अधिवेशन संपताच खातेवाटप जाहीर

नागपूर,ता.२१ डिसेंबर २०२४: नागपूरात हिवाळी अधिवेशनाचे सूप वाजले आणि अवघ्या काही तासातच बहूप्रतिक्ष्त मंत्री मंडळाच्या खातेवाटपाची यादी जाहीर झाली.आज अधिवेशनानंतर आयोजित पत्रकार परिषदेत मुख्यमंत्री देवेंद्र फडणवीस यांना पत्रकारांनी मंत्री मंडळाच्या यादीविषयी प्रश्‍न केला असता,त्यांनी आज ही घोषित होऊ शकते किवा उद्या ही यादी घोषित होऊ शकते,अश्‍या शब्दात सुहास्य चेह-याने  गुगली टाकली होती.तरी देखील अवघे मंत्री मुंबईत परतल्याशिवाय यादी जाहीर होणार नसल्याचा विश्‍वास पत्रकारांनाही होता मात्र,अधिवेशन संपताच ही यादी राजभवनातून जाहीर झाली अन् कोणाला कोणते खाते मिळाले आहे,हे स्पष्ट झाले.

ज्या गृहखात्यासाठी माजी मुख्यमंत्री एकनाथ शिंदे हे रुसून बसले असल्याची चर्चा होती ती फोल ठरली व पुन्हा एकदा गृहखाते मुख्यमंत्री देवेंद्र फडणवीस यांच्याकडेच अबाधित राहीले आहे,याशिवाय त्यांनी उर्जा खाते देखील स्वत:कडे ठेवले असल्याने पुढील काळात उद्योगपती अदानीसोबतचे करार-मदार याकडे महाराष्ट्राच्या जनतेचे लक्ष राहणार आहे.अर्थखाते उपमुख्यमंत्री अजित पवार यांच्याकडे कायम असून पुन्हा एकदा नगर विकास हे उपमुख्यमंत्री एकनाथ शिंदे यांच्याकडेच आले आहे.चंद्रशेखर बावणकुळे यांना या वेळी देखील महत्वाचे महसूल हे खाते मिळाले आहे.गेल्या टर्ममध्ये त्यांच्याकडे उर्जा खाते होते.