नागपूर: सीताबर्डीतील मुख्य मार्गावरील फ्रेण्ड कलेक्शन शोरुममध्ये एक १७ वर्षीय विद्यार्थिनी कपडे बदलत असताना तिचे मोबाइलद्वारे चित्रीकरण करण्यात आल्याची खळबळजनक घटना उघडकीस आली आहे. याप्रकरणी सीताबर्डी पोलिसांनी गुन्हा दाखल करून मालक व नोकराला अटक केली आहे.
पोलिसांनी दिलेल्या माहितीनुसार, पीडित विद्यार्थिनी कॉलेजला शिकते. शुक्रवारी सायंकाळी ती व तिची मैत्रिण कॉलेजचा ड्रेस घेण्यासाठी फ्रेण्ड्स कलेक्शनमध्ये आली. ड्रेस घालून बघण्यासाठी ती शोरुमच्या चेजिंग रुममध्ये गेली. कपडे बदलताना तिला मोबाइल दिसला. तिला संशय आला. मोबाइलमध्ये बघितले असता तिला कपडे बदलण्याचे चित्रीकरण दिसले. विद्यार्थिनीला धक्का बसला. मोबाइलसह विद्यार्थिनीने थेट सीताबर्डी पोलीस स्टेशन गाठले. वरिष्ठ पोलीस निरीक्षक जगवेंद्रसिंग राजपूत यांच्या मार्गदर्शनाखाली पोलिस उपनिरीक्षक नितीन विटोले यांच्यासह पोलिसांचा ताफा फ्रेण्ड्समध्ये पोहोचला. पोलिसांनी विनयभंगासह विविध कलमान्वये गुन्हा दाखल करून मालकासह दोघांना अटक केली.
आमचे चॅनल subscribe करा
