नागपूरात भाजपचं ‘ठरलं!’

नागपूर,ता.२८ ऑक्टोबर २०२४: मुख्यमंत्री देवेंद्र फडणवीस आणि केंद्रिय मंत्री नितीन गडकरी यांनी कोट्यावधीची विकास कामे खेचून आणली असतानाही,त्यांच्या पक्षाच्या तीन आमदारांना निवडणूकीत धोका असल्याची धक्कादायक माहिती आमदारांच्या रिपोर्टकार्डमधून पुढे आली होती.मुख्यमंत्र्यांनी केलेल्या सर्व्हेत उत्तर आणि पश्‍चिम मतदारसंघ धोक्यात तर दक्षिण काठावर असल्याचे निदर्शनास आले होते.२०१९ च्या विधान सभेसाठी ते सर्वेक्षण होते.घडले ही तसेच,उत्तर आणि पश्‍चिम भाजपने गमावले तर दक्षिणेतही भाजपचे उमेदवार मोहन मते यांना विजयासाठी कडवी झुंज द्यावी लागली होती.

गेल्या पाच वर्षात पूला खालून बरेच पाणी वाहून गेले आहे.२०२४ ची निवडणूक ही महाराष्ट्रासह उपराजधानीत देखील फार वेगळी असल्याचे मतदार अनुभवत आहे.सूत्राने दिलेल्या माहितीनुसार नागपूरात भाजपचं ‘ठरलं!’मध्य मधून भाजपचे विद्यमान विधान परिषदेचे आमदार प्रवीण दटके हे परवा दिनांक २९ ऑक्टोबर रोजी उमेदवारी अर्ज भरणार असून,उत्तरेत पुन्हा एकदा गडकरी व फडणवीस यांचे पहील्या क्रमांकाचे पसंतीचे उमेदवार असलेले व २०१९ च्या निवडणूकीत २० हजार ८९४ मतांनी काँग्रेसचे डॉ.नितीन राऊत यांच्याकडून पराभूत झालेले डॉ.मिलिंद माने यांनाच पुन्हा उमेदवारी मिळणार असल्याची खात्रीलायक माहिती समोर आली आहे.पश्‍चिमेत भाजपने जिल्हाध्यक्ष सुधाकर कोहळे यांनाच काँग्रेसचे विद्यमान आमदार विकास ठाकरे यांच्या विरोधात मैदानात उतरविण्याचा निर्णय घेतला असल्याची माहिती सूत्राने दिली.महत्वाचे म्हणजे लोकसभा निवडणूकीतील ‘मैत्री’जपली जात असून काेहळे यांना बळीचा बकरा बनविण्यात आल्याची,खासगीत भाजपच्या कार्यकर्त्यांमध्येच चर्चा आहे.

भाजपने आपल्या पहील्याच यादीत नागपूरातील सहा पैकी तीन जागांवर उमेदवारांची घोषणा केली असून यात उपमुख्यमंत्री देवेंद्र फडणवीस यांचा दक्षिण-पश्‍चिमचा समावेश आहे.दक्षिण नागपूर मतदारसंघातून पुन्हा एकदा मोहन मते तर पूर्व नागपूरातून पुन्हा एकदा कृष्णा खोपडे यांच्या नावांची घोषणा झाली आहे मात्र,उत्तर,मध्य व पश्‍चिम विषयी अद्याप ससपेन्स कायम ठेवला आहे.गेल्या दोन महिन्यांपासून नागपूरात ठाण मांडून बसलेले भाजपचे वरिष्ठ नेते कैलास विजयवर्गीय ज्यांच्यावर नागपूर शहर व ग्रामीणच्या मिळून १२ जागांची जबाबदारी सोपविण्यात आली आहे,त्यांनी या तिन्ही ‘संभावित’उमेदवारांना उमेदवारी अर्ज भरण्यासाठी तयार राहण्याची सूचना केली असल्याची माहिती समोर आली आहे.

मध्य नागपूरात हलबा समाजाची ६० हजार पेक्षा अधिक मते असून हा मुस्लिम,हलबा व ओबीसी बहूल प्रभाग आहे.गेल्या तीन टर्मपासून भाजपचे विकास कुंभारे मध्य नागपूरातून केवळ हलबा मतदारांच्या भरवश्‍यावर विजयी झाले आहेत.यंदा मात्र त्यांची उमेदवारी धोक्यात आली असून ,भाजपचे शहरातील तिस-या क्रमांकाचे कद्दावर नेते,विद्यमान विधान परिषदेचे आमदार व माजी शहराध्यक्ष प्रवीण दटके यांना उमेदवारी दिली जाणार आहे.२०१९ मध्येच दटके या मतदारसंघातून निवडणूक लढण्यास प्रबळ दावेदार होते मात्र,जाती-पातीच्या मतपेढीतून त्यांना तिकीट मिळाले नाही.हलबांच्या नाराजीचा व हा मतदारसंघ गमावण्याच्या भितीतून भाजप श्रेष्ठींने ‘आंधळी कोशिंबिर ’खेळणे टाळले होते.

परिणामी,मुख्यमंत्री फडणवीसांच्या मुंबईतील बैठकीतील ज्या सर्व्हेक्षणात मध्य नागपूराने धोक्याची पातळी आेलांडली होती,त्याच धोकदायक पात्रात ,त्याच उमेदवाराला घेऊन उतरणे फडणवीसांना भाग पडले होते.यंदा मात्र,चित्र पूर्णपणे पालटले आहे.दटके हे आता शहराध्यक्ष पदापुरते सिमित नसून,भाजपचे विद्यमान आमदार आहेत.याशिवाय मध्य नागपूरसह शहरात देखील बूथ स्तरावरील मोठी फळी त्यांच्याशी एकनिष्ठ आहे,कार्यकर्त्यांची मोठी फौज दटके यांच्या मागे उभी असल्याने,दटके यांची नाराजी पक्षाला पेलवणारी नव्हती.दटके यांना उमेदवारी न दिल्यास,बूथ,मंडळ,पन्ना प्रमुखांसह जमीनीशी जुळलेले हजारो कार्यकर्ते यांनी निवडणूकीवरच ‘बहीष्काराचे‘अस्त्र उगारण्याची ‘शंका’असल्याने,संघाला देखील हा धोका पत्करणे शक्य नव्हते!