‘देवा भाऊ’ फक्त तोंडानेच….कृतीचे काय?

लोकसभेच्या निवडणूकीत विरोधकांनी माझ्यावर जो आघात केला आणि काल न्यायदेवतेकडून मला जो न्याय मिळाला त्यासाठी न्यायदेवतेचे आभार मानते,माझ्यावर झालेला अन्याय हा लोकसभेच्या निवडणूकीत फक्त नागपूर जिल्ह्यातच नव्हे तर संपूर्ण महाराष्ट्रात गाजला होता.एका अनुसूचित जातीतील महिलेचा हा विजय नसून काल ‘सत्याचा’ विजय झाला आहे.डॉ.बाबासाहेब आंबेडकरांच्या संविधानाचा विजय झाला.माझ्या विरोधात लोकसभेच्या निवडणूकी पूर्वी जे कट-कारस्थान रचण्यात आले,त्यांच्या सूडबुद्धीच्या आघाताने माझी हिंमत खचवण्याचा जाे प्रयत्न झाला,षडयंत्र रचून माझे जात वैधता प्रमाणपत्र रद्द करण्यात आले ते बघता मला भारतीय जनता पक्षाला हेच विचारायचे आहे की अनुसूचित समाज,ओबीसी समाजाबद्द त्यांना इतकी पराकोटीची चीड का आहे? असा सवाल करीत, भाजपला स्वत:च्या पक्षावर,नेत्यांवर विश्‍वास नव्हता का?त्यांना माझ्या उमेदवारीमुळे का भीती वाटत होती?माझ्या उमेदवारीमुळे त्यांचा पराभव हा निश्‍चित होता,हे त्यांना माहिती होतं,त्यातूनच षडयंत्र रचून माझा उमेदवारी अर्ज रद्द करुन घेतला मात्र,काल न्यायदेवतेने जो निकाल दिला,त्यामुळे पुन्हा एकदा लोकशाही बळकट झाली व लोकांचा विश्‍वास लोकशाहीवर बसल्याचे रश्‍मी बर्वे म्हणाल्या.