टाटा समूह अनेक मार्गांनी मदतीचा हात पुढे करत आहे. करोनाच्या संकटात वैद्यकीय क्षेत्रातील डॉक्टर, नर्स, वॉर्डबॉय असे सगळेच जण अहोरात्र सेवा देत आहेत. याशिवाय रुग्णालयांमध्ये असलेल्या रुग्णांचीही मोठी कोंडी झाली आहे. ही बाब लक्षात घेऊन टाटा समूहाच्या ताज हॉटेलने अशी सेवा देणाऱ्या सर्वांनाच तसेच गरजू रुग्णांसाठी भोजनाची व्यवस्था केली आहे. याबाबत मुंबई महापालिकेकडूनही दुजोरा देण्यात आला आहे. मुंबई पालिका आणि ताज कॅटरर्स यांच्या अंतर्गत समन्वयातून भोजनव्यवस्था करण्यात आली आहे. मुंबई पालिकेच्या रुग्णालयांत दाखल असलेले रुग्ण तसेच सर्व स्टाफच्या भोजनाची व्यवस्था ताज हॉटेलने केली आहे, असे ट्विट मुंबई पालिकेने केले आहे.
विशेष म्हणजे भारतीय संघाचा कर्णधार विराट कोहलीने ताज हॉटेलला या सेवेसाठी सलाम केला आहे. आरपीजी समूहाचे हर्ष गोयंका यांनीही टाटा समूहाचे कौतुक केले.
आमचे चॅनल subscribe करा
