भाजप आमदाराने दिली कार्यकर्त्या ऐवजी हॉटल व्यवसायिकाला उमेदवारी!

महत्वाचे म्हणले याच आमदार पूत्राचे ऐन करोनाच्या जीवघेण्या महामारीच्या काळात गोवा येथील एका नामांकित हॉटेलमध्ये मित्रांसोबत मद्याचे प्याले रिचवताना व टेबलरवर चढून नृत्य करतानाचे व्हिडीयोज नागपूरात चांगलेच व्हायरल झाले होत!करोना महामारीच्या काळात जेव्हा लॉकडाऊनमुळे लाखो नागपूरकरांची उपासमार घडत होती,दोन वेळेच्या जेवणाची भ्रांत होती त्यावेळी या ’पार्टी विथ डिफरेन्स’ पक्षातील तत्कालीन आमदार विकास कुंभारे यांच्या पुत्रानी जणू सर्वसामान्य,गरीब,गरजू,शोषित,वंचितांची क्रूरपणे थट्टाच केली होती.या आमदार पूत्राच्या या कृतीवर प्रचंड रोष नागपूरात उफाळला होता.त्याच आमदार पूत्राला श्रेयस विकास कुंभारेला,प्रभाग क्र.८ (मोमिनपुरा,गोळीबार चौक,टिमकी)मधून  नागपूरचा भावी नगरसेवक होण्याची संधी देऊन भाजपने नागपूरकरांना मोठ्या प्रमाणात ‘उपकृत‘केल्याची टिका समाज माध्यमात उमटली आहे.

नागपूरातच नव्हे तर विधान सभा अध्यक्ष राहूल नार्वेकर यांच्या घरात देखील एक सोडून तीन-तीन उमेदवारी भाजपने बहाल केली आहे.परिणामी,काँग्रेसवर ’घराणेशाही’तून कडाडून टिका करणा-या भाजपचे तोंड या कृतीमुळे चांगलेच पोळलेले दिसून पडतंय.

(छायाचित्र :सौजन्य एमव्हीएम)

काँग्रेसमधून भाजपात ‘आयात’करण्यात आलेल्या दर्शनी धवड,मनोज साबळे व निकोसे यांनाही भाजपने उमेदवारी देऊन कृतकृत्य केल्याने भाजपच्या निष्ठावंतांमध्ये तीव्र रोष आहे.अनेक इच्छूक कार्यकर्त्यांनी केंद्रीय मंत्री नितीन गडकरी यांच्या घराकडे धाव घेतली तर अनेकांनी महसूल मंत्री व नागपूरचे पालकमंत्री चंद्रशेखर बावणकुळे यांचे वाहनच अडवून आपली व्यथा मांडली.कार्यकर्त्यांची नाराजी बघता बावणकुळे यांचा चेहरा बघण्यासारखा होता.

भाजपच्या आमदारांंसह तिकीट वाटपात मध्य नागपूरचे आमदार प्रवीण दटके व विधान परिषदेचे आमदार संदीप जोशी यांचा महत्वाचा सहभाग असल्याचे सांगितले जात आहे.याच नियोजनातून स्थायी समितीचे माजी सभापती व भाजपच्या महापौर पदाचे दोन अत्यंत महत्वाचे दोन वरिष्ठ चेहरे असलेले अविनाश ठाकरे व संजय बंगाले यांचे तिकीट कापण्यात आल्याने आश्‍चर्य व्यक्त केले जात आहे.अविनाश ठाकरे यंदा नगरसेवक म्हणून लढण्यास इच्छूक नाहीत ही खोटी अफवाह मोठ्या प्रमाणात पसरविण्यात तिकिट वाटपातील भाजप पक्षश्रेष्ठींना चांगलेच यश मिळाले मात्र,अविनाश ठाकरे हे निवडणूक लढण्यास इच्छूक होते मात्र,त्यांचे तिकीट हेतूपुरस्सर कापण्यात आल्याचे त्यांच्या समर्थकांनी माध्यमकर्मींना आज प्रतिक्रिया देताना सांगितले.‘नाकापेक्षा मोती जड‘या धारणेतून ठाकरे हे पुढे जाऊन भाजपच्या विद्यमान आमदारांसाठी तगडे आव्हान निर्माण करु शकतात,या आशंकेतून त्यांचे तिकीटच कापण्यात आले.महत्वाचे म्हणजे प्रभाग क्र.३५ मध्ये अगदी चिंचभवन पासून तर मनीषनगर,जोगीनगर,बोरकुटे ले आऊटपर्यंत भाजपला तळागळापर्यंत पोहोचविण्याचे काम अविनाश ठाकरे यांनी एकेकाळी खूप प्रामाणिकपणे केले होते.ते अखिल भारतीय माळी समाजाचे नेतृत्व करीत असून महानुभव पंथांचे मोठे कार्य करणारे असल्याने ओबीसी व महानुभव पंथियांना भाजपसोबत जोडण्यात त्यांची भूमिका दूर्लक्षीत करण्यासारखी निशिचतच नव्हती मात्र,ते भाजपचे ‘होयबा’पदाधिकारी झाले नसते,याच भावनेतून त्यांचे तिकीट कापण्यात आल्याची नाराजी त्यांच्या अनेक समर्थकांनी व माळी समाजाच्या कार्यकर्त्यांनी माध्यमकर्मींकडे व्यक्त केली.परिणामी, महापौर पदापर्यंत अविनाश ठाकरेंनी पाेहोचू नये यासाठी तिकीट नाकारणा-या पक्षश्रेष्ठींना ते आमदार म्हणून विधान परिषदेत तरी कसे चालतील?असा रोख सवाल ते करतात!प्रभाग क्र. ३५ मध्ये भाजपने संदिप गवई,पूजा भुगावकर,विशाखा मोहोड व खुल्या प्रवर्गताून अविनाश ठाकरे यांच्या जागेवर रमेश भंडारी यांना उमेदवारी दिली आहे.रमेश भंडारी हे भाजपचे फार जुने कार्यकर्ते असले तरी सत्तेचे राजकीय अनुभव त्यांना नाही,असे सांगितले जात आहे.

फडणवीसांच्या गोटातील व अतिशय जवळचे मानले जाणारे संजय बंगाले यांच्याही उमेदवारीवर याच भावनेतून फूली मारण्यात आल्याचे कार्यकर्ते सांगतात. आतापर्यंत काँग्रेसवर मोठ्या प्रमाणात गटबाजीचे आरोप होत असताना स्थानिक स्वराज्य संस्थासारख्या निवडणूकीत भाजप देखील त्याच वाटेवर गेल्याने आश्‍चर्य व्यक्त होत आहे.

असे असले तरी दटके यांच्या जवळपास ४३ समर्थकांचेही तिकीट यंदा कापण्यात आल्याची माहिती समोर आली.यात वर्षा ठाकरेंसह अनेक नगरसेवकांची नावे आहेत. नोव्हेंबर २०२४ मध्ये विधान सभा निवडणूकीत मध्य नागपूरातून नागपूरातील भाजपच्या दोन्ही कद्दावर नेत्यांच्या मनात दटके यांचे नाव आमदारकीसाठी नसताना, दटके यांनी उमेदवारीसाठी आपले बळ दाखवले होते.ही बाब दोन्ही नेत्यांना खटकली होती.परिणामी,मनपात दटके यांचा प्रभाव कमी करण्यासाठी दटके यांच्या समर्थकांच्या नावावर फूली मारण्यात आल्याचे बोलले जात आहे.ज्यांना भाजपच्या तिकीट निर्धारण समितीने ‘कामाला लागा रे’ची आगाऊ सूचना केली होती,त्यातील अनेकांचे ‘काम’ हिरावून घेण्यात आले आहे!यंदा भाजपने फक्त ३० टक्के जूने व ७० टक्के नव्यांना उमेदवारी दिली आहे.

नऊ वर्षांपूर्वी २०१७ मध्ये देखील भाजपने अनेक नवख्या नगरसेवकांना उमेदवारी दिली होती ज्यातील अनेकींना स्वाक्षरीचेही व्यवस्थित भान नव्हते.मात्र,नगरसेवक होताच विविध कामातील कंत्राटदारांना ’माझी टक्केवारी’साठी त्या नगरसेवक व नगरसेविकांचे फोन जाऊ लागले,यंदा देखील त्याचीच पुनरावृत्ती होणार असल्याचा थेट आरोप भाजपचेच निष्ठावंत कार्यकर्ते आता करीत आहेत.

प्रभाग क्र.१६(ड)चे अध्यक्ष गजानन भिमराव निशितकर यांनी शहर अध्यक्ष दयाशंकर तिवारी यांच्याकडे आज प्रभाग क्र. ड चे अध्यक्षपद,सक्रिय सदस्य व प्राथमिक सदस्यत्वाचा राजीनामा सुपुर्द केला आहे.ते गेले ३० वर्षांपासून पक्षाचे निष्ठावंत कार्यकर्ते होते.त्यांच्या प्रभागात यंदा बाहेरच्या प्रभागातील उमेदवारांना तिकीट देण्यात आले आहे.हीच किमया पक्षाने अविनाश ठाकरे यांच्याही प्रभागात साधली असून इतर प्रभागातील दोन उमेदवारांना त्यांच्या प्रभागात उमेदवारी देण्यात आली आहे.परिणामी,भारतीय जनता पक्ष मनमानेल त्या पद्धतीने मतदारांवर कश्‍याप्रकारे इतर प्रभागातील उमेदवार लादत आहे,यावर देखील समाज माध्यमात खंमग चर्चा झडत आहे.

यंदा भाजपच्या अनेक निष्ठावंतांचे उघड नाराजीनाट्य घडत असतानाही आमदार दटके यांनी भाजप यंदा १२१ जागांवर विजय मिळवणार असल्याचा दावा केला आहे!

थोडक्यात, भाजपने संघाच्याच प्रभागात जे उमेदवार दिले ते बघता भाजप आता संघाचेही ऐकत नाही,भाजप आता काँग्रेससारखीच ‘प्रा.लि.कंपनी’ झाली असल्याची बोचरी टिका दुखावलेले निष्ठावंत करीत आहेत.

……………………………….