लाडकी बहीण योजना,दमदाटी’,उपदेश आणि बरंच काही…

नागपूर,दि.१५ सप्टेंबर २०२४: राष्ट्रवादीचे अध्यक्ष(शरद पवार गट) शरद पवार यांनी आज राज्यातील लाडक्या बहीणींना पंधराशे रुपयांपेक्षा त्यांच्या अब्रूचे संरक्षण आणि सुरक्ष्ततेची गरज असल्याचे ‘सारगर्भित’विधान केले.अर्थात,बदलापूरच्या घटनेनंतर ज्या पद्धतीने शिंदे सरकारने हे प्रकरण हाताळले,त्याविरुद्ध प्रचंड जनक्षोभ उसळणे स्वाभाविक होते.या पार्श्वभूमीवर शिंदे सरकारला ‘राजकीय’कोंडीत पकडण्याची संधी विरोधक कुठेही सोडणार नाहीत,हे स्वाभाविक असून लाडकी बहीण योजनेचा सरळ संबंधच शरद पवारांनी लाडक्या बहीणींच्या अब्रूशी जोडून टाकला. दूसरीकडे मुख्यमंत्री एकनाथ शिंदे यांनी देखील काल ’लाडक्या भावाला साथ द्या’अशी साद घालत,मुख्यमंत्री लाडकी बहीण योजनेला खोडा घालण्याचे काम विरोधक करीत आहे असा आरोप करीत, त्यांनी ’हप्ते’घेतले आम्ही लाडक्या बहीणींच्या खात्यात ‘हप्ते ’टाकले,अशी उपरोधिक टिका केली,अर्थात गेल्या अडीच वर्षांपासून राज्यात शिंदे-फडणवीसांची तर गेल्या एका वर्षापासून महायुतीची सरकार अस्त्विात असतानाही, लाडकी बहीण योजना राबविण्याची व तिच्या खात्यात ’हप्ते’टाकण्याची ’सुबुद्धी’या सरकारला लोकसभेच्या महाराष्ट्रातील निकालानंतरच का सूचली?हा लाख मोलाचा प्रश्‍न महाराष्ट्रातील सुजाण बहीणींना पडणे रास्त आहे.

आता पर्यंत एक कोटी ६० लाख बहीणींना या याेजनेचा लाभ मिळाला असून, या योजनेमुळे राज्यातील ‘कर दाता’मात्र,आतल्या आत ’चरफडत’असल्याचे दिसून पडत आहे.राज्याच्या तिजाेरीतून आतापर्यंत चार  हजार ७८७ कोटी रुपये लाडक्या बहीणींच्या खात्यात जमा देखील झाले आहे.त्यामुळे या हजारो कोटींच्या खिरापतीचे श्रेय घेण्याची चढाओढ मुख्यमंत्री व दोन्ही उपमुख्यमंत्र्यांमध्ये लागली नसती तर नवलच.कुठे ‘दादांचे’ तर कुठे ‘देवा भाऊ’च्या समर्थकांनी मोठमोठे कटआऊ्टस लाऊन लाभार्थी लाडक्या बहीणींना ‘जाणीव’करुन दिली की त्यांच्या खात्यात पोहोचलेले तीन हजार रुपये(जुलै अाणि ऑगस्टचे मिळून)या दादा आणि भाऊंच्या ‘दारशूरतेमुळेच’मिळाले आहेत,एवढंच नव्हे तर वृत्त वाहीन्यांवर या योजनेच्या त्यांच्या‘जाहीराती’बघून तर महाराष्ट्रातील प्रबुद्ध जनता चकीतच झाली!

कुठे लहान मुलाच्या हातात नवी कोरी ‘बॅट ‘तर तर विद्यार्थिनींच्या हातात नवी कोरी शालेय पुस्तके होती,याचा अर्थ लाडकी बहीण योजना लागू होण्यापूर्वी या राज्यातील पालक वर्ग इतका ‘हतबल’ होता की,आपल्या मुलांना ते साधी‘बॅट’देखील विकत घेऊन देऊ शकत नव्हते.विद्यार्थिनींना शिकविण्याची जणू त्यांची कुवतच नव्हती. जाहीरातीतील लाडक्या बहीणींच्या चेह-यावरील हास्य कॅम-यांनी अचूक टिपण्याच्या नादात ते अधिक ’हास्यास्पद’कसे होतील,याचाच वेध घेतल्याचे गमतीदार टोले देखील समाज माध्यमात उमटले.

वरुन ‘रक्ताचा थेंब असेपर्यंत ‘लाडकी बहीण ’योजना सुरुच राहणार’ असल्याची भीमगर्जना हा ‘कळस’होती कारण ही गर्जना जळगाव येथील सागर पार्क मैदानावर महिला ‘सशक्तीकरण’ अभियानात करण्यात आली होती!एकीकडे ‘सशक्तीकरण’अभियानात ‘फूकटीकरणाचे’वचन ऐकून जळगावकरांवर डोक्याला हात मारुन घेण्याची वेळ आली होती.

उपमुख्यमंत्री अजित पवार यांनी तर,सर्वसामान्य कुटूंबातील महिलांच्या ‘सक्षमीकरणासाठी’ ही योजना असल्याचा सूतोवाच करुन, फक्त निवडणूका डोळ्या समोर ठेऊन ही योजना आणलेली नाही,असे साळसूदपणे सांगूनच टाकले!उपमुख्यमंत्री फडणवीस म्हणाले,विरोधक कितीही आमच्या विषयी खोटे बोलू द्यात,बहिणींचे सुरक्षा कवच(मतांच्या रुपाने!) आम्हाला आहे,आमचे कोणी वाकडे करु शकत नाही.दर महिना पंधराशे रुपये राज्यातील महिलांना देऊन भाऊबिजेची ओवाळणी देत आहे,बहीणींच्या प्रेमातून उतराई होण्याचा हा प्रयत्न आहे,माझ्या बहीणींनो सावत्र भावांच्या (मविआच्या)भूलथापांना बळी पडू नका,असे आव्हानच त्यांनी केले.मात्र,ही भाऊबिजेची ओवाळणी विधान सभेच्या निवडणूका दोन महिन्यांवर येऊन ठेपल्यावरच कशी काय मिळाली?याचा उलगडा करण्याचा प्रयत्न आता महाराष्ट्राच्या गल्लोगल्ली केला जात आहे.

उपमुख्यमंत्री अजित पवार यांना बारामतीचा लोकसभेचा निकाल इतका जिव्हारी लागला की त्यांनी आपल्या जनसन्मान यात्रेदरम्यान,बारामतीत बहीणीच्या विराेधात पत्नीला उमेदवारी दिली,चूकच झाली अशी जाहीर कबुली दिली अर्थात,बारामतीचा निकाल अजित पवारांच्या बाजून लागला असता तर कदाचित अशी उपरती त्यांना कधीच झाली नसती,हा भाग अलहदा.यावर १३ ऑगस्ट २०२४ रोजी सुप्रिया सुळे यांनी देखील भावाला टोला हाणत,भाऊ लाडका नसला तरी विश्‍वासू असावा,असे बोल ‘जिव्हाळ्याचे’बोल सुनावले.

उपमुख्यमंत्री अजित पवारांच्या जनसन्मान यात्रेत योजनेच्या नावातून ‘मुख्यमंत्री’हा शब्दच वगळण्यात आला!यावर बरीच गरमागरम चर्चा मंत्रीमंडळ बैठकीत शिवसेनेच्या मंत्र्यांनी ‘घडवून’आणली.योजनेचा प्रचार करताना ‘जबाबदारीने’वागण्याची सूचना कार्यकर्त्यांना दिली जाईल आणि महायुतीचा धर्म पाळल्या जाईल असे आश्‍वासन देतानाच मंत्री तानाजी सावंत यांना झालेल्या ‘ओकारी’चा विषय पाठोपाठ येणे स्वाभाविक होता!