याला ‘राजकारण’असे नाव…

नागपूर,ता.२१ नोव्हेंबर: कालच विधान सभा-२०२४ च्या निवडणूकीचा धूराळा खाली बसला मात्र,त्या धुराळ्यात महाराष्ट्र राज्याची सुसंस्कृती पार धूमिळ झालेली संपूर्ण महाराष्ट्राने बघितली,सत्तेसाठी या पूर्वी पण साम,दाम,दंड,भेदाची ‘नीती’ वापरली जात होती,यंदा मात्र त्या नीतीला ‘अनीती’ची इतकी बटबटीत किनार होती की,सुजाण मतदारांनाही राजकारणाची किळस वाटली.हतबल झालेल्या जनतेने पैशांचा ‘महापूर’ नव्हे तर ‘महासमुद्रांचे’ पाट महाराष्ट्रात ठिकठिकाणी वाहताना पाहीले,अनेक व्हिडीयो व्हायरल ही झाले,एकेका मतदारसंघात राजकीय पक्षाकडून दीड-दोनशे काेटी रुपये जणू दीड-दोनशे रुपये वाटल्या सारखे भासत होते. महाराष्ट्राच्या राजधानीपासून तर उपराजधानीपर्यंतचे पैसे वाटपाचे व्हिडीयोज बघून राज्यातील जनता थक्क झाली!केवळ सत्ताधारी-विरोधकांमधीलच ही स्पर्धा नसून एकाच पक्षातील दोन मोठ्या नेत्यांमध्ये शह-काटशहचे राजकारण जनतेला या निवडणूकीत बघायला मिळाले जे २०१९ च्या निवडणूकीत एकदिलाने पक्षासाठी लढले होते..मग ती राजधानी मुंबई असो किवा उपराजधानी नागपूर.

मतदानासारख्या संवैधानिक कर्तव्याची विटंबना करणारे ‘मतदार’,मग तो ‘हूजूर ‘असो किवा ‘मजूर’त्यांच्या या लोभाला तर व्यक्त करण्यास शब्दच नाहीत.महाराष्ट्रात ६५ टक्के मतदान झाल्याची शाबासकी स्वत:ला देत असताना, सत्ता टिकवण्यासाठी किवा सत्ता हिसकवण्यासाठी पैशांचा जो पाट महाराष्ट्रात वाहला आहे,त्याचे ‘अंकगणित’समजून घेण्यासाठी आता परग्रहावरुनच तज्ज्ञ बोलवावा लागेल.

केंद्रिय व राज्य यंत्रणांनी आचारसंहितेदरम्यान ६६० कोटींची मालमत्ता जप्त केली असून नागपूरात ३९ कोटींचे साहित्य जप्त करण्यात आले.हा आकडा देखील महाराष्ट्राच्या बुद्धीजीवींना ‘दरिया में खसखस’सारखा वाटत असून ,प्रत्यक्ष मतदानाच्या दिवशी तर लक्ष्मी इतकी चंचल झाली होती की प्रत्येक ठिकाणी तिचे दर्शन होत होते!यावरुन या वेळी या निवडणूकीत किती हजार किवा लाख कोटींची राजकीय ‘उलाढाल’झाली याचा अंदाज येतो.

मतदानाच्या ऐन एक दिवस आधी भारतीय जनता पक्षाचे राष्ट्रीय सरचिटणीस विनोद तावडे हे मतदारांना पैसे वाटत असल्याचा आरोप बहुजन विकास आघाडीच्या कार्यकर्त्यांनी करुन मुंबईतील विरार येथे एका हॉटलमध्ये तब्बल चार तास तावडे यांना जायबंद करुन ठेवल्याचे दृष्य संपूर्ण महाराष्ट्रातील जनतेने बघितले.पाच कोटींची रक्कम त्यांनी वाटपासाठी आणल्याचा आरोप बविआचे अध्यक्ष ठाकरे यांनी केला.वाड्याहून परतत असताना मी केवळ कार्यकर्त्यांच्या भेटीसाठी गेलो असा खुलासा तावडे यांनी केला.या नाट्यमय घडामोडीनंतर बविआचे ठाकरे व तावडे एकाच कारमध्ये हॉटेलमध्ये जेवायला गेले!मग पाच कोटींची रक्कम २७ लाख सापडले,इतकी झाली,पुढे त्याचे ही काय झाले हे राज्यातील जनतेला कळलेच नाही.

भाजपच्याच नेत्याकडून मला तावडे विरार येथील हॉटेलमध्ये पैसे वाटत असल्याची ‘टिप’मिळाली असल्याचा दावा बविआचे ठाकरे यांनी करताच,संपूर्ण सोशल मिडीयावर फडणवीस यांच्याकडे अंगुलीनिर्देश झाला.दोनच दिवसांपूर्वी एका वृत्त वाहिनीला मुलाखत देताना तावडे यांनी राजस्थान,मध्यप्रदेशात प्रस्थापित चेहरा डावलून कार्यकर्त्याना मुख्यमंत्री पद मिळाले तसे महाराष्ट्रात ही घडू शकते,एवढे बोलताच त्यांच्यावर राजकारण ‘उलटले!’महाराष्ट्रात फडणवीसांशिवाय भाजपमधील कोणताही चेहरा मुख्यमंत्री म्हणून चालणार नाही,असा त्याचा अर्थ गृहीत धरल्या जात आहे.मात्र,यातील राजकारण व कुरघोडीचा भाग सोडला तरी झालेले ‘लक्ष्मीदर्शन’जनता कधीही विसरु शकणार नाही.

व मध्यम वर्गीयांपेक्षा निम्न वर्गीयांच्या मतदानावर स्तुतीगान गात असताना,पैशांनी विकल्या गेलेली मते’याकडे प्रचार-प्रचार माध्यमे डोळेझाक करीत असल्याचे दिसून पडतंय.