मारेक-यांमधील राजकीय आत्मविश्‍वासाचे आणखी किती बळी?

नागपूर,ता.९ जानेवरी २०२५: राज्यभर गाजत असलेल्या मस्साजोग(ता.केज)गावातील सरपंच संतोष देशमुख यांचे अपहरण करुन र्निघृण हत्या झाली ,संपूर्ण माणुसकीची मान शरमेने खाली घालणा-या त्या घटनेला आज एक महिना झाला.९ डिसेंबर रोजी दुपारी राजकीय पाठबळावर मस्तावलेल्या सहा गावगुंडांनी सरपंच संतोष देशमुख यांना घेरुन मारले ती हीच ९ तारीख होती.जिवितासाठी गयावया करणा-या आणि वेदनेने विव्हळणा-या संतोष देशमुखांना या सहाही ‘राजकीय‘गावगुंडांनी ज्या पद्धतीने संपविले,निपचित पडल्यानंतर त्यांच्या छातीवर पाय देऊन नाचले,त्याचे चलचित्रण केले,आपल्या ‘आका’ला दाखवले,ते सर्व राज्याचे गृहमंत्री पद सांभाळणा-या मुख्यमंत्र्यांचेच अपयश नाही का?असा सवाल अवघा महाराष्ट्र आता करतो आहे.

मस्साजोग गावाच्या पांदण रस्त्यावरुन आता ‘आका’चा वाद दिल्लीला पोहोचला आहे.संपूर्ण महाराष्ट्र हा उपमुख्यमंत्री अजित पवारचे खास असणारे धनंजय मुंडे यांचा अप्रत्यक्ष सहभाग या क्रोर्याच्या घटनेत उघड्या डोळ्याने बघत असताना,आरोप सिद्ध हाेत नाही तोपर्यंत मुंडे मंत्रीपदाचा राजीनामा देणार नसल्याची वलग्ना महाराष्ट्रासारख्या ‘सुसंस्कृत‘म्हणवणा-या राज्याचे उपमुख्यमंत्रीच करीत असेल तर,आज पुण्यातील कायदा-सुव्यवस्थेला घेऊन तेथील पोलिस आयुक्तांना कानपिचक्या देण्याचा त्यांना नैतिक अधिकार उरतो का?हा मोलाचा प्रश्‍न आहे,कारण पुणे आणि बिड हे दोन्ही महाराष्ट्राचेच भाग असून गुन्हेगारीत याचे वर्गीकरण होऊ शकत नाही.

दिल्लीला गृहमंत्री अमित शहा यांना सहकार,साखरेचे भाव वाढवणे,निर्यात धोरण इत्यादी बाबींसाठी भेटलो,अशी कितीही कारणे अजित पवार यांनी माध्यमांना दिली असली तरी ते धनंजय मुंडे यांचे मंत्री पद वाचवण्यासाठीच दिल्लीला गेले असल्याचा आरोप, समाज माध्यमांवर मोठ्या प्रमाणात होत आहे.शरद पवार यांचा पक्ष फोडून वेगळे निघालेल्या अजित पवार यांच्यासोबत ठामपणे उभे राहण्याची बक्षीसी या स्वरुपात धनंजय मुंडे यांना मिळत असल्याचे बोलले जात आहे.या ही पलीकडे मुंडे यांच्या अंतर्गत वर्तुळात व अंतरंगात वावरणारा खंडणीबाज गुंड, वाल्मीकी कराड याच्या शंभर कोटींपेक्षाही अधिक, गडगंज संपत्तीची यादी ज्याप्रमाणे भाजपचे आमदार सुरेश धस यांनी आज वाचून दाखवली ते बघता, कराड यांच्या संपत्तीत राष्ट्रवादी काँग्रेसच्या आणखी कोणत्या नेत्याचा किती वाटा आहे?ज्यामुळे संपूर्ण महाराष्ट्र धनंजय मुंडे याचा राजीनामा मागत असतानाही त्यांना पाठीशी घालण्याचे काम होत आहे!असा प्रश्‍न निर्माण होतो.‘गिळता ही येत नाही,थूंकता ही येत नाही’,अशीच काहीशी अवस्था उपमुख्यमंत्री अजित पवार यांची झालेली आढळते.

ग्रामीण भागात ठेकेदार,शहरी भागात रिअल इस्टेट आणि बिल्डर राजकारण्यांच्या हातात हात घालून गडगंज माया कमावतात आहे.हल्ली विधान सभेची निवडणूक लढायची असल्यास एका मतदारसंघात किमान ५० कोटींपेक्षा जास्त खर्च पक्षाला करावा लागत असतो.वाल्मीकी कराडची मस्साजोगमधील ‘अवादा’कंपनीकडूनची दोन कोटींची वसुली ही याच हेतूने त्याचे आका धनंजय मुंडे यांच्यासाठी किवा त्याही पलीकडे ‘आका चे आका’यांच्यासाठी होती का?याचा शोध गृहमंत्री व राज्याचे मुख्यमंत्री देवेंद्र फडणवीस यांनी गठीत केलेली कोणती एसआयटी करेल?त्यामुळेच गेल्या एक महिन्यापासून सरपंच संतोष देशमुख यांच्या कुटूंबियांच्या डोळ्यातील न थांबणा-या अश्रूंच्या धारांना या सरकारकडून न्याय मिळेल,याची शाश्‍वती नाही. पाणी कुठं मुरतंय, हे संपूर्ण महाराष्ट्राला माहिती आहे,राजकारणाचे गुन्हेगारीकरण ही नित्याची बाब झाली असून ,त्या ही पुढे फक्त दोन कोटींसाठी राजकारणाचे क्रोर्यकरण झालेले ही घटना सिद्ध करते.

सरपंच संतोष देशमुख यांच्या घरी उपमुख्यमंत्री अजित पवार गेले होते त्या वेळी न्यायाची अपेक्षा वाढली होती मात्र,जे दोषी असतील त्यांच्यावर कारवाई होईलच,अशी मखलाशी करुन ते मस्साजोगमधून चालते झाले.गावगुंड ते थेट राजकारणी मंत्री…खरा दोषी कोण हे कोण सिद्ध करेल? गृहमंत्र्यांची पोलिस यंत्रणा?ज्यांनी ५ मई २०२४ रोजीच या गुंडगिरी व खंडणीसाठी अवादा कंपनीचे व्यवस्थापक यांचे अपहरण करुन दमदाटी दिली असल्याच्या तक्रारीवर काहीच केले नाही,६ डिसेंबर रोजी हाच सुदर्शन घुले व इतर आरोपी अवादा कंपनीच्या दलित सुरक्षा रक्षकाला मारहाण करीत असताना संतोष देशमुख यांनी त्याच्यासाठी धाव घेतली.सुदर्शन घुले,विष्णु चाटे,सुधीर सांगळे,कृष्णा आंधळे,प्रतीक घुलेे,जयराम चाटे व महेश केदार सारख्या नराधमांशी पंगा घेतला.त्यांनी सरपंच संतोष यांना झापड मारल्यामुळे त्यांनीही या गुंडांच्या दोन थोबाडीत दिल्या.यानंतर ९ डिसेंबर रोजी सरपंचाला गॅसचा पाईप,त्यावर काळ्या करदोड्याने तयार केलेली मूठ,पाच क्लच वायर बसवलेला लोखंडी पाईप,लाकडी दांड्याला लोखंडी तारेचा दांडा,चार लोखंडी रॉड,लोखंडी फायटर,कत्ती तसेच तलवारसदृश शास्त्रांनी मारा करुन,शरीराचा प्रत्येक भाग सोलून काढून संतोष देशमुखांचा जीव घेण्यात आला!शवविच्छेदन करणा-या डॉक्टरांचाही आत्मा भयकंपित व्हावा,इतके क्रोर्य संतोष देशमुखांसोबत घडले.बेदम मारल्यानंतर आरोपींनी त्यांच्या छातीवर उड्या मारल्याची चित्रफित्र ही काय दर्शवते?विशेष तपास पथकाद्वारे आरोपी सुदर्शन घुले व सुधीर सांगोळे यांना अटकेनंतर न्यायालयात हजर करताना त्यांच्या चेह-यावर भीतीचा लवलेश ही नव्हता,त्यांना त्यांच्या कृत्याचा पश्‍चाताप ही नव्हता,त्यांचा हा बेखौफपणा,पोलिसी यंत्रणेचे व पर्यायाने गृहमंत्रालयाचे अपयश नाही का?