फूटाळा…अतिक्रमण आणि राजकारण

गेल्या काही दिवसांपासून सातत्याने नागपूरातील वृत्तपत्रे एकच बाजू छापत आहेत.हा देखील सत्ताधा-यांचा प्रभाव असावा.माझी देखील बाजू असू शकते,जी मला जनते पुढे मांडायची आहे मात्र,पूर्वीसारखी पत्रकारिता आणि पूर्वीसारखे नीतीमान पत्रकार आता नाही,अशी खंत देखील त्यांनी बोलून दाखवली.

कमलेश चौधरी यांनी केलेल्या खळबळजनक आरोपांविषयी आमदार विकास ठाकरेंशी संपर्क केला असता,त्यांनी कॉल रिसिव्ह केले नाहीत.

याबाबत ज्वाला धोटे यांच्याशी संपर्क साधला असता,विकास ठाकरेंचा या प्रकरणाशी कोणताही संबध नसून, सर्व शासकीय विभागांना माझ्या नावाने तक्रारींचे पत्र गेल्याचे त्या सांगतात.पंजाबराव कृषि विद्यापीठाशी विदर्भवीर जांबुवंतराव धोटे यांनी प्रदीर्घ लढा दिला होता.मराठवाडा येथील राऊरीला हे विद्यापीठ घेऊन जाण्याचा घाट तत्कालीन सरकारने घातला असता माझ्या वडीलांनी तीव्र आंदोलन उभारले होते.त्या आंदोलनात ९ जण हुतात्मा झाले.त्यांच्या हौतात्म्यावर पंजाबराव कृषि विद्यापीठ नागपूरात आले.आज त्याच विद्यापीठाच्या जागेवर कमलेश चौधरी याने अतिक्रमण केले असून, ती जागा विद्यापीठाच्या संशोधनासाठी आहे.माफसूने त्या जागेवर त्यांचे विद्यार्थी मत्स्यपालनाचे संशाेधन करणार असल्याचे पत्र दिले आहे.पंजाबराव कृषि विद्यापीठाशी माझी भावनिक नाळ जुळली असून, केवळ फूटाळाच नव्हे तर शहरातील इतरही जमिनींवर ज्या पांढरपेश्‍यांनी अतिक्रमण केले आहे,ती जागा परत मिळवून देण्यासाठी मोठा लढा उभारणार असल्याचे ज्वाला धोटे सांगतात.’फूटाळा तो केवल झलक है पिक्चर अभी बाकी है’असे सांगत काचीपुरा असो किवा इतर जागा,पंजाबराव कृषि विद्यापीठाच्या जागांवर काँग्रेसच्या काळात अतिक्रमण झालं आहे.कमलेश चौधरीला दुग्ध व्यवसायासाठी फूटाळा येथील ही सात एकर जागा देण्यात यावी हे आघाडी सरकारमध्ये दुग्ध व पशुपालन मंत्री असताना सुनील केदार यांनीच माफसूला पत्र दिले आहे!

ते पत्र माझ्याकडे असून माध्यमांना मी ते सध्या तरी देणार नाही मात्र,मी पुराव्यानिशी बोलत आहे.सुनील केदार हे बिडचे धनंजय मुंडे आहेत तर कमलेश चौधरी हा वाल्मीकी कराड आहे,सुनील केदार आका तर कमलेश चौधरी हा भू-माफिया असल्याची घणाघाती टिका ज्वाला धोटे यांनी केली.कमलेश चौधरी याच्यावर अनेक गुन्हे नोंद आहेत,त्याचा भाऊ याच्यावर देखील गंभीर गुन्हे दाखल आहे,माझ्या प्राणाला भीती असून मी जांबुवंतरावांची लेक आहे,त्यामुळे मी अश्‍या गुंडशाही विरोधात लढताना कोणतीही सुरक्षा घेत नसल्याचे ज्वाला धोटे सांगतात.

पंजाबराव कृषि विद्यापीठाच्या अतिक्रमण झालेल्या जागा मोकळ्या करणार मात्र,शहरात केवळ ’आकाच’ नव्हे तर अनेक मोठमोठे नेते यांनी देखील पंजाबराव कृषि विद्यापीठाच्या विद्यार्थ्यांच्या संशोधनाच्या हक्काच्या जागेवर अतिक्रमण केले आहे,२८६ एकर मध्ये पसरलेले बॉटनिकल गार्डन याचे ज्वलंत उदाहरण आहे,त्याचे काय?फूटाळा सारखेच अतिक्रमण अनेक तलावांवर झाले आहे,त्या विषयी काय धोरण आहे?असा सवाल केला असता,फूटाळा तलाव संरक्षण समिती गठीत करुन तलावांचा श्‍वास मोकळा करण्याची सुरवात केली आहे.हा माझा वैयक्तिक लढा नाही.शासनाची जागा शासनाला परत मिळावी,त्या जागेचा सदुपयोग व्हावा,विद्यार्थ्यांच्या शैक्षणिक उपक्रमांना बळ मिळावे यासाठी गेल्या पाच वर्षांपासून मी आवाज उठवित आहे.पुढे ही हा लढा कायम राहणार असल्याचे ज्वाला धोटे यांनी सांगितले.

खरं तर कमलेश चौधरी हा लोकप्रतिनिधी आहे.त्याचे आई व वडील हे दोघेही नगरसेवक होते.