औरंगजेब शांततेत कबरीत:समर्थक,विरोधक रस्त्यावर!

नागपूर,ता.१७ मार्च २०२५: लक्ष्मण उत्तेकर दिग्दर्शित ‘छावा’हा मराठा सम्राट छत्रपती संभाजी महाराज यांच्या जीवनावर आधारित एक ऐतिहासिक चित्रपट नुकताच प्रदर्शित झाला,या चित्रपटात मोगल बादशाह औंरंगजेबने छत्रपती संभाजी महाराज यांना फितूरीतून पकडून हाल-हाल करुन ठार मारल्याचे दृष्य हे प्रत्येक मराठा किंबहूना हिंदूंच्या जिव्हारी लागणारे होते मात्र,हा चित्रपट जवळपास चारशे वर्षांपूर्वी मराठा साम्राज्यात घडलेल्या पडद्यावरील भावनांपुरती आता मर्यादित राहीला नसून, देशभरात औरंगजेबविषयी द्वेषाच्या पातळीवर पोहोचला आहे.त्यातच भर पडली तिथीनुसार आज आलेल्या छत्रपती शिवरायांच्या जन्मतिथीची.महाराष्ट्रात सर्वदूर शिवजयंती साजरी होत असताना यावेळी त्याला किनार होती औरंगजेबच्या कबर व प्रतिकृती जाळण्याची.नागपूरात महाल भागातील शिवरायांच्या पुतळ्याजवळ विश्‍व हिंदू परिषद व बजरंग दलातर्फे दरवर्षीप्रमाणे शिवरायांची जयंती उत्साहात साजरी होत असतानाच, औरंगजेबचा पुतळा दुपारी एक वाजताच्या सुमारास जाळण्यात आला व जोरदार नारेबाजी झाली.याच परिसरात दुस-या गटातील समुदायाचे धार्मिकस्थळ व मोठ्या प्रमाणात रहीवासी भाग असल्याने लगेच तनावपूर्ण स्थिती निर्माण झाली.

गणेशपेठ पाेलिस ठाण्यात बजरंग दलाच्या विरोधात एफआयआर नोंदविण्यासाठी दूस-या गटातील सुमारे चारशे जण एकत्रित आले व पोलिस ठाण्यातच बजरंग दलाच्या मुर्दाबादचे नारे लागले,तसेच औरंगजेबची कबर जिथे आहे तिथे ती सर्वकाळ राहील असे धमकावण्याचे अनेक व्हिडीयो सोशल मिडीयावर चांगलेच व्हायरल झाले.

पोलिसांनी दोन्ही गटाशी बोलून सांयकाळपर्यंत परिस्थिती चांगलीच आटोक्यात आणली मात्र,सायंकाळनंतर वातातवारण चिघळले किंबहूना दंगलखोरांनी चिखळवले,श्‍याम टॉकिजजवळच्या परिसरात बघता बघता तूफान दगडफेक झाली,गडकरी यांच्या पुढाकारातून याच भागात निर्माणाधीन उड्डाणपुलाच्या बांधकामासाठी उभ्या असणा-या दोन जेसीबी दंगलखोरांनी पेटवून दिले.इतकंच नव्हे आग विझवण्यासाठी आलेल्या अग्निशमन गाड्यांवर देखील तूफान दगडफेक केली.शिवराज्याभिषेक सोहळा समिती तसेच हिंदूत्ववादी संघटनांतर्फे आज आंदोलनस्थळी दुपारी एक वाजताच्या सुमारास औरंगजेबची जी प्रतिकृती जाळण्यात आली त्याला हिरवी चादर गुंडालेली होती.त्याच चादरीवर कुराणाची आयत लिहलेली होती,असा संदेश किंबहूना अफवाह सोशल मिडीयावर व्हायरल होताच, शेकडोच्या संख्येने दंगलखोर रस्त्यावर उतरले.महत्वाचे म्हणजे दगडफेकीत चाळीसच्यावर पोलिस जखमी झाले,माध्यमकर्मींवर देखील दगडफेक करण्यात आली.

ई-रिक्क्षा,चारचाक्या व दंगलखोरांच्या हातात त्या परिसरात जी वाहने आली त्याच्या काचा फोडण्यात आल्या.त्याहून महत्वाचे म्हणजे दरवर्षी महाल येथील छत्रपती शिवाजी महाराज यांच्या पुतळ्याजवळील जो सोहळा शिवराज्याभिषेक समितीचे संयोजक व सदस्य हिरिरीने साजरा करतात,त्या संयोजकाच्या घरासमोरील जेसीबीच दंगलखोरांनी जाळल्या मात्र,यावेळी घरामध्ये असणारे समितीचे संयोजक बाहेर पडलेच नाही,अशी चर्चा परिसरात रंगली.परिणामी,मुख्यमंत्री व राज्याचे गृहमंत्री या शहराचे असून सत्तास्थानावर असल्याने आपण कोणतेही कृत्य आंदोलनाच्या नावाखाली केल्यास ते दूसरा गट खपवून घेईल असा समज हिंदूत्ववादी संघटनांचा झाला मात्र,घडले अघटित असे येथील जाणकार सांगतात!