हिंदूत्वामुळे नव्हे भाजप ‘या’कारणामुळे सत्तेत..

फडणवीसांच्या मंत्री मंडळामध्ये ६५ टक्के मंत्री हे ‘दागी‘

नागपूर,ता.२१ डिसेंबर २०२४: देशात व राज्यात काँग्रेसच्या चुकीच्या धोरणांमुळेच आज हा राष्ट्रीय पक्ष सत्तेत नाही,उलट काँग्रेसच्या धोरणांमुळेच भारतीय जनता पक्ष हा केंद्रात व राज्यात सत्तेत आला असल्याचे उघडपणे बोलले जात आहे,हिंदूत्वावर सवार होऊन व काँग्रेसच्या तृष्टिकरणाच्या नीतीमुळेच भाजप आज सत्तेत आहे,त्यामुळे ,केंद्रात व राज्यात काँग्रेसला पुन्हा सत्तेत जर यायचं असले तर काँग्रेसला आपल्या धोरणांमध्ये बदल करावा लागेल,असं तुम्हाला वाटत नाही का?असा प्रश्‍न केला असता,भाजप हे हिंदूत्वामुळे नव्हे तर ‘ईव्हीएम’मुळे सत्तेत असल्याचे उत्तर काँग्रेसचे प्रदेशाध्यक्ष नाना पटोले यांनी दिले.ते आज शनिवार दिनांक २१ डिसेंबर रोजी नागपूर हिवाळी अधिवशेनाचे सूप वाजल्यानंतर पत्र परिषदेत बोलत होते.

या प्रश्‍नावर बोलताना नाना म्हणाले,की निवडणूकीतील ईव्हीएमचा जो घोटाळा आहे तो अद्याप ही स्पष्ट झालेला नाही,राज्याचे मुख्यमंत्री हे निवडणूक आयोगाची बाजू मांडत आहे,याचा अर्थ काय आहे हे सर्वांना माहिती आहे. हिंदूत्वाच्या किवा तृष्टिकरणामुळे हे सरकार सत्तेवर आलेले नाही,हे सरकारच निवडणूक आयोगाच्या कृपेने केंद्रात आणि राज्यात सत्तेत आलेले सरकार आहे,अशी प्रखर टिका याप्रसंगी नाना पटोले यांनी केली.केंद्राने आता एक नोटीफिकेशन काढून निवडणूक आयोगाने आता निवडणूक संबंधी कुठलीही माहिती कोणालाही देऊ नये,असे सांगितले आहे.यावरुन स्पष्ट झालेले आहे की ते ठरवतील तो कायदा,स्वायत्त संस्था इत्यादी प्रकार आता रहीला नाही.तुष्टिकरणाचा भाग जाऊ द्या,काँग्रेस हा देशाच्या संविधानानुसारच चालत राहणार.संविधानानुसार ,सर्वधर्म समभावावर देश चालावा ही भूमिका काँग्रेसची राहीली असल्याचे सांगून काँग्रेस त्याच भूमिकेवर चालत राहील,असे ते म्हणाले.