नागपूर, ता. २९ : नागपूर महानगरपालिकेच्या पदाधिकाऱ्यांनी त्यांच्या गाड्या सीएनजीवर परिवर्तित कराव्या, असे आवाहन केंद्रीय मंत्री नितीन गडकरी हे जाहीर कार्यक्रमातून वारंवार करतात. मनपाचे परिवहन समिती सभापती यांनी यात बाजी मारली. त्यांनी सीनजीवर परिवर्तित केलेल्या कारमध्ये आज खुद्द ना. नितीन गडकरी यांनी सहा कि. मी.ची राईड करीत कुकडे यांचे कौतुक केले.
या राईडदरम्यान ना. गडकरी आणि सभापती बंटी कुकडे यांच्यात शहरातील पर्यावरणपूरक वाहतुकीवर चर्चा झाली. कुकडे यांनी सांगितले की, मनपाच्या बसेससुध्दा सीएनजीवर चालतात आहे. मनपाच्या शहर बस वाहतुकीत इलेक्ट्रिक बसेसचाही समावेश आहे. नागपूर स्मार्ट सिटीतर्फे १५ इलेक्ट्रिक बस घेण्याचा प्रस्ताव असल्याची माहिती त्यांनी दिली. परिवहन समिती सभापती म्हणून पर्यावरणपूरक वाहतुकीला प्रोत्साहन देणे, हे आपले कर्तव्य आणि जबाबदारी आहे. त्याची सुरुवात स्वतःपासून केल्याचे त्यांनी सांगितले.
श्री. बंटी कुकडे यांनी घेतलेल्या पुढाकाराबद्दल ना. नितीन गडकरी यांनी त्यांचे कौतुक केले. असा पुढाकार मनपातील प्रत्येक पदाधिकारी, नगरसेवक आणि नागरिकांनी घ्यावा, असे आवाहन त्यांनी केले. पुढील पाच वर्षात नागपूर प्रदूषणमुक्त व्हावे, यासाठी प्रत्येकाचा सहभाग आवश्यक असल्याचेही ते म्हणाले. या वेळी परिवहन विभागाचे रविंद्र पागे उपस्थित होते.
आमचे चॅनल subscribe करा
