल भगतसिंह कोश्यारी यांनी भाजप आणि शिवसेनेनंतर तिसरा सर्वात मोठा पक्ष असलेल्या राष्ट्रवादी काँग्रेसला सत्तास्थापनेसाठी आमंत्रण दिलं आहे. या ताज्या घडामोडीमुळे महाराष्ट्राच्या राजकारणाला नवी कलाटणी मिळण्याची शक्यता आहे. हे आमंत्रण राष्ट्रवादी काँग्रेस स्वीकारणार का?, याकडे अवघ्या महाराष्ट्राचे लक्ष लागले आहे.

राज्यपालांनी राष्ट्रवादी काँग्रेसचे विधिमंडळ पक्षनेते अजित पवार यांना भेटण्यासाठी पाचारण केले. त्यानंतर छगन भुजबळ, धनंजय मुंडे, जयंत पाटील, दिलीप वळसे पाटील या नेत्यांसह अजित पवार राजभवनावर दाखल झाले. या भेटीत आपण सत्तास्थापण्यासाठी इच्छूक आहात का?, अशी विचारणा राज्यपालांनी केली. त्यावर आमच्या मित्रपक्षाशी चर्चा करून निर्णय कळवतो, असे अजित पवार यांनी राज्यपालांना सांगितलं.

राज्यपालांच्या भेटीनंतर जयंत पाटील यांनी माध्यमांना माहिती दिली. ‘प्रक्रियेनुसार राज्यपालांनी तिसरा सर्वात मोठा पक्ष म्हणून राष्ट्रवादी काँग्रेसला सत्तास्थापनेचं आमंत्रण दिलं आहे. आम्ही आमच्या मित्रपक्षाशी बोलून लवकरात लवकर आमचा निर्णय कळवू, असं राज्यपालांना सांगितलं आहे. राज्यपालांनी आम्हाला निर्णय कळवण्यासाठी उद्या रात्री साडेआठ वाजेपर्यंतचा वेळ दिला आहे’, असे त्यांनी नमूद केले.

राज्यपालांच्या आमंत्रणानंतर राष्ट्रवादी काँग्रेस व काँग्रेसच्या वर्तुळात मोठ्या प्रमाणात हालचाली सुरू झाल्या आहेत. राज्यपालांचं स्वीकारायची की नाही, यावर उद्या खलबतं होण्याची शक्यता आहे. राष्ट्रवादी काँग्रेसची उद्या मुंबईत शरद पवार यांच्या अध्यक्षतेखाली बैठक होणार आहे तर दिल्लीत काँग्रेस हायकमांडनेही बैठक बोलावली आहे. काँग्रेसचे दिल्लीतील प्रमुख नेते शरद पवार यांच्याशी चर्चा करण्यासाठी उद्या दुपारपर्यंत महाराष्ट्रात येण्याची शक्यता आहे.

महाराष्ट्रातील पक्षीय बलाबल पाहता या दोन्ही पक्षांचं संख्याबळ शंभरच्या आसपास आहे. इतक्या तोकड्या आकड्यावर हे पक्ष सत्तास्थापनेचा दावा करण्याची सूतराम शक्यता दिसत नाही. शिवसेनेने मुख्यमंत्रिपदाच्या हट्टातून भाजपसोबतचा संवाद तोडला आहे. आता काँग्रेस, राष्ट्रवादीसोबत पुढे जायचे असेल तर याच अटीवर पुढे जाता येणार आहे. या सगळ्या गुंतागुंतीमुळे महाराष्ट्रातील सत्तास्थापनेचा पेच आणखीच जटील बनला आहे.

Advertisements