मुंबई: राज्यात करोनाचा कहर सुरूच असून, मुंबईतील रुग्णांच्या संख्येत झपाट्यानं वाढ होत आहे. मुंबईत आज, बुधवारी दिवसभरात ७६९ नवे करोनाबाधित सापडले आहेत. तर २५ जणांचा मृत्यू झाला आहे. एकट्या मुंबईतील रुग्णांची एकूण संख्या १०,५२७ वर पोहोचली आहे. तर मृत्यूचा आकडा ४०० हून अधिक झाला आहे. त्यामुळं चिंतेत भर पडली आहे.
मुंबईत आज दिवसभरात ७६९ नव्या करोना रुग्णांची नोंद झाली आहे. तर २५ रुग्णांचा मृत्यू झाला आहे. मृत्यूची एकूण संख्या ४१२ झाली आहे. आज १५९ रुग्ण बरे झाले आहेत. तर या आजारातून बरे झालेल्या रुग्णांची एकूण संख्या २२८७वर पोहोचली आहे.
आज मृत्यू झालेल्या २५ रुग्णांमध्ये १५ पुरुष आणि १० महिला होत्या. १९ रुग्णांना दीर्घकालीन आजार होते. मृत्यू झालेल्या रुग्णांपैकी एकाचे वय ४० वर्षांपेक्षा कमी होते. तर १२ जणांचे वय हे ६० वर्षांपेक्षा अधिक होते. तर उर्वरित १२ रुग्ण हे ४० ते ६० वर्षे वयोगटातील होते. २ ते ४ मे दरम्यान प्रयोगशाळांमध्ये ज्या २१५ करोना चाचण्या करण्यात आल्या होत्या. त्यांचे अहवाल पॉझिटिव्ह आले आहेत. त्यामुळं या रुग्णांचा समावेश या अहवालात करण्यात आला आहे, असं महापालिकेनं स्पष्ट केलं आहे.
धारावीत ६८ नवे रुग्ण, एकाचा मृत्यू
धारावीत आज दिवसभरात ६८ नवे रुग्ण सापडले आहेत. तर एका रुग्णाचा मृत्यू झाला आहे. करोनाबाधितांची एकूण संख्या ७३३ वर पोहोचली आहे. तर एकूण २१ मृत्यू झाले आहेत. दुसरीकडे दादरमध्येही ८ नवीन रुग्णांची नोंद झाली आहे. त्यामुळं येथील एकूण रुग्णसंख्या ६४ झाली आहे. माहिममध्येही ११ नवीन रुग्ण सापडले आहेत. या परिसरातील एकूण रुग्णसंख्या ९१वर पोहोचली आहे.
आमचे चॅनल subscribe करा
