करोना पॉझिटिव्हच्या संपर्कात आलेले डॉक्टर आणि परिचारिकांवर सक्तीच्या विलगीकरणाची वेळ

करोना विषाणूची बाधा झाल्यानंतर अशा रुग्णांना आजारातून बाहेर काढण्यासाठी डॉक्टर आणि परिचारिकांची भूमिका मोलाची असते. अशा वेळी जर या वैद्यकीय मनुष्यबळालाच सक्तीच्या एकांतवासात रहावे लागले, तर उपचार आणि सुश्रूषा कोण करणार, अशी नवी आणीबाणीची स्थिती उद्भवण्याचा धोका निर्माण झाला आहे. त्यासाठी कुठल्याही पातळीवर आरोग्याच्या क्षेत्रात सेवा देणाऱ्यांना प्राधान्याने सुरक्षेची साधने उपलब्ध करून देण्याचे आव्हानही प्रशासनामोर उभे ठाकले आहे.

जरिपटका भागातील जी व्यक्ती खामला परिसरातील करोनाग्रस्ताच्या संपर्कात आली होती त्याच्या माध्यमातून भावाला करोनाची लागण झाली. हा भाऊ गेल्या अनेक महिन्यांपासून पक्षाघातामुळे अंथरुणाला खिळला होता. त्याच्या भावाचा अहवाल करोनाच्या चाचणीत पॉझिटिव्ह आढळल्यानंतर त्यालाही शनिवारी रात्री मेडिकलच्या आपत्कालीन विभागात दाखल करण्यात आले होते. मात्र हा रुग्ण जेव्हा आपत्कालीन विभागात आला तेव्हा त्याने आपल्याला मेंदूघात झाल्याचे डॉक्टरांना सांगितले होते. मात्र तोवर आपत्कालीन विभागातील सात डॉक्टर आणि चार परिचारिका या रुग्णासोबत एक मीटर हून कमी अंतराच्या आत संपर्कात आले होते.

दरम्यान, नंतर त्याचा करोना चाचणी अहवालही पॉझिटिव्ह आल्याने आपत्कालीन विभागातील त्या सात डॉक्टरांसह आणखी संपर्कात आलेले दोन असे ९ डॉक्टर आणि ८ परिचारिकांना विलगीकरण कक्षात दाखल करण्याची प्रक्रिया सुरू झाली आहे. त्यांच्या घशातील द्रवाचे नमुनेही आता तपासले जाणार आहेत. एकीकडे करोनाचा विळखा वाढत असताना संशयित रुग्ण आपल्या प्रकृतीबाबत खरा इतिहास सांगत नसल्याने उपचार करणारे डॉक्टर आणि परिचारिकांना लागण होण्याची जोखीम वाढत आहे.

करोना पॉझिटिव्ह रुग्णाच्या संपर्कात आलेले डॉक्टर आणि परिचारिकांवर सक्तीच्या विलगीकरणाची वेळ ओढवल्याच्या वृत्ताला मेडिकलमधील वैद्यकीय अधिक्षक कार्यालयाकडूनही दुजोरा मिळाला आहे. त्यामुळे वैद्यकीय क्षेत्रात चिंतेचे वातावरण असून मनुष्यबळाची कमतरता होण्याची जोखीम निर्माण झाली आहे.