जुस्तजू जिसकी थी उसको तो ना पाया हमने….

रेखा हिंदी चित्रपटसृष्टित नवी होती त्यावेळी १९७० च्या दशकात तिचे नाव एक्टर किरण कुमारसोबत देखील जोडल्या गेलं.मात्र,या प्रेम संबंधाविषयी कधीही जीवनात या दोघांनी स्पष्ट कबुली दिली नाही.अनेक जुन्या सिनेमासिकांमधून व जुन्या मुलाखतीमधून त्यांच्यात अभिनयाशिवाय काही वेगळं नातं होतं यावर शिक्कामोर्तब होतं.सिद्धार्थ काननच्या एका फार जुन्या मुलाखतीमध्ये किरण रेखाविषयी खूप प्रेमाने बोलला.तो म्हणाला,भले ही ते गेल्या अनेक वर्षात कधीही भेटले नाही तरी देखील तिच्या विषयी त्याच्या मनात खूप सन्मान आहे.रेखा खूप चांगली आहे,तिचं मन सोन्यासारखं आहे तर तिच्या चेह-यावर दिव्यासारखी चमक आहे.मला हेच कळत नाही इतक्या वर्षातही ती इतकी सुंदर कशी दिसते?आम्ही खूप काळ झाला एकमेकांना भेटलो नाही पण तिच्यासाठी माझ्या मनात नेहमीच एक जागा असते.तिचे आणि माझे जीवन वेगळे आहे.मी तिला कधीही कॉल करणार नाही ना म्हणनार मी तुला भेटू इच्छितो..आमच्या भाग्यात लिहले असेल तर आम्ही खूप चांगल्या मित्रांसारखे भेटू आणि बोलू…!

रेखा आणि किरणकुमार सोबतच्या नात्याविषयी रेखाने स्वत: १९७५ मध्ये स्टारडस्ट मॅग्जीनमधील मुलाखतीमध्ये सांगितले की या अभिनेत्याच्या एका सवयीमुळे मला त्याचा खूप राग येत असे.त्याच्या अनेक सवयी मला पटत नव्हत्या.तो वास्तवमध्ये ‘मम्मा बॉय’होता.त्याच्यासोबत उशिरा रात्री कुठे फिरण्याचा प्लान केला जाऊ शकत नव्हता.तो रात्री १० पर्यंत घरी पोहोचून जात असे.त्याचा रात्री घरी १० वाजता घरी पोहोचण्या मागे दूधाचा ग्लास असायचा.रात्री १० वाजता त्याला दूध पिण्याची सवय होती….!

किरण कुमार एक हँडसम व्यक्तिमत्व.घरंदाज व चांगला अभिनेता होता.अनेक हिट चित्रपटात त्याने विलेनची भूमिकाही खूप प्रशंसनीय साकारली आहे मात्र,रेखा सारख्या मुक्त आणि दिलखुलास विचारसरणीच्या तरुणीसाठी तो प्रियकर म्हणूनही फार-फार अयोग्य होता,त्यामुळे त्यांच्यातील हे नातं फार काळ टिकूच शकणार नव्हतं…!

याच काळात स्मिता पाटीलचा मृत्यू झाला व राज बब्बर आपल्या पत्नी व मुलांकडे परत आले.त्यावेळी त्यांना पत्नीकडून खूप ताणे ऐकावे लागत होते.१३ डिसेंबर १९८६ रोजी महान अभिनेत्री स्मिता पाटील राज बब्बरसोबत आपल्या जगरहाटीविरुद्ध सुरु केलेल्या प्रेमाचा संसार वयाच्या ३१ सा व्या वर्षी अर्ध्यावर टाकून जग सोडून निघून गेली होती.बाळंपणानंतर प्रतीक बब्बर हा फक्त १३ दिवसांचा होता,स्मिताच्या प्रेमात राज याने आपली पहिली पत्नी नादिरासोबत धोका केेला होता.पण,स्मिता जग सोडून गेल्याने त्याच्याकडे पहीली पत्नी व मुलांकडे परतण्याशिवाय पर्याय उरला नव्हता.

राज बब्बर हे सगळं आपली जुनी मैत्रीण रेखाला सांगत असत.याच काळात रेखा-राज बब्बरचे काही चित्रपट हिट झाले.त्यांच्या ही नात्याविषयी अनेक फिल्मी पत्रिकामध्ये गॉसिप्स झळकू लागले.रेखाने राज बब्बरसोबत लग्नासाठी विचारले असता,आता मी लग्नाच्या भानगडीत पडू इच्छित नसल्याचे राज याने सांगितले.राज बब्बरच्या घरातून रेखा या बिना चप्पल घालताच रडत-रडत निघून गेली,अश्‍या बात्म्या झळकल्या….!

‘दो अंजाने’ची शुटिंग कलकत्तामध्ये झाली होती.अमिताभ या शहरात आधीच १९६२ ते १९६९ पर्यंत राहून चुकले होते.रेखाला कलकत्ताविषयी काहीच माहती नव्हतं.ग्रॅण्ड हॉटेलमध्ये ते थांबले होते.शुटिंग संपल्यानंतर सगळे खूप वेळ गप्पांमध्ये घालवित होते.अमिताभ कलकत्ताच्या आठवणी त्यांना सांगत होते,याशिवाय तो रेखा व प्रेम चोपडासोबत दर्शनीय स्थळांवर देखील जात होता. १९७६ मध्ये ‘दो अंजाने’प्रदर्शित झाली.हा चित्रपट सुपरहिट झाला नाही पण लोकांच्या पसंदीस उतरला.रेखाच्या अभिनयाची पहील्यांदा दखल घेण्यात आली.तिचे कौतूक झाले,तिने संपूर्ण श्रेय अमिताभला दिले.अमिताभच्या परफेक्शनमुळे रेखा खूप जास्त प्रभावित झाली होती.याचाच दूसरा अर्थ रेखा अमिताभच्या व्यक्तिमत्वाप्रति आकर्षित झाली होती.

या चित्रपटाची आणखी एक मजेशीर बाब म्हणजे,सुरवातीला रेखाने हा चित्रपट कथानक ऐकून नाकारला होता.त्या काळातील कोणतीही टॉपची अभिनेत्री या चित्रपटात काम करण्यास तयार नव्हती कारण चित्रपटाच्या कथानकामध्ये एक पत्नी आपल्या महत्वाकांक्षेसाठी आपल्या पतीलाच मृत्यूच्या दारात ढकलत असते. रेखाने देखील सुरवातीला हा चित्रपट करण्यास नकार दिला होता मात्र,दुलाल गुहाने रेखाला समजावले की,या चित्रपटात रेखाचीच मुख्य भूमिका आहे,येणा-या काळात रेखाला या भूमिकेसाठी लक्षात ठेवले जाईल.खूप समजावल्या नंतर रेखा हा चित्रपट करण्यास तयार झाली.

२ मे १९८० रोजी हेमा आणि धर्मेंद्रचं लग्न झालं.धर्मेंद्र आधीपासून विवाहित होते व चार अपत्यांचे पिता होते.तरी देखील त्यांनी धर्म बदलून आणि जगाची परवाह न करता  हेमासोबत प्रेमविवाह केला.यासाठी धर्मेंद्रने आपल्या पहील्या पत्नीला सोडचिठ्ठीही दिली नव्हती.या लग्नामुळे रेखाला तिचं प्रेम मिळवण्याचा मार्ग गवसला होता.असं म्हटलं जातं की या संदर्भात तिने आपली मित्र स्नेहलता पांडेला सांगितलं की…अब मेरा भी रास्ता निकलेगा…!

मात्र,जया आपल्या लग्नाच्या नात्याविषयी खूप आत्मविश्‍वासी होती.अमिताभ-रेखाच्या नात्याविषयी जया बच्चनने स्पष्ट सांगितलं की,जग जे बोलतं ते बाेलू द्या,अमिताभने मला आमच्या वैवाहिक नात्याविषयी शब्द दिला आहे.जर माझ्या पाठी मागे ते काही चुकीचं करत असतील तर हा त्याचा प्रॉब्लेम आहे,त्याला त्यासोबतच जगावं लागेल….!

मात्र, रेखाला घेऊन घरातील तनाव खूप वाढल्यानंतर अमिताभने एकदा स्पष्ट सांगितलं होतं की ‘हमारे केस मे डिर्व्होस कभी नही होगा,मैं हिन्दूस्तानी हूँ,मेरी फर्स्ट क्लास चॉईज थी जब मैने जया को जीवनसाथी चुना था’हा एकमेव खुलासा आहे जो अमिताभने आपल्या नात्याविषयी दिला होता.यानंतर अमिताभकडून या नात्यावर कधीही बोलल्या गेलं नाही…!

रेखाने सांगितलं की एकदा जयाने मला रात्रीच्या भोजनासाठी घरी बोलावले होते.तिला रेखा-अमिताभच्या नात्याविषयी कोणतीही चिंता नव्हती.जयाच्या नजरेत तिचं नातं फक्त एक मौजमस्तीचं नातं होतं पण,आता तिला जाणीव झाली की आमच्या नात्याने गंभीर वळण घेतलं आहे,जेवणा नंतर रेखा जेव्हा जयाच्या घरातून निघू लागली तेव्हा जयाने रेखाला सांगितलं...‘मै अमित को नही छोडूंगी चाहे कुछ भी हो जाये’यानंतर जयाने अमिताभला रेखासोबत चित्रपट न करण्यास स्पष्टपणे सांगितले.

एका मुलाखतीत रेखाच म्हणाली,‘मला काय हवं आहे याची कोणाला काही काळजी नव्हती,कारण मी तर बाहेरची महिला होती…’.जयाचं नाव न घेता ‘दुसरी व्यक्ति ही कायम सर्वांच्या नजरेत बिचारी असते...!’

मात्र,त्याच वेळी जगभर गाजत असलेल्या या प्रेम त्रिकोणाला घेऊन यश चोप्राने ‘सिलसिला’करण्याचा निर्णय घेतला,यात त्याने वास्तविक जीवनातलेच जया,अमिताभ आणि रेखा हे तीन पात्र चित्रपटात घेतले.‘सिलसिला’चित्रपटाचे दिग्दर्शक यश चोप्रानेही रेखा-अमिताभच्या नात्याचा खुलासा केला होता.या चित्रपटाच्या शुटिंगच्यावेळी ते स्वीझरलॅण्डच्या लोकेशनवर रेखा-अमिताभला रोमांस करण्यासाठी खुले  सोडून देत होते.’तेरी बांहो में है जानम मेरे जिस्माे जां पिघलते…ये कहां आ गये हम यूं ही साथ-साथ चलते’..लताचा हा तरल स्वर जणू रेखाच्याच पारलौकिक प्रेमाची अभिव्यक्ती बनला होता…!दोन प्रेमवेडे जगापासून लांब… एकमेकासोबत भरपूर जगणं जगत होते..ही संधी यश चोप्रामुळे रेखा-अमिताभला मिळाली होती.या चित्रपटाच्या स्वीझरलॅण्ड लोकेशनवरील सगळ्या दृष्यांमधील त्यांच्या प्रेमभावनेत, सिनेप्रेमीही खोलात बुडून गेला होता.डोळ्यात दाटून येणारे एकमेकांविषयीचे प्रेम… सिनेदर्शक हा चित्रपटगृहात बसूनही अनुभवत होता.या अजोड जोडीचं अविट प्रेम याची अनुभूती घेत होता.मात्र,सशक्त कथनकाच्या अभावी हा चित्रपट फ्लॉप झाला.

जया या मधून मधून शुटिंगसाठी येत होत्या कारण तिच्या मागे दोन मुले व सासूची कौटूंबिक जबादारी होती मात्र,त्या दोघांनाही एकमेकांसोबत खुले सोडून दिल्यानंतरही ती निश्‍चित होती….काहीही झालं तरी..अमिताभ फक्त माझा आहे…!तो खूप संस्कारी आई-वडीलांचा मुलगा आहे,एक चांगला आणि विचारी पती व जगात सर्वात जास्त प्रेम आपल्या मुलांवरच करणारा दोन मुलांचा पिता आहे,हा आत्मविश्‍वास जयाला रेखावर त्रागा करण्यापासून रोखत राहीला.

दूर्देवाने १९८२ मध्ये ’कुली’चित्रपटाच्या शुटींगच्या वेळी अमिताभ बच्चनला पुनित इस्सरचा मुक्का इतक्या जोरात पोटात लागला की ते जखमी झाले.ही दुर्घटना इतकी मोठी होती की अमिताभ एका महिन्यापर्यंत कोमातच होते.रेखा अमिताभला बघायला रुग्णालयात पोहोचली मात्र,जया बच्चनने रेखाला अमिताभला बघू दिले नाही.रेखासाठी हा काळ खूप वेदनादायी होता.प्रेम….कायम वेदनांच्या सहनशीलतेची परिक्षा घेत असतो…!

१९८४ साली रेखाने फिल्म फेअरला मुलाखत देताना सांगितले की,‘मुझे मौत मंजूर थी लेकीन बेबसी का वो लम्हा मंजूर नही था!’

अभिनेत्री सिमी गरेवालच्या गाजलेल्या शो मध्ये वेळोवेळी रेखा,अमिताभ व जया देखील आले होते.याच शो च्या आठवणी रेडिफला सांगताना अमिताभने १९९८ साली ती मुलाखत दिली होती,त्याचा उल्लेख केला.तो काळ बच्चनचे चित्रपट चालण्याचा नव्हता शिवाय त्याची एबीसीएल कंपनी दिवाळखोरीत निघाली होती.अमिताभ नव्याने सिनेजगतमध्ये संघर्ष करत होता.त्यावेळी बिग बी चा आत्मविश्‍वास डगमगला होता,असं सिमी म्हणाली होती.

आम्ही खूप गोष्टींबद्दल बोललो,त्याचं बालपण,आई-वडील,एबीसीएल कंपनी,त्याचे फ्लॉप चित्रपट,त्याचे पुनरागमन,त्याचं कुटूंब,मुले,त्याला आवडणा-या नायिका,त्याचे व्यवसायिक निर्णय,त्याने अतिशय प्रामाणिकपणे सगळ्यांची उत्तरं दिली मात्र,बरेच लोकांनी त्या मुलाखतीनंतर म्हटलं की,अमिताभ रेखा विषयीच्या नात्याबद्दल खरं नाही बोलला…!सिमी म्हणाली मला विश्‍वास आहे त्या मुलाखतीत तो जे बोलला ते खंर होतं पण लोकं त्याच गोष्टींवर विश्‍वास ठेवतात ज्यावर त्यांना ठेवायचा आहे…!

अमिताभ रेखा विषयी या मुलाखतीत म्हणाला की,ती माझी सहकलाकार आणि सहकारी आहे आणि जेव्हा आम्ही एकत्र काम करत होतो,तेव्हा साहजिकच आम्ही एकमेकांना भेटलो होतो.आमच्यात काहीच साम्य नाही.काहीवेळा आपण एखाद्या कार्यक्रमात,म्हणजे एखाद्या पुरस्कार सोहळ्यात वगैरे भेटतो तेवढंच…..!अमिताभच्या या अतिशय दुटप्पी,स्वार्थी  व भेकड स्वभावावर त्यावेळी सडकून टिका झाली होती.

अमेरिकेमधून लांब दौरा करुन भारतात आल्यानंतर बीबीसी हिंदीला दिलेल्या मुलाखतीत रेखाने एंकरच्या फरमाईशवर मेंदी हसनची सुंदर गजल गुणगुणली..‘मुझे तूम नजर से गिरा तो रहे हो..मुझे तूम कभी भी भूला ना सकोगे…ना जाने मुझे क्यो यकीं हो चला है,मेरे प्यार को मिटा ना सकोगे….मुझे तू नजर से’यातून तिच्या मनात काय आहे,हे जगालाही कळलं…!

सुपर स्टार रेखा,लेडी अमिताभ रेखा...हिने या मुलाखतीत सांगितले की मी स्वत:ला सुपरस्टार समजत नाही,जग मला सुपरस्टार समजंत,मी फक्त एक अभिनेत्री आहे.वयाच्या अनेक वर्षांपर्यंत मी अभिनय केलाच नाही फक्त चित्रपटांमध्ये काम केलं.मला कधीही चित्रपटात यायचं नव्हतं,पण आईमुळे जबरदस्तीने या क्षेत्रात आले.अनेक चित्रपटांनंतर  मला कळलं की स्टार होणे पुरेसे नाही कलाकार होणे गरजे आहे,मग अभिनयासाठी मी गंभीर झाले.अर्थातच अभिनयाप्रति आणि जीवनाप्रतिचे हे गांर्भीर्य  रेखामध्ये अमिताभमुळेच येऊ शकले.

मात्र,१९९० मध्ये अचानक रेखाने दिल्लीतील उद्योगपती मुकेश अगरवालसोबत लग्नाचा धक्कादायक निर्णय घेतला.या लग्नातही रेखाला तिला हवं असलेलं प्रेम गवसलंच नाही आणि काही दिवसातंच त्यांच्यात खटके उडू लागले.रेखासोबत लग्न झाल्यानंतर काहीच दिवसात मुकेश अगरवाल डिप्रेशनमध्ये गेल्याचे सांगितलं जातं.लग्नानंतर ७ महिन्यातच मुकेशनी रेखाच्या ओढणीने गळफास घेत आत्महत्या केली…!

मृत्यू पूर्वी मुकेशनी चिठ्ठीत लिहलं की, त्यांच्या मृत्यूसाठी रेखाला जबाबदार धरु नये ’असे सांगत ’मी माझ्या संपत्तीतून रेखाला काहीही देऊ इच्छित नाही,ती हे सर्व स्वत: उभं करु शकते.’मुकेश यांच्या आत्महत्यानंतर मुकेशच्या कुटूंबियांनी रेखावर अनेक गंभीर आरोप केले.

या घटनेमुळे रेखावर तिचे सिनेचाहते ही खूप नाराज झाले.अमिताभवर प्रेम होतं,त्याच्या शिवाय ती जगू शकत नव्हती तर लग्नाचा डाव टाकून एका निष्पाप उद्योगपतीचा जीव तरी तिने कशाला घेतला?असा सरळ सवाल तिला केला जाऊ लागला.चित्रपटसृष्टीही ही रेखाच्या विरोधात गली.या काळात सुनील दत्तसोबतच्या चित्रपटावर प्रेक्षकांनी बंदी घालण्याची देखील मागणी केली जाऊ लागली.मुकेश यांनी आत्महत्या केली त्यावेळी रेखा,सुनील दत्त यांच्या चित्रपटाच्या शुटिंगसाठी परदेशात होती.

मुकेश आणि रेखाची भेट कशी झाली याविषयी रेखाची मैत्रीण बीना रमानी ‘एएनआय’ शी बोलताना सांगतात की,त्यांनीच या दोघांची ओळख करुन दिली होती.बीना ही रेखाची फॅशन डिझायनर देखील आहे.बीना रमानींच्या न्यूयार्कमधील घरी रेखा भेटायला गेली होती.त्यावेळी एखाद्या महत्वाच्या व्यक्तिशी लग्न करण्याची ईच्छा रेखाने व्यक्त केली.त्यानंतर बीना हिने मुकेशसोबत रेखाची ओळख करुन दिली.बीना यांनाही मुकेश बद्दल एका मित्राकडून कळलं व एका पार्टीत ते भेटले. या मित्राने बीनाला सांगिलं की मुकेश रेखाचा खूप चाहता आहे आणि त्याला रेखाचे सगळे संवाद पाठ आहे.त्याला तिच्या आयुष्याविषयीही सगळं माहीती आहे.

मुकेश दिसायला खास नव्हता.तो बुटका आणि सावळा होता,पण तो खुप छान बोलायचा.मुकेशच्या डोळ्यात खूप प्रामाणिकपणा होता.त्याने मला विचारलं तो रेखाला भेटू शकतो का?मी रेखा व मुकेशची फोनवर ओळख करुन दिली.तो कसा दिसतो हे रेखालाही माहीती नव्हतं.ती त्याच्याशी २-३ मिनिटे बोलली.तिने स्वत:चा नंबर देण्यास मला मनाई केली मात्र,त्याचा नंबर रेखाने माझ्याकडून घेतला.यानंतर मुकेश व रेखा फाेनवर बोलायचे.पण रेखाला त्याच्या दिसण्याविषयी शंका होती.

ते दोघेही वेगवेगळया शहरात राहत होते.मुकेश दिल्लीत तर रेखाचं संपूर्ण जग हे मुंबईत वसलं होतं.मुकेश प्रचंड आनंदी होता,त्याला हा विश्‍वास बसत नव्हता रेखा त्याच्यासेबत बोलते…!मग दोघांनी एकमेकांना फोटो पाठवले.त्यानंतर रेखा म्हणाली,‘तो माझ्या शेजारी उभा असलेला तुला बघवतोय का?’कारण तिच्या डोक्यात अमिताभ बच्चन होता…!

मी तिला म्हटलं ’नाही’.पण तो चांगला माणूस आहे.तुला काय निर्णय घ्यायचा आहे तो तू घे,मी तुझ्यावतीने कोणताही निर्णय घेणार नाही’असं बीना रेखाला म्हणाल्या.

रेखा-मुकेश यांची पहीली भेट मुंबईत बीनाचा मित्र याच्या घरी झाली..ते आनंदी वाटत होते कारण दोघेही एकमेकांशी ब-याच काळापासून बोलत होते.त्यांना एकमेकांबद्दल खूप गोष्टी माहिती होत्या.या भेटीतून त्यांच्या नात्याची सुरवात झाली.या पहील्या भेटीनंतर थेट त्यांच्या लग्नाची बातमी समजली!टी.वी.,वर्तमान पत्रात त्यांच्या लग्नाची वार्ता होती.सगळं इतक्या लवकर होईल याची कोणालाही कल्पना नव्हती.लग्नानंतर अवघ्या ७ महिन्यात मुकेशने आत्महत्या केली.त्यांचे लग्न हे ‘फँटसी’होतं,असं बीना म्हणाल्या.ते दोघे वेगवेगळ्या शहरात खूप वेगवेगळं आयुष्य जगत होते.रेखांच आयुष्य मुंबई होतं त्यामुळे ते लग्न काहीसं काल्पनिक होतं.मात्र,भविष्यात सगळं काही चांगलं होईल,याची मला आशा होती पण…. !

यानंतर रेखाने फिल्मफेअरला एक मुलाखत दिली,त्या मुलाखतीचं शीर्षक होतं,‘मी मुकेशला मारलं नाही,’मुकेशच्या मृत्यूनंतर १४ वर्षांनी सिमी गरेवालला दिलेल्या मुलाखतीतही मुकेश बरोबर काही महिन्यांच्या या लग्नाच्या नात्याविषयी रेखानं भाष्य केलं,’माणूस अनेक भावनिक अवस्थांमधून जातो,सुरवातीला धक्का आणि मग ’नाही,हे माझ्यासोबत घडूच शकत नाही’ही भावना,त्यानंतर प्रचंड राग आणि मग स्वत:चीच कीव येणं की ‘मी काय चूक केली?’मला कोणालाही दुखवायंच नव्हतं….’असं रेखा म्हणाली.

थोडक्यात,जिनं स्वत: अगदी लहानपणापासून अपार दु:खं भोगली.आयुष्याच्या अनेक टप्प्यांवर खरं प्रेम शोधलं मात्र,कायम तीची फसगत झाली,जी अपार सौंदर्याची खाण असली तरी मूळात जिचं मन खूप कोमल आणि संवेदनशील आहे,जिने कायम अपमान,धोका,स्वप्नांची उधवस्तता आणि दु:खं पदोपदी भोगलं,असे ह्दय कोणाचाही घात करु शकत नाही,.हे जगाला फार उशिरा उमगलं.

हा काळ…रेखासाठी खुप कठीण होता…प्रेम आणि लग्नं दोन्ही नात्यांमध्ये तिची फसगत झाली होती.अशा वेळी अमिताभनेच तिला जगाच्या लपून साथ दिली,सहारा दिला,असं बोललं जातं.जगात अमिताभ एकमेव असा होता जो रेखाला नखशिखात ओळखत होता,ती..जशी आहे..तशी त्याला माहिती होतं…अमिताभमुळेच रेखा जीवनातील या इतक्या मोठ्या धक्क्यापासून सावरु शकली…यानंतरही भारता बाहेर त्यांच्या गाठीभेटी होत होत्या,असा ही कयास लावल्या जातो.

देशातील अनेक ज्योतिष हे रेखाच्या कुंडलीचा अभ्यास ‘विषकन्या’म्हणून करताना आढळतात तेव्हा त्यांच्या विद्वतेची कीव करावीशी वाटते.विनोद मेहरा यांचा मृत्यू,अमिताभचे कुलीच्या शुटिंगपासून बचावणे हे तिच्यासोबत संबंध तोडल्यानेच शक्य झाल्याचा ज्योतिषांचा दावा,मुकेश अगरवाल यांची आत्महत्या,..या सगळ्या कडी ते जोडत जातात मात्र,आयुष्य हे कुंडलीमधील ग्रह तारकांचा प्रभाव नसून,जिवंत मनाच्या वेदनेत होरपळून निघाणा-या प्रेमाचा अंर्तभाव असतो,हे रेखाच्या जिवनाने दाखवून दिले आहे.

ती हिंदी चित्रपटसृष्टितील एक सर्वश्रेष्ठ आणि महान अभिनेत्री असून १९८१ मध्ये आलेल्या ‘उमराव जान’चित्रपटात आपल्या शानदार अभिनयासाठी तिला सर्वश्रेष्ठ अभिनेत्री म्हणून राष्ट्रीय फिल्म पुरस्काराने सन्मानित करण्यात आले होते.आपल्या उतरत्या काळातही रेखाने अनेक चित्रपटात दमदार चरित्र भूमिकाही साकारल्या जे कायम सिनेरसिकांच्या लक्षात राहील्या.

तर अमिताभचे वय ८४ वर्ष असून त्यांचा ११ ऑक्टोबर १९४२ साली झाला आहे.या ही वयात ‘कौन बनेगा करोडपती’सारख्या लोकप्रिय शो मध्ये अमिताभ आपल्या त्याच शिस्तीत दिसून पडतो.तर रेखा जेव्हा जेव्हा कोण्या पार्टीसाठी किंवा फिल्मी पुरस्कार साेहळ्यांसाठी बाहेर पडते तेव्हा आजही तिच्या गालावरच्या गुलाबी हास्यात आणि डोळ्यांच्या चमचमणा-या तेजात अमिताभच दडलेला असल्याचा भास होतो.

जरी या दोन महान तारकांचे नाते लग्नापर्यंत पाहोचू शकले नाही तरीही सिनेरसिकांच्या मनात या दोघांची जोडी कायमची अजरामर झाली आहे.अमिताभचे नाव येताच रेखा डोळ्यासमाेर आपसूक तरळते व रेखाचे नाव घेताच डोळ्या समोर येतो तो अमिताभ बच्चनच…!