डूबतं नागपूर…..

नागपूर,ता.१७ जुलै २०२५: महाराष्ट्राच्या उपराजधानीत अवघ्या चार दिवसांची रजा घेऊन पाऊस हा आज दूपारी बारा वाजताच्या सुमारास फक्त अर्धा तास बरसला परंतु,पुन्हा एकदा शहरातील अनेक भागात,चौका-चौकात,भुयारी मार्गांमध्ये पाणी तुंबले आणि समाज माध्यमांवर पुन्हा एकदा ‘डूबतं नागपूरचं’कवित्व जागृत झालं.‘उडता पंजाब’सारखेच ‘डूबतं नागपूर’ आता नागपूरकरांच्या काळजीचा,घराघरात पाणी शिरण्याचा,मालमत्तेच्या हानिच्या,शहरातील राजकारण्यांच्या नावाने शिमगा करण्याचा प्रघात झाला आहे.

आजच्या मुसळाधार पावसाने उत्तर नागपूरात दमदार कोसळून त्या भागातील नागरिकांची चांगलीच नाराजी ओढवून घेतली.या ही भागात सिमेंट-काँक्रिटच्या रस्त्यांचे ‘नियोजनपूर्ण(शून्य)जाळे विणल्या गेल्याने नागरिकांची घरे दोन फूटांपर्यंत खाली गेली. याही भागात  विकास संस्था,बुद्धीमान अभियंते आणि अतिशय प्रामाणिकपणे काम करणारे कंत्राटदारांनी सिमेंट काँक्रिटचे रस्ते निर्माण करताना पावसाळी वाहिन्या न बांधण्याची पुरेपूर काळजी घेतल्याने,अवघ्या अर्धा तासांचाही पाऊस या भागाला पाण्यात तुंबवण्यासाठी पुरेसा ठरला.या भागातील सिमेंट काँक्रिटचे रस्ते नेमके कोणी बांधले?आता पूर पिडीत नागरिक याचा शोध घेत आहेत.आज रेल्वे स्टेशनजवळील रस्त्याला तर ’समुद्रच’ म्हणायची वेळ आली होती!

संपूर्ण देशात नागपूर हे एकमेव असे शहर आहे ज्या शहरात,नागपूर महानगरपालिका,नागपूर सुधार प्रन्यास,महामेट्रो,साार्वजनिक बांधकाम विभाग,याशिवाय नागपूरचे खासदार व केंद्रीय मंत्री नितीन गडकरी यांचा विभाग असलेला राष्ट्रीय महामार्ग प्राधिकरण यांच्यामार्फत शहरभर सिमेंट काँक्रीटच्या रस्त्यांचे जाळे विणल्या जात आहेत तसेच या रस्त्यांच्या देखभालीची जबाबदारीही ‘नैतिक व कायदेशीररित्या’याच विकास संस्थांकडे आहे मात्र,वरील पैकी एकाही संस्थेने नागपूर शहरात जवळपास ३ हजार ५४९ किलोमीटरचे सिमेंट काँक्रीटच्या रस्त्यांचे जाळे विणताना या रस्त्यांलगत पावसाचे पाणी वाहून जाण्यासाठी पावसाळी वाहिन्याच बांधण्याची ’कल्पकता आणि सौजन्य’दाखवले नाही.

नुकतेच ९ जुलैला शहरात मुसळाधार पावसाने संपूर्ण शहराचीच भीषण अवस्था करुन ठेवली.स्वत: गडकरी यांनी या संदर्भात चिंता व्यक्त करुन स्पॉटनुसार अभ्यास करण्याचे तसेच आठ दिवसांत अहवाल सादर करण्याचे निर्देश प्रशासनाला दिले.गडकरी यांनी १२ जुलै रोजीच्या बैठकीत दिलेली मुदत संपली नसतानाच ,पावसाने आज उत्तर नागपूरात पाणी तुंबवून नेते व प्रशासनाला चांगलाच ‘इशारा’ दिला.उत्तर नागपूरात कमाल चौकाला नदीचे स्वरुप लाभले होते तसेच इंदोरा,कावरा पेठ,परदेसी मोहल्ला तसेच सदरच्या काही भागात पाणी तुंबले.आज देखील या भागातील सखल वस्त्यांमध्ये पाणी शिरुन नागरिकांच्या घरातील सामानाचे,अन्न धान्याचे,मालमत्तेचे नुकसान झाले.दूचाकी व चारचाक्या देखील पाण्यात तरंगत असतानाचे दृष्य सर्वदूर होते.महत्वाचे म्हणजे गडकरी यांची नागपूर तुंबण्यावरील बैठक ही देखील सदर येथील नियोजन भवनात,शहरातील नियोजनशून्य राजकीय व प्रशासकीय कारभारावर होती!बैठकीत नागपूरचे पालकमंत्री व राज्याचे महसूल मंत्री चंद्रशेखर बावणकुळे यांच्यासह भाजपचे आमदार कृष्णा खोपडे,आ.प्रवीण दटके,आमदार चरणसिंग ठाकूर,जिल्हाधिकारी डॉ.विपीन इटनकर,मनपा आयुक्त डॉ.अभिजित चौधरी,नासुप्रचे सभापती संजय मीणा ,राष्ट्रीय महामार्ग प्राधिकरण,सार्वजनिक बांधकाम विभाग,महामेट्रो तसेच संबंधित खात्याचे अधिकारी उपस्थित होते.