पोलीस हेड कॉन्स्टेबलचा विद्यार्थिनीवर बलात्काराचा प्रयत्न!

नागपूर: घरात घुसून पोलीस हेड कॉन्स्टेबलने १३ वर्षीय विद्यार्थिनीवर अत्याचाराचा प्रयत्न केला. ही खळबळजनक घटना यशोधरानगर भागात बुधवारी उघडकीस आली. या प्रकरणी पोलिसांनी विनयभंगासह विविध कलमान्वये गुन्हा दाखल करून संशयित आरोपी हेड कॉन्स्टेबलला अटक केली आहे.

रमेश गाढवे (रा. यशोधरानगर) असे अटकेतील पोलीस हेड कॉन्स्टेबलचे नाव आहे. तो यशोधरानगर पोलीस ठाण्यात कार्यरत आहे. पीडित मुलगी इयत्ता सहावीत शिकते. परिसरात राहत असल्याने गाढवे हा पीडित मुलीच्या आई-वडिलांना ओळखतो. बुधवारी सकाळी तिचे आई-वडील कामावर गेले होते. पीडित मुलगी व तिची लहान बहीण घरीच होती. गाढवे हा मुलीच्या घरात घुसला. विद्यार्थिनीवर अत्याचाराचा प्रयत्न केला. मुलीने आरडाओरड करताच गाढवे तेथून पसार झाला.

तत्पूर्वी याबाबत कोणाला सांगितल्यास त्याने मुलीला ठार मारण्याची धमकी दिली. सायंकाळी पीडित मुलीने घडलेला सर्व प्रकार आईला सांगितला. तिच्या आईने गाढवे याला जाब विचारला. मी कोणाला घाबरत नाही, मी पोलीस असल्याने माझे कोणी काहीही बिघडवू शकत नाही, असे गाढवे मुलीच्या आईला म्हणाला. त्यानंतर पीडित मुलीसह आईने यशोधरानगर पोलीस ठाणे गाठले. त्याच्याविरोधात तक्रार दिली. यशोधरानगर पोलिसांनी विनयभंगासह विविध कलमान्वये गुन्हा दाखल करून गाढवे याला अटक केली.