सोलेंसाठी भाजप लागली कामाला!

ती निवडणूक ‘ब्राम्हण विरुद्ध ओबीसी’अशीच रंगली होती किंबहूना रंगविण्यात आली होती.गडकरी व त्यानंतर अनिल सोले नागपूर पदवीधर मतदारसंघाचे प्रतिनिधित्व करीत असे पर्यंत कधीही असा ‘जातीयवाद’पदवीधर निवडणूकीत रंगला नाही,हे विशेष.२०२० च्या पदवीधर निवडणूकीत मात्र ओबीसी लढ्याचा नारा देत काँग्रेसच्या सर्व आमदार व नेत्यांनी गटातटाचे राजकारण विसरुन ॲड.अभिजित वंजारी यांच्या मागे आपले बळ उभे केले होते.सहा ही जिल्ह्यातील ओबीसींच्या विविध संघटना यांचे ही समर्थन वंजारी यांच्या मागे उभे झाले व त्याचा परिणाम वंजारी हे १८ हजार ९१० मताधिक्यानी विजयी झाले.वंजारी यांना ६१ हजार ७०१ मते तर संदीप जोशी यांना ४२ हजार ७९१ मते मिळाली होती.

यंदा काँग्रेसनी पुन्हा वंजारी यांना रिंगणात उतरवले असून भाजपने कुणबी असलेले सुधाकर कोहळे यांना उमेदवारी दिली. त्यामुळे यंदाची निवडणूक ही ओबीसींमध्येच रंगणार असून यात ‘तेली विरुद्ध कुणबी’हा फॅक्टर ही महत्वाचा असल्याचे बोलले जात आहे.त्यामुळेच बंडखोर अनिल सोले यांना मोठ्या प्रमाणात दुस-या क्रमांकाची पसंदीची मते मिळणार असल्याचा कयास लावला जात असून, यंदा देखील वंजारी हे बाजी मारणार असल्याचे बोलले जात आहे.वंजारी यांनी देखील आज आपला उमेदवारी अर्ज दाखल केला असून यावेळी स्वत: काँग्रेसचे प्रदेशाध्यक्ष हर्षवर्धन सपकाळ यांच्यासह पश्‍चिम नागपूरचे काँग्रेसचे आमदार विकास ठाकरे, आमदार विजय वडेट्टीवार,माजी आमदार सुनील केदार,खासदार बर्वे,शहराध्यक्ष प्रफूल्ल गुडधे,अतुल लोंढे,बंटी शेळके,अशोक धवड,राजेंद्र मुळक आदी विविध गटातटाचे नेते वंजारी यांच्यासोबत पुन्हा एकदा २०२० प्रमाणेच दिसून पडले.

ही निवडणूक पक्षाच्या चिन्हावर लढवली जात नसून बॅलेट पेपरवर होत असल्याने अतिशय चुरशीची ठरते.पहील्या क्रमांकाच्या पसंदीची ठराविक मते मिळताच,इतर उमेदवार बाद होतात.त्यामुळे कोहळे किंवा वंजारी यांच्याकडून किती लाख नवे मतदार नोंदणीकृत केले याचा महत्व नसून पहिल्या क्रमांकाच्या पसंदीची मते घेणारा सहज विजयी होतो.आता मध्य नागपूर,पूर्व नागपूर,दक्षिण नागपूर,भाजपप्रणित शिक्षक मंच असो किंवा नुकतेच विधान परिषदेवर गेलेले दोन्ही आमदार,चंद्रपूर,गडचिरोलीतील भाजपचे कद्दावर नेते,आमदार,माजी खासदार तसेच नगरसेवक, कोहळे यांच्या मागे पक्षादेश मानून किती जोर लावतात हे २७ ऑक्टाेबर रोजी होणा-या मतमोजणीतून दिसून पडेलच.मात्र,‘सोलेंसाठी भाजप लागली कामाला’ही चर्चा आताच ऐकू येत आहे.मतमोजणीत कोहळे हे चौथ्या क्रमांकावर राहतील असा दावा देखील केला जात आहे.वर्धाचे खदखद फेम प्रा.नीतेश कराळे मास्तर हे तिस-या क्रमांकाची मते खेचतील असा अंदाज आहे.आज कराळे मास्तरांसोबत उमेदवारी अर्ज भरताना पदवीधर असलेले सर्वाधिक समर्थक दिसून पडले.

दुसरीकडे माध्यमांना प्रतिक्रिया देताना प्रा.सोले यांनी मुख्यमंत्री असो,बावणकुळे असो किंवा इतर कोणीही असो,कोणाच्याही आवाहनावर उमेदवारी अर्ज मागे घेणार नाही,असे ठामपणे सांगितले.उमेदवारी अर्ज मागे घेण्यासाठी भरला नसल्याचे ते म्हणाले.पदवीधरांचा आमदार असताना पर्यावरणापासून तर शिक्षक,पदवीधरांसाठी केलेली कामे याचा पाढाच त्यांनी वाचला.समर्थकांचा मोठा जल्लोष त्यांच्यासाठी विभागीय आयुक्त कार्यालयाच्या परिसरात उमटला.गगनभेदी नारे व घोषणा सोले यांच्या आत्मविश्‍वासाची व त्यांच्या मागे उभ्या असलेल्या भक्कम राजकीय पाठिंब्याची साक्ष देत होते.

दुसरीकडे कोहळे यांच्यासोबत उमेदवारी अर्ज भरताना बावणकुळे व रामटेकचे आमदार आशिष जयसवाल व ‘सोबत’ करणारे आमदार प्रवीण दटके यांच्याशिवाय कोणीही उपस्थित नव्हते. राज्यात दुष्काळाचे तांडव व तीव्र पाणीटंचाईच्या पार्श्वभूमीवर रॅली न काढता कार्यकर्त्यांना स्वागत लॉन्सवरील निवडणूक सभे नंतर परत पाठविण्यात आल्याचे बावणकुळे यांनी सांगितले.मात्र,त्यांच्या रॅलीत किती पदवीधर नगरसेवक किंवा ग्रामपंचायत,नगरपरिषद सदस्य होते?असा सवाल देखील परिसरात उमटला.स्वागत लॉन्समध्ये सर्वाधिक उपस्थिती बावणकुळेंच्या ग्रामीण भागातील कार्यकर्त्यांची होती,हे विशेष.

थोडक्यात,नागपूर पदवीधरची ही निवडणूक ‘काँग्रेस विरुद्ध भाजप’न राहता पुन्हा एकदा ‘भाजप विरुद्ध भाजप’झाल्याची दिसून पडतेय.यात ही ‘जुने निष्ठावान विरुद्ध नवीन भाजपवाले’अशी ती रंगणार आहे.बॅलेट पेपरवर होणा-या या निवडणूकीत भाजप निष्ठावानांचे तसेच कोहळेंच्या विरोधकांचे मत सोले यांच्या नावा पुढे नोंदवले जाणार असल्याची चर्चा आहे.ही निवडणूक बावणकुळे यांच्या ही पुढील ‘महत्वाकांक्षी’ राजकीय वाटचालीची दिशा ठरविणार असल्याची चर्चा आहे.

(बातमीशी संबंधित व्हिडीयोज sattadheesh official युट्यूब चॅनलवर उपलब्ध)
…………………………………………….