बल्लारपूरात काँग्रेसची भाजपसोबत ‘खेळी!’

संविधानाची प्रत हातात घेऊन सध्या अखिल भारतीय राष्ट्रीय काँग्रेसचे दिल्लीपासून तर गल्लीपर्यंतचे नेते भारताचे संविधान कशाप्रकारे धोक्यात आहेत,हा कंठशोष करताना दिसतात.त्यांच्या प्रत्येक भाषणात हूकूमशाहीपासून संविधानाचे व लोकशाहीचे रक्षण हा मुद्दा असतो मात्र,प्रत्यक्षात खरंच त्यांना संविधानाचे रक्षण करायचे आहे का?कि फक्त सत्ता मिळवण्यासाठी व विरोधकांवर मात करण्यासाठी ते संविधानाचा मुद्दा उचलत आहेत?हा प्रश्‍न पडतो तो चंद्रपूर जिल्ह्यातील बल्लापूर विधानसभा मतदारसंघाचा फेरफटका मारल्यावर,तेथील जनतेसोबत संवाद साधल्यानंतर.‘सत्ताधीश‘ने या मतदारसंघाचा दौरा केल्यावर अनेक धक्कादायक बाबी जनता व उमेदवारांनीच उघड केल्या.

हा मतदारसंघ काँग्रेसचाच बालेकिल्ला होता मात्र,भारतीय जनता पक्षाचे कद्दावर नेते व राज्याचे वनमंत्री सुधीर मुनगंटीवार यांनी या मतदारसंघातून गेल्या तीन निवडणूकीत काँग्रेसला या मतदारसंघातून हद्दपार केले.२००९,२०१४,२०१९ मध्ये त्यांनी बल्लारपूर मतदारसंघाचे प्रतिनिधित्व केले. यंदा देखील भाजपतर्फे त्यांची उमेदवारी घोषित झाली आहे.महत्वाचे म्हणजे याच वर्षी मे महिन्यात पार पडलेल्या लोकसभेच्या निवडणूकीत मुनगंटीवार यांना लोकसभेच्या चंद्रपूर मतदारसंघातील त्यांचाच बालेकिल्ला असलेल्या याच बल्लारपूर विधानसभा मतदारसंघातून  कमी मतदान झाले होते व त्यांचा पराभव झाला होता.काँग्रेसच्या प्रतिभा धानोरकर यांनी लोकसभेच्या निवडणूकीत त्यांचा पराभव केला होता.विधानसभेत मात्र,पुन्हा मुनगंटीवारांनी बल्लारपूर मतदारसंघातून राज्याच्या सत्ताकेंद्रात जाण्यासाठी शड्डू ठोकला आहे.

चंद्रपूर जिल्ह्यातील मूल,पोंभूर्णा,बल्लापूर या तालुक्यांचा या विधानसभा मतदारसंघात समावेश होतो.काँग्रेसतर्फे बल्लापूरात संतोष रावत यांना तिकीट देण्यात आली आहे मात्र,सर्वात आश्‍चर्याची बाब म्हणजे रावत यांना तेथील अनेक मतदार ‘डमी’उमेदवार समजत असून खरी लढाई भाजपचे कद्दावर मंत्री सुधीर मुनगंटीवार तसेच अपक्ष उमेदवार डॉ.अभिलाषा गावतुरे(बेहरे)यांच्यात रंगली आहे!डॉ.अभिलाषा यांना काँग्रेसची तिकीट मिळाली असती तर किमान चाळीस हजारांनी मुनगंटीवार यांचा पराभव ‘निश्‍चित’होता,हे केवळ मतदारच सांगत नाहीत तर भाजपच्याच कार्यकर्ता,पदाधिकारी देखील खासगीत मान्य करतात!

यावरुन डॉ.अभिलाषा यांच्या बदलापूरातील कामगिरी व नेतृत्वाचा अंदाज येतो.त्यांच्या पाठीशी ऑल इंडिया बॅकवर्ड ॲण्ड मायनोरिटी कम्यूनिटीज एम्पलाॅईज फेडरेशनचा(बामसेफ)प्रदीर्घ अनुभव असून, त्यांची पार्श्वभूमी ही आंदोलानाची आहे.त्या उच्चशिक्ष्त आहेत.चंद्रपूर जिल्ह्यात सामाजिक कार्यासाठी प्रसिद्ध असलेली भूमिपुत्र ब्रिगेड संघटनेची स्थापना त्यांनी केली.२०१५ मध्ये ईव्हीएम विरोधी आंदाेलनाचे चंद्रपूर येथे त्यांनी प्रमुख नेतृत्व केले होते.२६ नोव्हेंबर २०२० रोजी ओबीसीच्या जात निहाय जनगणनेसाठी विशाल ओबीसी मोर्चा त्यांनी काढला.कारोना काळात दोन वर्षे लोकांचे प्राण वाचवण्यासाठी त्या तत्पर राहील्या.वन्य प्राण्यांच्या हल्ल्यात जखमी झालेल्यांसाठी डॉ.अभिलाषा या साक्षात ‘देवदूत’ ठरत असतात.त्यांचे सामाजिक कार्य देखील उल्लेखनीय असून सत्यशोधक बुक बँकेची स्थापना तसेच ‘गाव तिथे वाचनालय’ हा उपक्रम त्यांनी सुरु केला.क्रांतीज्योती सावित्रीबाई फुले व महात्मा ज्योतिबा फूले यांचा अवमान करणा-या राज्यपालांच्या विरोधात देखील आंदोलनाचे रणशिंग त्यांनी फूंकले,सर्वात महत्वाचे म्हणजे बिल्किस बानो प्रकरणात चंद्रपूरमध्ये महिलांचे मोठे आंदोलन त्यांनी उभारले होते.सीटीपीएस येथे प्रकल्पग्रस्तांच्या हक्कासाठी कामगार आंदोलनाचे त्यांनी नेतृत्व केले तसेच कुपोषित बालकांना दत्तक घेऊन आपले सामाजिक दायित्व हिरिरीने जपले.

अशी प्रगल्भ सामाजिक पार्श्वभूमी असलेल्या डॉ.अभिलाषा यांनी काँग्रेस पक्षाकडून उमेदवारी मागितली होती,त्यांचे तिकीट देखील निश्‍चित झाले होते मात्र,अगदी दिल्ली दरबारी दोन दिवस मतदारसंघातील एक कद्दावर नेता शड्डू ठोकून बसला अन् डॉ.अभिलाषा यांना तिकीट मिळू नये यासाठी सर्वतोपरी प्रयत्न केले.यात पन्नास ते शंभर कोटींचे वारेन्यारे झाले,असा देखील आरोप होत आहे.म्हणूनच डॉ.अभिलाषा या, ही निवडणूक ‘धनशक्ती विरुद्ध जनशक्ती‘ची असल्याचे आपल्या सभेत खुलेआम सांगताना आढळतात.शिक्षण,आरोग्य,शेती व सिंचन,रोजगार,महिला सक्षमीकरण,क्रीडा,मुस्लिम वसत्यांमधील रहीवाश्‍याचे जीवनमान उंचावणे इत्यादी मुद्दे घेऊन त्यांनी ‘जनतेचा जाहीरनामा‘प्रसिद्ध केला आहे.