महिला दिवस…मानसिकता आणि बरेच काही

महिला दिवस जगभरात साजरा होत असताना देखील तिसरी मुलगी जन्माला आल्याने पतीने पत्नीलाच जाळून मारल्याची घटना घडली…परभणी शहरात गंगाखेड नाका परिसरात मैना कुंडलिक काळे या महिलेला तिसरीही मुलगी झाल्याने कुंडलिकने रागाच्या भरात मैना हिच्या अंगावर पेट्रोल टाकून जाळले…..!ही घटना २७ डिसेंबर २०२४ रोजी घडली.

त्यामुळेच प्रश्‍न पडतो ती कुठे सुरक्षीत आहे?घर,शाळा,महाविद्यालय,आश्रमशाळा,पोलिस ठाणे,खासगी,सरकारी आस्थापने..अगदी महाकुंभात देखील तिच्या आस्थेचे धिंधवडे सोशल मिडीयावर काढले गेले,पैसा कमावला गेला.शिराळा तालुक्यातील चिखली गावातील २० वर्षीय प्रांज राजेंद्र पाटील या युट्यूबरने प्रयागराजमध्ये स्नान करणा-या हजारो महिलांचे छूपे चित्रिकरण केले.ते सोशल मिडीयावर व्हायरल केले.आंबटशौकिनांसह विविध चॅनल्सलाही विकले. २१ फेब्रुवरी २०२५ रोजी तीन आरोपींना महाराष्ट्र पोलिसांनी अहमदाबाद पोलिसांच्या स्वाधीन केले.

मल्याळम सिनेसृष्टिला हादरवून सोडणा-या अभिनेत्रींच्या लैंगिक शोषनावर प्रकाश टाकणा-या न्यायमूर्ती हेमा समितीचा तपशील उघड झाल्यावर मल्याळी चित्रपटसृष्टितील अनेक दिग्गजांना  राजीनामा द्यावा लागला.केरळ चित्र अकादमीचे अध्यक्ष रंजित आणि ‘अम्मा’चे सरचिटणीस टी.सिद्दीक यात अग्रेसर होते. टेस जोस ,अभिनेत्री दिव्या गोपीनाथ,सोनिया मल्हार आदींनी या अन्यायाविरोधात आवाज उठवला होता.हेमा समितीच्या ३६५ पानांच्या अहवालात अनेक धक्कादायक बाबींचा उलगडा झाला होता.मल्याळम सिनेसृष्टिवर केवळ १० ते १५ निर्माते आणि दिग्दर्शक संपूर्ण वर्चस्व ठेऊन असल्याचे सांगत वेगवेगळ्या पातळ्यांवर महिला कलाकारांचे कशारितीने सुनियोजित पद्धतीने लैंगिक शोषण होतो हे वास्तव त्या अहवालातून सामोरे आले.एका नाट्यअभिनेत्रीचा विनयभंग या विषयाभोवती फिरणा-या ‘अट्टम‘या मल्याळी चित्रपटास ‘राष्ट्रीय’पुरस्कार मिळाला आणि त्यानंतर तीनच दिवसांत त्याच मल्याळी चित्रपटसृष्टितील कृष्णकृत्यांचा पाढा जगासमोर आला!२०१७ मध्ये एका मल्याळी अभिनेत्रीचे झालेले अपहरण व तिच्यावरील लैंगिक अत्याचार यामुळे मल्याही चित्रपटसृष्टि हादरली होती.त्यानंतर मल्याळी चित्रपटसृष्टितील अभिनेत्रींना मिळणा-या वागणुकीबाबतच्या तक्रारींना वाचा फुटली व याचा तपास करण्याची जबाबदारी उच्च न्यायालयाच्या निवृत्त न्यायमूर्ती के.हेमा  यांच्यावर सोपवण्यात आली होती.राजकीय नेते व चित्रपटसृष्टी यांचे ही मधूर संबंध या निमित्ताने चव्हाठ्यावर आले.याच प्रकरणामध्ये मल्याळी अभिनेते व मार्क्सवादी कम्यूनिस्ट पक्षाचे कोल्लम मधील आमदार के.मुकेश आणि जयसूर्य यांच्या विरोधात गुन्हे दाखल झाले.कन्नड अभिनेता दर्शन याला देखील तुरुंगवास घडला.

न्या.हेमा समितीच्या या अहवालामुळे भारतीय सिनेसृष्टितील २०१७ मधील ‘Me Too’च्या चळवळीच्या आठवणी ताज्या झाल्या…!कितीतरी ‘महान’अभिनेत्यांचे,निर्माते,दिग्दर्शकांचे,लेखक,राजकीय नेते यांचे पाय किती खोलात होते हे वास्तव समोर आलं होतं.

देशाची राजधानी दिल्लीत‘ ईवाय‘या बहूराष्ट्रीय कंपनीतील कर्मचारी ॲना सबेस्टियन पेरायिल हिचा मृत्यू असुरक्षीत आणि कामाच्या ठिकाणी शोषणकारी वातावरणामुळे झाल्याचा आरोप झाला होता.‘ईवाय’ची सदस्य कंपनी एस.आर.बाटलीबोईमध्ये २६ वर्षाची ॲना अकांऊटंट म्हणून काम करीत होती.कामाच्या अति ताणामुळे तिचा मृत्यू झालाचा आरोप झाला होता.मात्र,देशाच्या अर्थमंत्री निर्मला सीतारमण यांनी या घटनेवर ’कामाचा ताण सहन करण्याची आंतरिक शक्ती नाेकरदाराकडे असायला हवी,अध्यात्मानेच ती प्राप्त होते’असे विधान केले होते.त्यावर टिका झाल्यावर सीतारमण यांना खुलासा करावा लागला होता. मूळात अवघ्या २६ सा व्या वर्षी आंतरिक शक्ती,अध्यात्म समजण्या इतपत ॲनाची मानसिक स्थिती सक्षम होती का…!