जिल्हाधिकारी यांची तातडीने बैठक घेणारा तो मोठा नेता कोण?

कोणत्याही कपंनीला कोणत्याही गावात काम सुरु करण्यापूर्वी ग्रामपंचायतीकडून ना-हरकत प्रमाणपत्र घ्यावे लागतात.’सुनील फेरो ॲण्ड एनर्जी ‘या कंपनीने उनगाव ग्रामपंचायतीचे खोटे प्रमाणपत्र मिळवले,असा धक्कादायक आरोप पत्रकार परिषदेत अवंतिका लेकुरवाळे यांनी केला.२०२४ मध्ये उनगाव ग्रामपंचायतीमध्ये जे सचिव पदावर नव्हते,त्यांच्या सहीनिशी या कंपनीने खोटे प्रमाणपत्र मिळवले.२२ नोव्हेंबर २०२४ रोजी सरंपंच अरुण आखरे व सचिव संगीता भोळे यांच्या नावानिशी व सहीनिशी या कंपनीने ना-हरकत प्रमाणपत्र मिळवले जेव्हा की संगीता भोळे या २०२२ मध्येच ग्रामपंचायतीतून गेल्या व २०२३ अरुण आखरे यांचे पद गेलं.२०२३ पासून सरपंच सुजाता पाटील व त्यांची कार्यकारीणी ग्रामपंचायतीमध्ये पदावर आहेत.याचा अर्थ २०२४ मध्ये ग्रामपंचायतीमध्ये जे पदावरच नव्हते त्यांच्या सही व नावानिशी सुनील फेरो ही कंपनी ना-हरकत प्रमाणपत्र कसे मिळवू शकते?असा सवाल लेकुरवाळे करतात.

गावक-यांनी शासनाच्या प्रत्येक विभागाकडे तळमळीने अर्ज केले.यात तहसीलदार,बीडीओ सगळेच आले.गावक-यांच्या तक्रारीनंतर आरोग्य विभागाने देखील गावाचे सर्वेक्षण केले.प्राथमिक आरोग्य केंद्रानेही ही कंपनी प्रदूषित करीत असलेले लहान-लहान धुळीचे कण ज्यात लोहकण मिसळलेले आहेत ते आरोग्यासाठी घातक आहेत.शेती,जनावरे,गावक-यांचे आरोग्य धोक्यात असल्याचा अहवाल आरोग्य विभागाने दिले.यावर कहर म्हणले गावक-यांसाठी एकमेव पिण्याच्या पाण्याच्या टाकीत देखील ते धुळीकण मिसळत आहेत.गावकरी ऑरोचे पाणी विकत घेऊन पिऊ शकत नाहीत.यामुळे देखील त्यांच्या आरोग्याला गंभीर धोका निर्माण झाला आहे.जनावरांच्या पोटातही ते प्रदुषित पाणी जात आहे,त्यांच्या दूधातून ते धुळीकण माणसांच्या पोटात पोहोचत आहेत.

कृषि विभागाने देखील शेतीचे प्रचंड नुकसान झाले असल्याचा अहवाल दिला आहे.ब्लॉक डेव्हलपमेंट ऑफिसर(बीडीओ)यांनी देखील सर्वेक्षण करुन त्यांच्या अहवालात अतिशय धोकादायक परिस्थिती असल्याचा उल्लेख केला आहे.त्यांनी कंपनी मालकाला पत्र ही दिलं की तीन दिवसांच्या आत कंपनी बंद केली पाहिजे.

खासदार श्‍यामकुमार बर्वे यांच्या मार्गदर्शनातही एक बैठक घेण्यात आली.कंपनीच्या मालकांना ती सगळी परिस्थिती दाखवण्यात आली.त्यांनी देखील हे कबूल केले की हे सगळे भयावह आहे आणि त्यांनी कंपनी बंद करण्याचा निर्णय घेतला.त्यांनी लिखितमध्ये दिलं की जोपर्यंत कपंनीत प्रदुषणाच्या अनुषंगाने सुधार होत नाही तोपर्यंत कपंनी बंद ठेवण्यात येईल.

यानंतर जिल्हाधिकारी यांच्याकडे एक बैठक झाली.ती कंपनी स्वत:हून सुरु करुन टाकली.गावक-यांनी जेव्हा कंपनी मालकाला याची विचारणा केली तेव्हा त्याने धमकी दिली,‘कोण काय करु शकतो ते आम्ही पाहून घेऊ!’ही कंपनी कामठी तालुक्यात येत आहे.कामठीचे आमदार चंद्रशेखर बावणकुळे असून ते राज्याचे महसूल मंत्री देखील आहेत.आता गावक-यांनी कुठे न्याय मागायचा?पालकमंत्र्यांना दोन महिन्यांपूर्वीच सरपंच सुजाता पाटील यांनी पत्र दिले आहे मात्र,अद्याप त्यावर महसूल मंत्र्यांनी कोणतीही कारवाई केली नाही. त्यामुळे संपूर्ण गाव पुन्हा एकदा त्यांची भेट घेणार असल्याचे लेकुरवाळे यांनी सांगितले कारण हा त्यांच्या मतदारसंघाचा प्रश्‍न आहे.

गावकरी जेव्हा तहसीलदार,महसूल अधिका-यांकडे दाद मागतात तेव्हा ते ‘मग महाराष्ट्र प्रदुषण मंडळाने कंपनीला परवानगी का दिली?आम्ही काही करु शकत नाही’असे उत्तर गावक-यांना देतात.महसूलची जागा त्यांची असताना किमान त्यांना प्रदुषणाचे नियम पाळण्यासाठी पत्र ते पाठवू शकतात मात्र,ते असे करत नाहीत.गावाच्या विकासासठी कंपनी आहे की कंपनीसाठी गाव वेठीस धरले जात आहे?असा सवाल लेकुरवाळे यांनी पत्रकार परिषदेत केला.

परिणामी,त्रस्थ गावक-यांनी नवनियुक्त जिल्हाधिकारी कुमार आर्शीवाद यांच्याकडे एक पत्र दिले असून, येत्या आठ दिवसात त्यांनी खासदार श्‍यामकुमार बर्वे,कंपनीचे संचालक,व्यवस्थापक तसेच ग्रामस्थांच्या उपस्थितीत बैठक घेऊन हा प्रश्‍न निकाली लावण्यात येईल असे आश्‍वासन दिले असल्याचे लेकुरवाळे यांनी सांगितले.त्या मोठ्या नेत्याने तुमच्यासोबत बैठक घेऊन कंपनी सुरु करण्यास हिरवा कंदिल दाखवला का?असा प्रश्‍न लेकुरवाळे यांनी जिल्हाधिकारी यांना केला असता,त्यांनी बैठक घेतली नसून ते मला भेटण्यासाठी आले होते,असे उत्तर जिल्हाधिकारी कुमार आर्शीवाद यांनी दिले!

संपूर्ण गावक-यांचा हा निर्धार आहे जोपर्यंत कंपनी बंद होणार नाही तोपर्यंत आम्ही शांत बसणार नाही,असा इशारा याप्रसंगी गावक-यांनी दिला.२४ एप्रिल रोजी ग्रामसभा ठेवण्यात आली असून त्या सभेत कंपनी बंद करण्याचा व ज्या अज्ञात लोकांनी कपंनीला ग्रामपंचायतीचे बोगस प्रमाणपत्र दिले त्यांच्याविरुद्ध एफआयआर दाखल करणार असल्याचा प्रस्ताव पारित करणार असल्याचे सरपंच सुजाता पाटील यांनी सांगितले.

…………………….