मोमीनपुरा भागातील मशिदीत सापडले म्यानमारचे ८ नागरिक: मरकजमधील सहभागी नाही

नागपूर:  संचारबंदीत पोलिसांना कोणतीही पूर्वसूचना न देता मोमीनपुरा भागातील एका मशिदीत दडून बसलेल्या म्यानमारच्या आठ नागरिकांना पोलिसांनी ताब्यात घेतले. त्यांना तडकाफडकी सिव्हिल लाइन्स आमदार निवासात ‘स्थानबद्ध’ करण्यात आले. या घटनेने मोमीनपुऱ्यात खळबळ उडाली आहे.

हे नागरिक निजामुद्दीन येथील मरकजमधील धार्मिक संमेलनात सहभागी झाले नव्हते, असे कळते. या सर्व नागरिकांविरुद्ध तहसील पोलिसांनी व्हिसा ,संचारबंदी व जमावबंदीचे उल्लंघन केल्याचे गुन्हे दाखल केले आहेत.

विश्वसनीय सूत्रांनी दिलेल्या माहितीनुसार, ताब्यात घेण्यात आलेल्या नागरिकांमध्ये चार महिला व चार पुरुषांचा समावेश आहे. सर्व जण म्यानमारमधील यान्गॉन शहरातील रहिवासी आहेत. ७ मार्चला सर्वजण नागपुरात आले. ते गिट्टीखदानमधील एका मशिदीत थांबले.

याचदरम्यान पोलिसांनी जमाबबंदी आदेश लागू केला. दोन आठवडे गिट्टीखदानमधील मशिदीत राहिल्यानंतर सर्व जण २१ मार्चला मोमीनपुऱ्यातील अन्सारनगर येथील इदरा-ए-इदाफिजुल कुराट (लाल मरकज) येथे आले. तेथे ते थांबले. सोमवारी या नागरिकांबाबत तहसील पोलिसांना माहिती मिळाली. पोलीस उपायुक्त राहुल माकणीकर यांच्या मार्गदर्शनाखाली तहसील पोलीस ठाण्याचे वरिष्ठ पोलीस निरीक्षक जयेश भांडारकर व त्यांचे सहकारी मशिदीत पोहोचले. तेथे म्यानमारचे आठ नागरिक सापडले. त्यांच्याकडे व्हिसा होता. परंतु लॉकडाउन असताना ते धार्मिक स्थळी थांबल्याने पोलिसांनी विविध कलमान्वये त्यांच्याविरुद्ध गुन्हे दाखल केले. त्यानंतर डॉक्टरांच्या उपस्थितीत सर्वांना आमदार निवासात सक्तीच्या एकांतवासात पाठविण्यात आले.