गुरुवारी भंडारा, गोंदिया जिल्ह्याला भेट: जिल्हा व कोविड रुग्णालयांना भेटी
नागपूर, दि. 23 : कोरोना विषाणूमुळे बाधित झालेले रुग्ण तसेच त्यांच्यावर वैद्यकीय उपचारासाठी उपलब्ध सुविधा याबाबत आरोग्य मंत्री राजेश टोपे, गृहमंत्री अनिल देशमुख तसेच वैद्यकीय शिक्षण मंत्री अमित देशमुख विभागातील भंडारा, गोंदिया व नागपूर जिल्ह्यातील शासकीय रुग्णालय तसेच कोविड रुग्णालयांना भेट देवून पाहणी करणार आहेत.
आरोग्य मंत्री राजेश टोपे व गृहमंत्री अनिल देशमुख गुरुवार, दिनांक 24 सप्टेंबर भंडारा व गोंदिया जिल्ह्याच्या दौऱ्यावर असून संबधित जिल्ह्याच्या जिल्हाधिकारी कार्यालयात जिल्ह्यातील उपाययोजनांचा आढावा घेणार आहेत. सकाळी 12.30 वाजता भंडारा व सायंकाळी 5 वाजता गोंदिया जिल्ह्याचा आढावा घेतील.
शुक्रवारी नागपूर जिल्ह्याचा आढावा-
आरोग्य मंत्री राजेश टोपे, गृहमंत्री अनिल देशमुख नागपूर जिल्ह्यातील कोरोनाची सद्य:स्थिती व उपाययोजना यासंदर्भात शुक्रवार, दिनांक 25 सप्टेंबर रोजी सकाळी 10 वाजता विभागीय आयुक्त कार्यालयाच्या सभागृहात आढावा घेणार आहेत. पालकमंत्री डॉ. नितीन राऊत हे व्हिडिओ कॉन्फरन्सिंगमार्फत आढावा बैठकीत सहभागी होणार आहेत. आढावा बैठकीनंतर येथील कोविड रुग्णालयांना भेट देवून पाहणी करणार आहेत. त्यानंतर आरोग्य मंत्री राजेश टोपे अमरावती जिल्ह्यातील कोरोनासंदर्भात उपाययोजनांचा आढावा घेण्यासाठी अमरावतीकडे प्रयाण करणार आहेत.
आमचे चॅनल subscribe करा
