‘समृद्धी‘महामार्ग काही अनुत्तरित प्रश्‍न…

समृद्धी महामार्गावर दूतर्फा दोन वर्षात वृक्षारोपण केले जाणार असल्याची ‘वल्गना‘करण्यात आली होती.एका कंत्राटदाराला ३०.१४ किमीमध्ये वृक्षारोपण करण्याचे कंत्राट देण्यात आले होते मात्र,समृद्धी नावाच्या वाळवंटात कुठेही हिरवळ झिरपलीच नाही.खडकी बांधमधून पाणी घेऊन या वृक्षांना पाणी देण्यासाठी ड्रिप इरिगेशनची व्यवस्था करण्यात येणार होती मात्र,ते देखील पाणी झिरपलेच नाही आणि ३० किमीच्या महामार्गाच्या दोन्ही बाजूला ४३ हजार ९० झाडे तसेच महामार्गाच्या मध्यभागी जे ४२ हजार ६५४ झाडे लावली जाणार होती ती एमएसआरडीसीच्या कोणत्या अभियंताच्या फाईल्समध्येच उगवली याचा शोध साक्षात इंद्र देव देखील घेऊ शकणार नाही!! ३९ कोटींचे वृक्षारोपण ना या महामार्गावरील प्रवाश्‍यांना दिसले ना न्यायमूर्तींना!रणरणत्या उन्हात एखाद्या वाहनचालकाला थोडा वेळ एखाद्या वृक्षाखाली थांबण्याची गरज वाटली तरी या महामार्गावर वाळवंटाच्या सावलीशिवाय प्रवाश्‍यांना काहीही गवसत नाही.नागपूरच्या कोतेवाड्यापासून सेलडोहपर्यंत रस्त्याच्या दोन्ही बाजूला वृक्ष तर सोडा,साधे रोपटे देखील दिसत नाहीत.महत्वाचे म्हणजे कोतेवाडा ते सेलडोह दरम्यान वृक्षारोपणासाठी ३९ कोटींची तरतूद करण्यात आली होती,उर्वरित ७०१ किलोमीटर मधील कोट्यावधी वृक्षारोपणाचा हिशेब तर साक्षात ब्रम्हदेव जरी या समृद्धी महामार्गावर अवतरले तरी नाही देऊ शकणार!

एकूण ७०१ किमी लांबीचा, सहा मार्गिकांचा, १ हजार ९०३ अभियांत्रिकी संरचना असलेला,वन्यजीवांसाठी ९२ ओव्हरपास,८ अंडरपास,६५ उड्डाणपुले,रेल्वे ओव्हरब्रिज,ओव्हरपास,अंडरपास,पादचा-यांसाठी ब्रीज यांच्यासह २४ इंटरचेंज,६ बोगदे,दहा जिल्ह्यांना थेट तर इतर १४ जिल्हे २६ तालुके अनु ३९२ गावांना जोडणा-या, या महामार्गावरील पथकर वसूल करण्याचे कंत्राट अश्‍मी ग्रुप्सला मिळाले आहे,हे विशेष.राज्याच्या अल्पसंख्यांक आयोगाचे अध्यक्ष प्यारे खान हे अश्‍मी ग्रुप्सचे संचालक आहेत.केंद्रीय मंत्री नितीन गडकरी यांचे अत्यंत विश्‍वासू व जवळचे असलेले प्यारे खान यांच्या अश्‍मी ग्रुप्सला समृद्धी महामार्गावरील टोलचे कंत्राट मिळाल्याने आश्‍चर्य व्यक्त केले जात आहे.या महामार्गावर सुरवातीला ५५ हजार कोटी खर्च होणार होता जो आता ६७ हजार कोटींच्या घरात गेला असल्याने या महामार्गावरील टोल देखील वाढीव स्वरुपात असणार आहे.१ एप्रिल २०२५ पासून या महामार्गावरील पथकरात प्रतिकिमीनुसार दरवाढीचा निर्णय एमएसआरडीसीने घेतला आहे.त्यामुळे या महामार्गावरुन प्रवासासाठी आता अतिरिक्त ११७ रुपये तीन वर्षांसाठी दरवाढ करण्यात आली आहे.७६ किमीचा अंतिम टप्पा पूर्ण होण्याआधीच ही दरवाढ घोषित करण्यात आली,हे विशेष!डिसेंबर २०२२ मध्ये सुरु झालेल्या या महामार्गावर चारचाकी वाहनांसाठी १.७८ रुपये प्रति किमी इतका पथकर होता.तो आता १ एप्रिलपासून २.०६ रुपये प्रति किमी झाला आहे.७०१ किमी प्रवासाचा विचार करता सध्याच्या पथकरापेक्षा समृद्धी महामार्गावरील प्रवाश्‍यांना १९७ रुपयांचा पथ कर अधिकचा द्यावा लागत आहे.