त्या रोहिंग्यांना शोधा, केंद्रीय गृहमंत्रालयाचे राज्यांना पत्र

दिल्लीच्या निझामुद्दीनमधील तबलीघी जमातच्या मरकझमधील धार्मिक कार्यक्रमात रोहिंग्याही सहभागी झाले होते. यामुळे त्यांना करोनाचा संसर्ग झाला असण्याची शक्यता आहे, असं गृहमंत्रालयाने म्हटलंय. ज्या राज्यांमध्ये रोहिंग्या राहत आहेत त्या राज्यांचा उल्लेखही पत्रात केला आहे. खासकरून नवी दिल्ली, जम्मू-काश्मीर, पंजाब आणि हरयाणा येथे तपास करावा, असं सांगण्यात आलंय.

तेलंगणच्या हैदराबादमध्येही रोहिंग्यांचा कॅम्प आहे. तिथल्या रोहिंग्या समाजातील काही जणांनी हरयाणातील मेवातमध्ये तबलीघी जमातच्या कार्यक्रमात उपस्थिती लावली होती. पुढे हेच सगळे जण दिल्लीच्या निझामुद्दीनमधील तबलीघी जमात मरकझमधील कार्यक्रमात सहभागी झाले होते. रोहिंग्या समाजाशी संबंधित काही नागरिक दिल्लीच्या श्रम विहार आणि शाहीनबागमध्येही गेले होते.