नवी दिल्लीः देशभरात करोनाचे १० नवे रुग्ण आढळून आले आहेत. सुरुवातीला दिल्ली, उत्तर प्रदेश आणि केरळपर्यंत मर्यादित असलेला करोनाचा व्हायरस आता महाराष्ट्र आणि केरळातही दाखल झाला आहे. महाराष्ट्रात करोनाचे काल दोन रुग्ण आढळल्यानंतर आज केरळमध्ये ६ आणि कर्नाटकात ४ रुग्ण आढळलेत. करोनाचे नवीन रुग्ण आढळून आल्याची माहिती केरळच्या मुख्यमंत्र्यांनी दिली. तर कर्नाटकच्या आरोग्यमंत्र्यांनी करोनाचे ४ रुग्ण आढळल्याचं सांगितलं. यानुसार देशातील करोनाचा संसर्ग झालेल्या रुग्णांची एकूण संख्या ५७ झाली आहे. पण नवीन रुग्णांसंदर्भात केंद्राकडून अद्याप कुठलीही माहिती देण्यात आलेली नाही.
केरळमध्ये करोनाचे ६ नवीन रुग्ण
केरळमध्ये करोनाचे आणखी ६ नवे रुग्ण आढळून आले आहेत. यामुळे राज्यातील सातवीपर्यंतच्या शाळा बंद ठेवण्याच्या सूचना करण्यात आल्या आहेत. तसंच त्यांच्या परीक्षा ३१ मार्चपर्यंत स्थगित केल्या गेल्या आहेत. ८, ९ आणि १०वीच्या विद्यार्थ्यांच्या परीक्षा नियोजित वेळापत्रकानुसार होतील. याशिवाय ट्युशन क्लासेस, आंगणवाडी, मदरसा ३१ मार्चपर्यंत बंद ठेवण्याचे आदेश देण्यात आले आहेत, असं केरळचे मुख्यमंत्री पिनराई विजयन यांनी सांगितलं.
इटलीहून परतलेल्या एका नागरिकाच्या आई-वडिलांना करोनाची लागण झाली आहे. त्यांना कोट्टायममधील मेडिकल कॉलेजमध्ये दाखल करण्यात आलं आहे. त्याचे वय ९० आणि ८५ असे आहे. मंगळवारी ज्या दोघांमध्ये लक्षणं आढळून आली त्यांना करोना झाल्याचं तपासणीतून स्पष्ट झालंय. इटलीहून परतलेल्या एका व्यक्तीला घरी आणण्यासाठी ते दोघे विमानतळावर गेले होते.
कर्नाटक चौघांना करोनाचा संसर्ग
राज्यात करोनाचे चार रुग्ण आढळून आले आहेत. संबंधित रुग्णांच्या कुटुंबीयांनाही वेगळं ठेवण्यात आलंय. त्यांच्यावर आरोग्य विभागाकडून लक्ष ठेवण्यात येतंय. नागरिकांनी काळजी घ्यावी आणि करोनाचा प्रादुर्भाव रोखण्यास मदत करावी, असं आवाहन कर्नाटकचे आरोग्यमंत्री बी श्रीरामुलु यांनी केलंय.
आमचे चॅनल subscribe करा
