औरंगाबाद: राज्यात करोनाचा प्रादुर्भाव वाढत असताना तसेच संपूर्ण आरोग्य यंत्रणा अहोरात्र सेवा देत असताना जिल्हा आरोग्य अधिकारी डॉ. अमोल गीते यांच्या कारमध्ये मोठ्या प्रमाणात रोकड व मद्यसाठा आढळल्याने खळबळ उडाली आहे. जालना पोलिसांनी गीते यांना ताब्यात घेतले आहे.
शनिवारी दुपारी अमोल गीते शासकीय वाहनातून जालन्याला जात होते. त्यांची गाडी वरुडी चेकपोस्टवर अडवून तपासल्यानंतर त्यात सहा लाखांहून अधिक रोकड तसेच मद्याच्या बाटल्या आढळून आल्या. गीतेंची सध्या चौकशी सुरु आहे. करोनाच्या पार्श्वभूमीवर राज्यातील आरोग्य यंत्रणा सतर्क असताना रेड झोनमध्ये असलेले जिल्हा आरोग्य अधिकारी जिल्हा सोडून कसे काय निघाले होते, याविषयी पोलिस चौकशी करत आहेत.
कोरोनाचा प्रादुर्भाव रोखण्यासाठी रेडझोनमधून येणाऱ्या वाहने व व्यक्तीला जिल्हा पोलीस प्रशासनाने सीमाबंदी केली असून, तिची काटेकोर अंमलबजावणी करण्यात येत आहे. असे असताना डॉ. अमोल गीते हे आज औरंगाबादहून त्यांच्या मूळगावी त्यांच्या खासगी महाराष्ट्र शासन लिहिलेल्या कारमधून बुलडाणा जिल्ह्यात लोणारकडे निघाले होते. जालना जिल्ह्याच्या सीमेवर वरुडीनाक्यावर त्यांची गाडी पोलिसांनी अडवून तिची तपासणी केली. यावेळी गाडीत रोख ६ लाख ७० हजार रुपये, ६ हजार रुपये किंमतीची दारू आढळून आली.
रोख रक्कम, दारू व ६ लाख रुपये किंमतीची कार, असा एकूण १२ लाख ७६ हजार रुपयांचा ऐवज पोलिसांनी जप्त केला आहे. याप्रकरणी बदनापूर पोलिसांनी डॉ. अमोल गीते यांच्याविरुद्ध राष्ट्रीय आपत्ती व्यवस्थापन कायदा २००५चे कलम ५१ (ब), महाराष्ट्र दारूबंदी कायद्याच्या ६५ (अ) (ई) आणि भा. दं. वि. १८८ कलमान्वये गुन्हा दाखल केला आहे. पोलीस निरीक्षक मारोती खेडकर यांच्यासह कर्मचाऱ्यांनी ही कारवाई केली.
आमचे चॅनल subscribe करा
