विधान परिषद निवडणूक निकाल ‘रिर्टन्स‘

नागपूर,ता. १२ जुलै २०२४:राज्यातील  विधान परिषदेच्या ११ जागांसाठी आज झालेली लढत ही चुरशीची न होता महायुतीसाठी ‘सहज ’झाली व त्यांचे ९ उमेदवार पहील्याच क्रमांकाच्या पसंदीची मते घेत दणदणीत विजयी झाले.यावेळी संपूर्ण महाराष्ट्राचे लक्ष हे, पराभूत होणारे १२ वे उमेदवार कोणत्या पक्षातील व कोण राहील?याकडे लागले होते.सर्वच राजकीय पक्षांनी आपल्या आमदारांना अर्थातच या वेळी देखील ’काय हाटेल,काय बडदास्त,काय मज्जा’अश्‍या पंचतारांकित वातावरणात ठेवले असले, तरी विधीमंडळाचे अधिवेशन सुरु असल्याने तिथेच ‘गुजगोष्टी’ठरल्या आणि काँग्रेसची तब्बल ८ मते फूटून शरद पवार यांचे व महाविकासआघाडी समर्थित  शेकापचे जयंत पाटील यांना पराभवाचे तोंड बघावे लागले.इतकंच नव्हे तर काँग्रेसच्या फोडाफोडी झालेल्या मतांमुळे उद्धव बाळासाहेब ठाकरे यांचे उमेदवार मिलिंद नार्वेकर यांना पहील्या क्रमांकाच्या मतमोजणीत  २२ मतांवर अडकून राहावे लागले व दूस-या क्रमांकाच्या पसंतीच्या मतमोजणीत विजयी व्हावे लागले.या निवडणूकीत मतांचा कोटा हा २३(प्रत्येक उमेदवार)होता.

अर्थातच हा निकाल २०२२ च्या जून महिन्यातील निकालाचे ‘रिर्टन्स’(पुर्नरावृत्ती)ठरली.२० जून २०२२ रोजी राज्यसभा निवडणूकीच्या पाठोपाठ पार पडलेल्या विधान परिषदेच्या लढतीत भारतीय जनता पक्षाचे चानाक्ष रणनीतीकार,माजी मुख्यमंत्री व तत्कालीन विरोधी पक्ष नेते देवेंद्र फडणवीस यांनी आपली पाचवी जागा देखील लीलया जिंकून आणली व आघाडीला जबरदस्त धक्का दिला होता.

भाजपनचे प्रवीण दरेकर,राम शिंदे,श्रीकांत भारतीय,उमा खापरे आणि प्रसाद लाड हे पाचही उमेदवार विजयी झाले होते ,तर शिवसेनेचे सचिन अहिर व आयशा पाडवी व राष्ट्रवादीचे रामराजे निंबाळकर व एकनाथ खडसे विजयी झाले होते.या निवडणूकीत काँग्रेसने संख्याबळ नसतानाही आपले दोन्ही उमेदवार कायम ठेवले होते.यात भाई जगताप व चंद्रकांत हंडोरे यांच्या पैकी भाई जगताप विजयी झाले होते तर हंडोरे यांचा पराभव झाला होता.काँग्रेसचे ते पहिल्या क्रमांकाचे उमेदवार होते,परिणामी काँग्रेसवर त्यावेळी नामुष्कीची वेळ आली होती.आघाडीची जवळपास २० मते खेचून विरोधी पक्ष नेते देवेंद्र फडणवीस यांनी विधान परिषदेत राज्यसभा पाठोपाठ चमत्कार घडवून आणला होता.

विधान परिषदेच्या त्या रणसंग्रामात भाजप १०६,शिवसेना ५५,राष्ट्रवादी ५३ तर काँग्रेसकडे ४४ आमदार होते.विधान परिषदेच्या १० जागांसाठी तेव्हा ११ उमेदवार रिंगणात होते.परिणामी, दहाव्या जागेवरील उमेदवार निवडून आणण्यासाठी आमदारांची फोडाफोडी आणि घोडेबाजार झाल्याचा त्यावेळी देखील आरोप झाला होता.२० जून रोजी सकाळी ९ वा.पासून विधानभवनात मतदानाला सुरवात झाली होती.राज्यसभा निवडणूकीप्रमाणेच भाजपचे आमदार सर्वप्रथम मतदानासाठी विधानभवनात पोहोचले होते.त्यानंतर काँग्रेस व राष्ट्रवादीचे आमदार टप्प्याटप्प्याने विधानभवनात दाखल झाले.शिवसेनेचे आमदार सर्वात शेवटी मतदानासाठी विधानभवनात दाखल झाले.दूपारी ४ वाजेपर्यंत २८५ आमदारांनी मतदानाचा हक्क बजावला होता.राष्ट्रवादीचे दोन आमदार अनिल देशमुख आणि नवाब मलिक यांनी विधान परिषदेच्या या निवडणूकीसाठी मतदान करता यावे,यासाठी सर्वोच्च न्यायालयात धाव घेतली होती.

मात्र,मतदान संपण्यास काही क्षण बाकी असताना न्यायालयाने मलिक आणि देशमुख यांना अंतरिम दिलासा देण्यास नकार दिला होता.त्यामुळे राष्ट्रवादीची २ मते कमी झाली होती.महत्वाचे म्हणजे राजकीय पक्षाचे आरोप-प्रत्यारोप,मतदानावरील आक्षेप यामुळे मतमोजणीस दोन तासांचा विलंब झाला होता.भाजपचे प्रसाद लाड,काँग्रेसचे चंद्रकात हंडोरे व भाई जगताप यांच्यात दहाव्या जागेसाठी रात्री उशिरापर्यंत चुरस सुरु होती.त्यात प्रसाद लाड विजयाकडे जात होते तर हांडोरे व जगताप यांच्यापैकी कोणालाही कोट्यातील मते देखील मिळालेली नव्हती.