संकेत बावणकुळेच्या ऑडीचा पहीला अपघात मानकापूरमध्ये!

या घटनेत किती जण जखमी झालेत,ते कोण होते,कोणत्या रुग्णालयात त्यांना भरती करण्यात आलं,याविषयी देखील पोलिसांकडून त्यांना कोणतीही माहिती मिळाली नसल्याचे अंधारे यांनी सांगितले.ही घटना कोणत्याही प्रिंट आणि इलेक्ट्रोनिक माध्यमांकडे जाणार नाही,याची भरपूर काळजी घेण्यात आली होती.दोन दिवस या घटनेची माहिती दडवण्यात त्यांना यश आले होते,असे त्या म्हणाल्या.

सलमान खान वर्सेस स्टेट तसेच परेरा वर्सेस स्टेट या दोन्ही खटल्यांमध्ये न्यायालयाचे जजमेंट आहे की,एखाद्यी व्यक्ती भले ही ती गाडी चालवत नसेल परंतू तिच्यामुळे तो अपघात झाला आहे,त्याने एखाद्या मद्यपीला गाडी चालवायला दिली असेल तरी देखील तो दोषी आहे.संकेत लाहोरी बारमध्ये ’मसाले दूध’ पिण्यासाठीच गेला असेल,बाकीच्या मित्रांनी मद्य प्यायले असले मात्र,मसाले दूध पिलेल्या संकेतने आपली अडीच कोटीची ऑडीची चावी एका प्रचंड दारु पिणा-याच्या हातात दिली,ही चूक नाही का?एखाद्या कंपनीत एखाद्या कामगाराचा मृत्यू झाला आणि जरी मालक ते यंत्र चालवत नसेल तरी अपघातासाठी कंपनीच्या मालकावर गुन्हा दाखल होतो.या न्यायानुसार संकेत बावणकुळेवर सलमान खान वर्सेस स्टेट खटल्यामध्ये न्यायालयाचे जे जजमेंट आहे ते लागू झाले पाहिजे,अशी मागणी याप्रसंगी अंधारे यांनी केली.

या घटनेत संकेतला अटक केली तरी खूप झाले तर २४ तासात सोडून देण्यात येईल किंवा त्या पूर्वीच त्याला अटकपूर्व जामीन देखील मिळू शकतो मात्र,इथे मुद्दा हा कायदा आणि सुव्यवस्थेचा आहे.संकेत बावणकुळेवर अपघात आणि बेपरवाईने गाडी चालवण्यासाठी का कलम लावली जात नाही आहे?समाजात हा संदेश जातोय की मोठ्या बापांची बिघडलेली औलाद ही गरीबांना कधीही रस्त्यांवर चिरडू शकतात,असे अंधारे म्हणाल्या.संकेत बावणकुळे याचं नाव एफआयआरमध्ये नोंद झाली नाही तर कायदेशीर कारवाई करणार असल्याचा इशारा त्यांनी दिला.

काँग्रेसचे आमदार विकास ठाकरे यांनी तर त्यांच्या मतदार संघात अशी कोणती घटना घडलीच नाही,असे छातीठोकपणे सांगितले.त्यांनाही आपलं मत व्यक्त करायला मंगळवार का उजाडावा लागला?रविवारी रात्री ही घटना घडली,साेमवारी सकाळी किवा सायंकाळी ठाकरे व्यक्त झालेच नाही.मंगळवारी सकाळी ही व्यक्त झाले नाही तर तब्बल ३६ तास विकास ठाकरे यांना या घटनेवर बोलण्यास का लागले?याचे उत्तर आमच्याकडे असल्याचे अंधारे यांनी सांगितले.एकीकडे विकास ठाकरे म्हणतात,मी इथला आहे,मला सगळं माहिती आहे,आम्ही मुंबईत बसून सगळी माहिती गोळा केली आणि महाराष्ट्राच्या जनतेला सांगितली.या मागेे विकास ठाकरे यांचा काय हेतू असेल तो असेल.मात्र,गृहमंत्र्यांच्या शहरात गोरगरीबांना सुरक्षीत जगण्यासाठी पोषक वातावरण नाही अशी परिस्थती भाजपने आज निर्माण केली असल्याचा आरोप त्यांनी केला.

विकास ठाकरेंनी म्हटले आहे की संकेत बावणकुळेंच्या घटनेवरुन नेत्यांनी बोध घ्यावा आणि आपल्या मुलांना या घटनेवरुन बोध घेत सावध करावे.यापेक्षा त्यांनी ‘संस्कार वर्ग’ उघडावे,असा टोला अंधारे यांनी काँग्रेसचे आमदार विकास ठाकरेंवर लगावला.विकास ठाकरेंचा हा सल्ला तसाच आहे जे पुण्याच्या पोर्शे कार प्रकरणामध्ये दोन तरुणाईचा जीव घेणा-या ‘बडे बापच्या औलादीला’ पाच पानांचा निंबध लिहून सोडण्याचा निर्णय झाला होता,मग संकेत बावणकुळेला देखील पाच पानांचा निबंध लिहू द्यावा.निबंध लिहला की संपला विषय.म्हातारी मेल्याचं दूखं नाही मात्र काळ सोकावतोय.अशी जर चुकीची प्रथा पडली तर येत्या काळात ‘हिट ॲण्ड रन’कायद्याला कोणीही जुमानणार नाही,असे त्या म्हणाल्या.

परिमंडल क्र.२ चे उपायुक्त मदने आणि सीताबर्डी पोलिस ठाण्यातील पोलिस निरीक्षक चंद्रकांत चकाटे यांना पंचनामा आणि वैद्यकीय तपासणी या संदर्भात मी काही प्रश्‍न विचारले होते,त्यांनी सांगितले त्यांचा तपास सुरु आहे.त्यामुळेच मी त्यांना विचारले की आता तुम्हाला घटनेतील सहभागी असणा-यांची नावे माहिती झाली असल्याने नावे आणि कलमा आपल्या एफआयआरमध्ये वाढवत का नाही?असा सवाल मी त्यांना केला असता,त्यांनी ‘मौन’बाळगले.कदाचित गृहविभागापेक्षा बावणकुळे यांची ताकत ‘भारी’पडत असेल त्यामुळे संकेत बावणकुळेचं नाव एफआयआरमध्ये घ्यायला आणि कलमा वाढवायला ते नाकारत आहे,असे अंधारे यांनी सांगितले.

सकाळी विमानतळावर पत्रकारांकडून मला ऑफ द रेकॉर्ड कळले, की फिर्यादी जितेंद्र सोनकांबळे आपली तक्रार मागे घेत आहेत.संविधानाच्या सीआरपीसी कायद्याच्या १६९ अन्वये तपासा अंती एबीसीची समरी करुन,तपासा अंती तथ्य आढळून आले असे म्हणत, त्याचा अहवाल सादर करावा लागतो,तर एखादी एफआयआर रद्द होते किंवा ४८२ अन्वये न्यायालयात जाऊन त्याची कायदेशीर प्रक्रिया करावी लागते,नंतर एफआयआर रद्द करण्याची कारवाई केली जाते.या घटनेत ज्या अर्थी फिर्यादीने फिर्याद मागे घेतली असे फक्त तोंडी सांगून एक अफवाह पसरवली जात असल्याचे अंधारे म्हणाल्या.याचा अर्थ जितेंद्र सोनकांबळे या फिर्यादीवर प्रचंड दबाव असल्याचे स्पष्ट दिसून येतंय.जितेंद्र सोनकांबळे हे अनुसूचित जातीमधून येत असून, त्यांच्यावर प्रचंड दबाव आणण्याचा प्रयत्न होत असल्याचे सिद्ध होतं.अजूनही जितेंद्र सोनकांबळे हे माध्यमा समोर आले नाहीत,एका शब्दाने देखील घटनेविषयी बोलले नाहीत,ते कुठल्या दडपणा खाली वावरत आहेत,मला त्यांच्या हिताची जास्त काळजी असल्याचे अंधारे म्हणाल्या.त्यांना पोलिस संरक्षण असलं पाहिजे.त्यांच्या जीवाला संरक्षण मिळालं पाहिजे आणि बावणकुळे म्हणत असतील की तपास निरपेक्ष व्हावा, त्यांना आणि गृहमंत्री देवेंद्र फडणवीस यांना खरंच कायद्याची चाड असेल ,तर त्यांनी डीसीपी मदने यांना आदेश द्यावे की संकेत बावणकुळेचं नाव आरोपीमध्ये सहभागी करा,अजून कलमा वाढवा,हे त्यांना बाेलावं लागेल.

फडणवीस म्हणतात, या घटनेचं राजकारण करु नका,हे त्यांचं नेहमीचं पालूपद आहे.एखाद्या चित्रपटात एखाद्या खलनायकाच्या तोंडी जसा एखाद्या डायलाॅग असतो,तसा एकच डायलॉग घेऊन फडणवीस बसले आहेत.काहीही झालं की,‘राजकारण करु नका,राजकारण करु नका’.फडणवीस हे विसरलेत का की पूजा चव्हाणसारख्या एका अश्राप जीवाच्या अब्रूचं मातेरं उधळणारा तुमचाच पक्ष होता ना?ज्या मंत्र्याचा राजीनामा त्या घटनेसाठी मागितला होता,त्याच मंत्र्याचा मांडीला मांडी लाऊन ते बसत आहेत.  तेव्हा त्या घटनेचं कोणी ‘राजकारण’ कोणी केलं?असा सवाल त्यांनी केला.

काल राष्ट्रीय स्वयंसेवक संघाचे सरसंघसंचालक मोहन भागवत यांनी कोणतीही गरज नसताना शिवस्मारक आणि शिवजयंतीचा वाद उकरुन काढत टिळक-फूले अशी तुलना सुरु केली.जिवंत माणसे तर सोडा तुम्ही महापुरुषांनासुद्धा राजकारण करताना सोडत नाही,खरं तर शिवस्मारक हे टिळकांनी शोधून काढलं नाही,असे सरसंघचालक म्हणाले.असे सांगून टिळकांची उंची आणि कर्तृत्व कमी होत नाही,पण जाणीवपूर्वक टिळकांचे आणि फूल्यांच्या अनुयायांमध्ये सामाजिक आणि जातीय संघर्ष निर्माण करण्याचा प्रयत्न करण्याची सुप्त आणि घाणेरडी ईच्छा ज्यांची आहे,जे  महापुरुषांच्या जीवावर राजकारण करतात,ते सांगतात आम्हाला आम्ही राजकारण करायचं नाही!असा टोला अंधारे यांनी हाणला.

गृहमंत्र्यांच्या नागपूरात आणखी एका तरुणीची हत्या-
रामटेकच्या जंगलामध्ये २४ वर्षीय तरुणीचा मृतदेह सापडला.तिची हत्या करुन तिचा मृतदेह पुरण्यात आला.प्रिया बागडे असे त्या तरुणीचे नाव आहे.या ही प्रकरणात गाडीची नंबर प्लेट बदलण्यात आली होती.खरं तर पुरावे नष्ट करण्याचा प्रयत्न म्हणून त्या दिवशी कर्तव्यावर असणा-या पोलिसांना देखील सहअारोपीच केले पाहिजे.सहआरोपी पोलिसांवरच गुन्हे दाखल झाले पाहिजे.गृहमंत्र्याचा राजीनामा तरी देखील आम्ही मागणार नाही,देऊच नका राजीनामा,आणखी पाच-पन्नास हत्याकांड घडल्यावरही तुम्हाला काय फरक पडणार आहे?बदलापूरात तुम्ही काय केलं ते सगळ्या जगाला माहिती आहे,अशी टिका यावेळी अंधारे यांनी केली.

पोलिसांची अपहरणाची ‘थ्योरी’-
संकेतने,मानकापूर परिसरात ऑडी थांबविल्याने पोलो(एमएच ०२ सीएच ७७६५)कारने मोहम्मद फैजान व त्याचे दोन साथीदार घटनास्थळी आले.त्यांनी अर्जून व रोनितला बाहेर काढले.पोलोत दोघांना डांबून तहसील पोलिस ठाण्याच्या हद्दीतील टिमकीत घेऊन गेले.याच दरम्यान अर्जुनने पत्नीला मोबाईलवर लोकेशन पाठवून घटनेची माहिती दिली.तिघांनी टिमकीत रोनित व अर्जुनला मारहाण केली.त्याच्याकडील सोनसाखळी व सोन्याचे ब्रेसलेट ही हिसकावले.लाईव्ह लोकेशनच्या अाधारे तहसील पोलिस टिमकीत पोहोचले.अर्जुन व रोनितची सुटका केली,असे पोलिसांनी पत्रकार परिषदेत सांगितले मात्र,अपहरण व मारहाण करणा-या मोहम्मद फैजान व त्याच्या दोन साथीदारांविरुद्ध पोलिसांनी एफआयआर नोंदवली नाही.या घटनेकडे अंधारे यांचे लक्ष वेधले असता,पोलिसच ही घटना पत्रकार परिषद घेऊन सांगतात आणि पोलिसच त्या घटनेची एफआयआर नोंदवत नाहीत,त्यावर बोलत नाही याचा अर्थ पोलिसांसाठी ‘कूछ राज अच्छे होते है‘त्यांना काही रहस्य हे रहस्य ठेवायचे असतील,कदाचित पुढे पोलिसांकडून अजून काही रहस्य येऊ शकतात,असा उपरोधिक टोला अंधारे यांनी हाणला.

……………………………………………

तळटीप-
साहेबांचा फोन आला आणि…
सीताबर्डीचे पोलिस निरीक्षक चंद्रकांत चकाटे हे सुषमा अंधारे यांच्या प्रश्‍नांना उत्तर देत असताना इलेक्ट्रॉनिक मिडीया ते लाईव्ह दाखवत होते.काही काळानंतर चकाटे यांना एक फोन आला.स्क्रीनवर पोलिस आयुक्त डॉ.रविंद्र सिंघल यांचा नंबर बघताच,अंधारे यांना आयुक्त साहेबांचा फोन आहे,असे सांगून चकाटे हे ’हो साहेब,हो साहेब’म्हणू लागले.यानंतर लगेच मिडीयाकर्मींना बाहेर जाण्याचा आदेश चकाटे यांनी दिला.सुषमा अंधारे यांना जे काही विचारायचे आहे ते त्या बाहेर गेल्यावर विचारा,असे चकाटे म्हणाले व त्यांच्या कक्षातील मिडीयाकर्मी बाहेर पडले.मात्र,अंधारे व चकाटे यांचा प्रश्‍नोत्तराचा क्लास संपूर्ण महाराष्ट्र डोळे लाऊन बघत असतानाच,साहेबांचा फोन खणाणला.संपूर्ण प्रादेशिक वृत्त वाहीन्यांवरील हे दृष्य बघून,त्या ‘साहेबांना’ कोणत्या ‘साहेबांचा’फोन आला?यावर माध्यमकर्मींमध्ये चांगलीच चर्चा झडली.
…………………..