बाबा सिद्धीकी यांची गोळी मारुन हत्या: वांद्रे पूर्व येथील घटना

मुंबई,दि.१२ ऑक्टोबर २०२४: आमदार झिशान सिद्धीकी यांच्या वांद्रे पूर्व कार्यालया समोरच आज दिनांक १२ ऑक्टोबर रोजी रात्री ९.३० वा.च्या सुमारास तीन आराेपींकडून काँग्रेसचे माजी मंत्री व विद्यमान राष्ट्रवादी काँग्रेस अजित पवार गटाचे नेते बाबा सिद्धीकी यांची गोळ्या घालून हत्या करण्यात आली.या घटनेने संपूर्ण राज्यात खळबळ माजली असून,ही घटना गृहमंत्री देवेंद्र फडणवीस यांच्या गृहखात्याचे अपयश असल्याचे सांगून, राष्ट्रवादी शरद पवार गटाच्या नेत्या व खासदार सुप्रिया सुळे,अनिल देशमुख,काँग्रेस प्रदेशाध्यक्ष नाना पटोले,शिवसेनेचे विधान परिषदेचे विरोधी पक्ष नेते अंबादास दानवे,विद्या चव्हाण,काँग्रेसचे नेते सचिन सावंत,भाई जगताप,समाजवादी पक्षाचे नेते अबू आझमी आदी यांनी फडणवीसांना नैतिकतेच्या दृष्टिकोणातून राजीनामा मागितला आहे.

आज मुंबईत देवी विसर्जन असल्यामुळे पोलिस, बंदोबस्तात असल्याची संधी साधून हे हत्याकांड घडवून आणण्यात आले.प्रत्यक्षदर्शी यांच्या सांगण्यानुसार फटाक्यांच्या आवाजातच गोळ्यांच्या आवाजाची सरमिसळ झाली.शूटर यांनी तीन राऊंड फायर केल्याची माहिती समोर आली आहे. महत्वाचे म्हणजे पंधरा दिवसां पूर्वीच बाबा सिद्धीकी यांना धमकी मिळाली होती.त्या अनुषंगाने बाबा सिद्धीकी यांना ‘वाय ’दर्जाची सुरक्षा पुरविण्यात आली होती,तरी देखील तीन आरोपी येतात व ९.९ एम.एम च्या बंदुकीने त्यांच्या छातीचा वेध घेतात,हे गृहखात्याचे सपशेल अपयश असल्याचे सांगून विरोधकांनी फडणवीस यांच्या राजीनामाची मागणी केली आहे.

एका आठवड्या पूर्वीच अजित पवार गटाचे भायखळा विधानसभा तालुकाध्यक्ष सचिन कुर्मी यांची मध्यरात्री हत्या करण्यात आली होती.त्यांच्या मानेवर,हातावर,पोटावर व छातीवर गंभीर जखमा होत्या.जे.जे.रुग्णालयात नेत असतानाच त्यांचा मृत्यू झाला.या घटनेची शाई वाळली देखील नव्हती, तर वांद्रे येथे बाबा सिद्धीकी यांच्यावर गोळ्या झाडून त्यांची हत्या करण्यात आली.

लीलावतीमध्ये त्यांना घेऊन गेले असता,त्यांचा मृत्यू झाला होता.बाबा सिद्धीकी यांचे सलमान,शाहरुख तसेच संजय दत्त यांच्यासोबत फार जिव्हाळ्याचे संबंध होते.या हत्याकांडाची माहिती मिळताच,संजय दत्त यांनी लीलावतीमध्ये धाव घेतली.गृहमंत्री  देवेंद्र फडणवीस,मोहित कंबोज,आशिष शेलार आदी हे देखील लीलावतीत पोहोचले.अजित पवार व प्रफूल्ल पटेल यांनी देखील लीलावती गाठले.

सुप्रिया सुळे यांनी या घटनेवर प्रतिक्रिया देताना,आश्‍चर्य वाटतं सत्तेत असतानाही अजित पवार गटाच्या नेते,पदाधिकारी यांची हत्या होते आहे,भूजबळ यांना स्वत:ला पोलिस ठाण्यात माहिती काढण्यासाठी व आरोपींच्या अटकेसाठी जावे लागत आहे.यावरुन महाराष्ट्रात कायदा व सुव्यवस्थेची काय स्थिती आहे हे लक्षात येत असल्याची टिका सुळे यांनी केली.हाच का छत्रपती शिवाजी महाराजांचा,शाहू,फूले,आंबेडकरांचा महाराष्ट्र?एकाच आठवड्यात दोन-दोन राजकीय हत्या!गृहमंत्री देवेंद्र फडणवीस करतात काय?पुण्यातील घाटात सामुहिक बलात्कार होतो,सत्तेत असणा-या दोन-दोन नेत्यांची हत्या होते,सरकार करते काय आहे?नैतिकतेची जाणीव ठेऊन फडणवीसांनी तात्काळ राजीनामा द्यावा,अशी मागणी सुळे यांनी केली.

काँग्रेसचे प्रदेशाध्यक्ष नाना पटोले यांनी राज्याच्या पोलिस महासंचालक पदीच रश्‍मी शुक्ला यांची असंवैधानिक नियुक्ती केली असल्याची टिका केली.सिद्धीकी यांची हत्या होने ही सरकारची नामुष्किच आहे तरी पण मी गृहमंत्र्यांचा राजीनामा मागणार नाही कारण आता,जनताच त्यांना सत्तेवरुन खाली उतरवणार आहे. या सरकारचाच गुन्हेगरांना पाठींबा असून ,लहान लहान मुली या देखील सुरक्षीत नाहीत.बाबा सिद्धीकी साररखे नेते सुरक्षीत नाही.याचे कारण,सत्ताधा-यांचा आपल्या राजकीय फायदासाठी रणनीतीचा परिणाम हा दिसतो आहे,अशी टिका त्यांनी केली.

ही घटना ऐकून माझ्या अंगावर काटा आला आहे,अशी प्रतिक्रिया सचिन सावंत यांनी दिली.काय चाललंय मुंबईत?बाबा सिद्धीकी एक दिलखुलास व्यक्तिमत्व होते.गृहमंत्र्यांनी आत्मचिंतन करावे.बाबा सिद्धीकी हे महाराष्ट्राचे माजी मंत्री होते,आमदार होते,आमदाराचे वडील होते,त्यांच्यावर अशी पाळी यावी?मी या घटनेचा जाहीर निषेध करतो.झिशानच्या दुखात मी सहभागी आहे.गृहमंत्र्यांनी या घटनेची नैतिक जबाबदारी घेतली पाहिजे.महाराष्ट्रात अशी घटना पुन्हा होऊ नये,हे फारच भयानक घडले.