२१ सा व्या शतकातही  ‘ती’चं अस्तित्वं घूसमटलेलंच 

महसा अमिनी तिच्या कुटूंबियांसोबत इराकमध्ये आपल्या नातेवाईकांकडे जात होती.सायंकाळची वेळ होती.या प्रवासात इराणच्या सदाचारण पोलिसांनी(मोरालिटी पोलिस) त्यांची गाडी थांबवली.अमिनीने त्या वेळी कारच्या आतमध्ये हिजाब परिधान केला होता मात्र,तो थोडा व्यवस्थित नव्हता.तिचे कपाळावरचे केस त्यामधून दिसत होते.परिणामी,सदाचारण पोलिस तिला जबरदस्ती कारमधून ओढून पोलिसांच्या गाडीत बसवतात.तिचा भाऊ खूप गयावया करतो पण,पोलिस त्याला सांगतात त्याच्या बहीणीला एका तासासाठी नैतिकतेच्या पाठ शिकवण्यासाठी पोलिस ठाण्यात घेऊन जात आहोत.आमिनीच्या कुटूंबियांनी ही घटना इराणच्या मानवाधिकार संघटनेला त्यांच्या वेबसाईटवर तात्काळ कळवली.अमिनीच्या भाऊ सांगतो की पोलिस ठाण्यातील एका खाेलीतून त्याला अमिनीच्या किंचाळण्याचा आवाज येत होता.यानंतर अचानक पोलिस ठाण्या समोर एक रुग्णवाहिका आली.अमिनीला लपून कासरा रुग्णालयात घेऊन जाण्यात आले.पोलिसांनी तिच्या भावाला सांगितले की अमिनीला हार्टअटैक आला.अमिनी ही फक्त २२ वर्षांची होती आणि स्वस्थ होती.तिच्या भावाला सांगितल्या जातं की ती कोमामध्ये आहे!

दोन दिवसांनंतर १५ सप्टेंबर रोजी तेहरानची पोलिस एक अधिकृत बयाण जारी करते,अमिनीला अटक केल्यानंतर पोलिस ठाण्यात तिला हार्टअटैक आला.अमिनीचा भाऊ सांगतो की तिला अटक केल्यानंतर फक्त दोन तासांचा वेळ ती अटकेत होती.पण,पोलिस ठाण्यातून ती सरळ रुग्णालयात,रुग्णालयात ती सरळ कोमात आणि १६ सप्टेंबर रोजी ती हे जगच सोडून निघून जाते.याचा अर्थ त्या दोन तासात ,ते ही सार्वजनिक ठिकाणी नाही,तर आपल्याच कुटूंबियांसोबत कारमध्ये प्रवास करीत असताना हिजाब फक्त थोडासा योग्य पद्धतीने घातला नसल्याची तिला इतकी क्रूर शिक्षा इराणच्या पोलिसांकडून मिळाली…!

एकविसाव्या शतकातील तिसरे दशक सुरु आहे आणि या काळात कोणी कल्पना ही करु शकत नाही एखाद्या देशात महिलांसह अगदी लहान-लहान मुलींनाही सख्तीने हिजाबमध्ये राहण्यास बंदी घालणारा कठोर कायदा अनेक इस्लामिक देशात आजच्या काळातही आहेत.त्यात ही फक्त हिजाब तपासण्यासाठी रस्तोरस्ती सदाचारण पोलिस तैनात असतात!अगदी कारमध्ये जात असतानाही महिलांनी हिजाब योग्य रितीने घातला आहे की नाही फक्त यावर लक्ष ठेवण्याचे काम ते करत असतात.इतकंच नव्हे तर कायदा मोडणा-या ,तो ही अनावधानाने का होईना,अश्‍या महिलांना क्रूरतम मारहाणीतून अगदी मृत्यूदंडाची शिक्षा देण्याचीही अर्निबंध मोकळीक त्यांच्या हातात आहे.या देशांच्या कायदानुसार महिला .तसेच लहान मुली  त्यांच्या कपाळावरील  एक केस ही दिसता कामा नये इतका घट्ट हिजाब त्यांना अगदी लहानवयापासून घालावा लागतो.स्त्री म्हणून जन्माला आलेल्या लहान-लहान चिमुकल्यांवर जन्मापासूनच हिजाबमध्ये बंदिस्त राहण्याची अमानवीय शिक्षा,धर्माच्या नावावर एखाद्या राष्ट्रात मिळत असेल तर जगाला महिलांच्या सन्मानासाठी ‘जागतिक महिला दिवस’साजरा करण्याचा नैतिक अधिकार तरी राहतो का?हा प्रश्‍न अस्वस्थ करुन जातो.

अमिनीच्या मृत्यूने इराणला हलवून सोडले.अनेक प्रत्यक्षदर्शींनी तेथील पत्रकारांना सांगितले की अमिनीला पोलिस व्हॅनमध्ये बसवल्यानंतर मारहाण करण्यात आली.अमिनीचे वडील अमजद अमिनीने देखील एका मुलाखतीत सांगितले की,त्यांच्या मुलीची क्रूर हत्या करण्यात आली मात्र,सरकारी अधिका-यांनी त्यांच्या या दाव्यांना नाकरले.इराणचे आंतरिक व्यवस्था मंत्री अहमद वहिदी यांनी दावा केला की अमिनीला आधीपासूनच अनेक व्याधी होत्या आणि मोरेलिटी पोलिसांकडे तसे पण कोणतेच हत्यार नव्हते ज्याने तिला मारहाण केली जाऊ शकते.मात्र,एका ग्रूप ऑफ हॅकर एक्टीवीस्टने त्या रुग्णालयातील एक वैद्यकीय अहवाल लिक केला ज्यामध्ये अमिनीचा स्कलचा सिटी स्कॅन,बोन फ्रॅक्चर,ब्रेन हेमरेज आणि बोन एडिमा स्कॅनचा अहवाल होता!३० सप्टेंबर  रोजी हा गुपित अहवाल समाज माध्यमांवर व्हायरल झाला ज्यामध्ये अमिनीच्या डोक्यावर वारंवार तसेच शरिरावर जोरदार प्रहार झाला असल्याचे स्पष्ट झाले.

ज्यावेळी अमिनीचा हा वैद्यकीय अहवाल व्हायरल झाला त्यावेळी इराणमध्ये तिच्या समर्थकांमध्ये व सरकारच्या समर्थकांमध्ये जोरदार वाद जुंपले.मात्र,इराणमधील एक धाडसी डॉक्टर हुसैन करमपूर यांनी ते छायाचित्र व्हायरल केले ज्यात तीचा देह जखमांनी भरलेला दिसत होता.हे लक्षण हार्टअटैकचे नव्हते.तिच्या त्या नाजूक देहाला खूप बेरहमीने मारहाण करण्यात आली होती.डॉ.करमपूर हे इराणमधील मेडीकल कॉउंसिलमधील अधिकारी रईसजादे यांना पत्र लिहून,’सच्चाई का सामना करो’अशी मागणी करतात.हा वाद इराणमध्ये इतका जास्त पेटला की ते बघून पोलिसांनी एक खोटा व्हिडीयो व्हायरल केला ज्यामध्ये पोलिस ठाण्यात एक महिला अचानक कोसळून पडताना दिसून पडते.मात्र,फार लांबून एकाच एंगलने तो व्हिडीयो बघून अमिनीच्या वडीलांनी त्याच पोलिस ठाण्यातील कोर्ट यार्ड आणि कारमधील वेब्ह कॅमरेतील छायाचित्रणांची मागणी केली.मात्र,पोलिसांकडे ते नव्हतेच तर देणार कुठून.

यानंतर इराणचे राष्ट्राध्यक्ष इब्राहिम रईसी हे मासा अमिनीच्या कुटूंबियांप्रति फोनवरुन सहानूभूती दर्शवतात व त्यांना खात्री देतात की या घटनेची निष्पक्षपणे चौकशी केली जाईल व दोषींना शिक्षा दिली जाईल.मात्र,या वेळेपर्यंत मासा अमिनीचा मृत्यू हा जगभरातील निषेध चळवळीचा विषय झाला होता.