देवेंद्र फडणवीस यांचा सत्ताधारी आघाडीवर टीकेचा पहिला बाण

देवेंद्र फडणवीस यांनी महाराष्ट्रातील राजकीय संस्कृती जपत झालं गेलं सारं विसरून आज उद्धव ठाकरे यांच्या शपथविधी सोहळ्याला शिवतीर्थावर उपस्थिती लावली. त्यांच्यासोबत भाजपचे प्रदेशाध्यक्ष चंद्रकांत पाटीलही होते. या सोहळ्यात प्रत्यक्ष उपस्थित राहून उद्धव ठाकरे यांना मुख्यमंत्री म्हणून धुरा वाहण्यास शुभेच्छा दिल्यानंतर फडणवीस यांनी ट्विटरच्या माध्यमातूनही शुभेच्छा दिल्या. शुभेच्छांचं हे ट्विट केल्यानंतर अवघ्या तासाभरातच फडणवीस यांनी महाविकास आघाडीच्या समान किमान कार्यक्रमावर टीकास्त्र सोडून येत्या काळात सरकारविरुद्ध तीव्र संघर्षाचे संकेत दिले. फडणवीस यांची भाजपचे विधिमंडळ पक्षनेते म्हणून निवड करण्यात आलेली आहे. त्यामुळेच विधिमंडळात विरोधी पक्षनेते म्हणून तेच सरकारला धारेवर धरणार, हे जवळपास निश्चित आहे. ते पाहता आक्रमक स्वभावाचे नेते अशी ओळख असलेले फडणवीस आणि उद्धव सरकारमधील विधिमंडळातील ‘सामना’ रंगतदार ठरेल असे संकेत मिळत आहेत.