मुख्यमंत्र्याच्या शहरात भू-माफियांची गुंडशाही!

तक्रारी केल्या आहेत.मात्र,आमच्या तक्रारीची दखल घेऊन आरोपींविरुद्ध जरीपटका पोलिस ठाण्याचे डीसीपी गुन्हा दाखल करीत नाही!न्यायालयाच्या निर्णयांनंतर देखील आमचीच कागदपत्रे बोगस असल्याचे ते सांगतात.मूळात पोलिस ठाण्यातील अधिकारी किवा कर्मचारी हे किती शिकले असतात?असा सवाल करीत,आमच्या हाऊसिंग सोसायटीतील प्रत्येक प्लॉटधारक हा उच्च शिक्षीत आहे,तरी देखील गुंडांच्या इशा-यावर आमच्यावरच ॲट्रासिटीचे गुन्हे जरीपटका पोलिसांनी दाखल केले?असा संताप सिंग यांनी व्यक्त केला.पोलिस आयुक्त जनतेच्या प्रश्‍नांवर सुनावणी घेतात मात्र,त्यांच्या दरबारात ही आमचा प्रश्‍न सुटला नाही कारण,ते आमचे निवेदन डीसीपीला देतात,डीसीपी झोनच्या अधिका-याला आणि तिथून पुन्हा नागरिकांचे आवेदन त्याच पोलिस ठाण्यात येतात ज्यांच्याकडून त्यांना न्याय मिळत नाही!असे वास्तव सिंग यांनी मांडले.

आमच्यावरील अन्यायविरुद्ध आम्ही पंतप्रधान कार्यालयाला लिहले,त्यांनी आमच्या तक्रारीची तातडीने दखल घेत महाराष्ट्राच्या मुख्य सचिवांना उचित कारवाईचे निर्देश दिले. हे पत्र आमच्या सोसायटीचे मुखत्यारपत्र धारक एन.एम.सहारे यांना प्राप्त झाले.गृह मंत्रालयाने देखील पोलिस महासंचालकाला पत्र दिले,त्यांनी पोलिस आयुक्तांना पत्र दिले,या संपूर्ण पत्र व्यवहारात आमच्यासारखे ज्येष्ठ नागरिक असलेल्या पिडीतांना कुठलाही न्याय मिळाला नाही,असे सांगत, आम्ही दररोज आमच्या हक्काच्या भूंखडावर होणारे ‘प्रशासकीय’अतिक्रमण बघत आहोत,उभारल्या जाणा-या अनाधिकृत इमारतींंमुळे आमचे घराचे हक्काचे रस्ते देखील ‘विकल्या‘गेले असल्याचे वास्तव ते मांडतात.

(छायाचित्र : चाळीस वर्षांपूर्वी ज्या अखिल विश्‍व भारती हाऊसिंग सोसायटीतील डॉ.काळे यांच्या नावाने रजिस्ट्री झाली त्याच प्लॉटवर जबरीने कब्जा करुन सय्यद अली सिद्दीकी नावाचा फलक फहीम अंसारी व उमेद अंसारी यांनी लावला असून जो पत्ता त्यात दर्शवला आहे त्या पत्त्यावर सय्यद अली सिद्दीकी नावाने कोणीही राहत नाही!)

पालकमंत्री चंद्रशेखर बावणकुळे यांच्या जनता दरबारातही आम्ही आमची कैफियत मांडली,त्यांच्याकडून नासुप्रच्या अधिका-यांना पत्र ही गेले मात्र,कोणतीही कारवाई झाली नाही.यामुळे ९ फेब्रुवरी २०२५ पासून आम्ही सर्व ज्येष्ठ प्लॉट धारकांनी १५ दिवसांचे महामानव कॉलनी उर्फ आर्य नगर,समता नगर रोड,मनमीते रेस्टॉरेन्ट जवळ,मौजा नारी साेसायटीच्या फाटकाजवळ साखळी उपोषण केले मात्र,याची देखील कोणतीही दखल नासुप्र अधिकारी व जरीपटका पोलिसांनी घेतली नाही.

जरीपटका पोलिस ठाण्यातील डीसीपी कदम यांना दोरजे मॅडम यांनी सूचना करुन आमचे प्रश्‍न सोडवण्याचे आदेश दिले होते मात्र,कदम यांनी आम्हा पिडीतांना बाहेर बसवले व आरोपींना एक तास स्वत:च्या कक्षात घेऊन बसले,असा गंभीर आरोप पत्रकार परिषदेत ऑन कॅमरा पिडीतांनी केला.आमचा पूर्ण लढा हा भू-माफिया आणि त्यांच्याशी संगनमत करणा-या नासुप्र अधिकारी व जरीपटका पोलिस ठाण्यातील भ्रष्ट अधिकारी यांच्या विरोधात असून आता नागपूरकर जनतेच्या दरबारात न्यायासाठी पत्रकार परिषद घेत असल्याचे त्यांनी सांगितले.

पत्रकार परिषदेत पिडीतांनी फहीम अंसारी,उमेर अंसारी,सय्यद जावेद इकबाल,हबीब मिर्जा,प्रवीण इंदुरकुमार बलानी,सुधीर मेश्राम,रंजना वासनिक व नरेंद्र बांबोर्डे यांच्याकडून होणा-या छळाविषयी व मारहाणीविषयी आपली कैफियत मांडली.

२१४ प्लॉट धारकांकडे अधिकृत रजिस्ट्री असून फक्त आखीव पत्रिकेत नाव नसल्याचा फायदा नासुप्रच्या भ्रष्ट अधिका-यांनी घेतला व बोगस नावाने दावा करणा-या संस्थेच्या सदस्यांना आर.एल दिले.यावर आक्षेप घेतला असता नासुप्रचे अधिकारी यांनी चुकून २२ लोकांना आर.एल देण्यात आल्याचे सांगत या पुढे बोगस संस्थेच्या सदस्यांना आर.एल.देणार नसल्याचे सांगितले तरी देखील पुढे एकूण ९७ लोकांच्या नावे आर.एल करुन देण्यात आले!मौजा नारी,खसर क्र. १३०/८,३६/१ येथील रिकामे भूखंड हे भूखंड माफियांसाठी तसेच नासुप्रच्या भ्रष्ट अधिका-यांसाठी पैसे कमावण्याचे कुरण झाले असून,गृहखाते ज्यांच्याकडे आहे त्या मुख्यमंत्र्यांनी त्यांच्याच शहरातील ज्येष्ठ नागरिकांवर होणारा अन्याय तातडीने दूर करुन जरीपटका पोलिस ठाण्याच्या भ्रष्ट पोलिसांचा कारभार सुधारावा,अशी मागणी त्यांनी केली.

बातमीशी संबंधित सर्व व्हिडीयोज Sattadheesh official youtube चॅनलवर उपलब्ध)

……………….