Advertisements
नागपुर: आरोग्य यंत्रणेलाच ‘व्हेंटिलेटर’वर आणून ठेवणाऱ्या करोना विषाणूचे तांडव नागपुरातही सुरू आहे. त्यामुळे येणारा क्षण कोणते संकट घेऊन येईल, याची धास्ती वाढत असतानाच, बुधवारी निसर्गाने एका महिलेच्या पदरात मातृत्वाचे दान टाकले. अगदी काही तासांपूर्वीच करोनाचं निदान झालेल्या गरोदर महिलेने बुधवारी पहाटे, इंदिरा गांधी शासकीय वैद्यकीय महाविद्यालय व रुग्णालयाच्या प्रसुती विभागात एका गोंडस मुलीला जन्म दिला. एकीकडे करोनाचे रुग्ण सातत्याने वाढत असताना, भीतीच्या सावटाखाली असलेला ‘मेयो‘चा परिसर या चिमुकलीच्या टाहोंनी दणाणून गेला. परिस्थितीने कितीही संकटे समोर उभी केली तरी, जीवनात उमेदीचा अंकुर नव्याने फुलविण्यात निसर्गाची साखळी खंडीत होत नाही, हेच यावरून पुन्हा एकदा सिद्ध झाले.
मोमिनपुरा परिसरातील अन्सार नगरातील रहिवासी असलेल्या या २८ वर्षीय गरोदर महिलेला प्रसुती कळा सुरू झाल्यानं मंगळवारी ‘मेयो’त आणले गेले होते. मात्र ती रहात असलेला परिसर हा हायरिस्क झोनधील असल्याने तिची प्रारंभी नियमानुसार करोना चाचणी करण्यात आली. करोनाचे निदान झाल्यानंतर या महिलेनं मुलीला जन्म दिला. तिची आणि मुलीची प्रकृती ठणठणीत आहे. मात्र करोनाची लागण होण्याची जोखीम पाहता या चिमुकलीला बाळंतपणानंतर अवघ्या काही क्षणांत पहिले स्तनपान देऊन मातेपासून काही अंतरावर दूर ठेवण्यात आले. या चिमुकलीला असलेली जोखीम लक्षात घेता, तूर्तास फक्त स्तनपानासाठी तिला मातेच्याजवळ दिले जाणार आहे.
सामान्य प्रसुतीनंतर जन्माला आलेल्या या मुलीचं वजन दोन किलो असून, ती सध्या धोक्याबाहेर आहे. मात्र, तिच्या घशातील स्त्राव नमुन्यांची वेळोवेळी चाचणी करणे आवश्यक असून तशी काळजी घेतली जात असल्याचे ‘मेयो’तील प्रसुती विभागातील सूत्रांनी सांगितले.
Advertisements
Advertisements
Advertisements
आमचे चॅनल subscribe करा
