अटल यांची कारगिल नीती एलओसीच्या अलीकडेच,मोदी पोहोचले पलीकडे!

नागपूर,ता.७ मे २०२५: मे १९९९ मध्ये कारगिलमध्ये भारत-पाकिस्तान युद्ध झाले होते.त्यावेळी अटल बिहारी बाजपेयी हे देशाचे पंतप्रधान तर जॉर्ज फर्नांडिस हे देशाचे संरक्षण मंत्री होते.अटल बिहारी बाजपेयी यांना हे युद्ध कोणत्याही स्तरावर जाऊन जिंकायचे होते.यामुळे ते स्वत: तीन दिवस कारगिलमध्ये युद्धस्थळी उपस्थित होते.पाकिस्तानी सैन्याने बर्फ पडत असलेल्या थंडीच्या ऋतूचा फायदा घेत एलओसी क्रॉस करुन भारतीय हद्दीतील संरक्षण चौक्यांवर ताबा मिळवला होता.या भागातील बर्फ वितळणे सुरु झाल्याशिवाय भारतातर्फे कारवाई होऊ शकत नव्हती.हे युद्ध मैदानी नव्हते.भारतीय सैन्या समोर असा शत्रू होता ज्याला बघणे तर दूर त्याला शोधणे देखील अशक्यप्राय होते.त्यांचा नायनाट करण्यासाठी किती काळ लागेल हे सांगणे दूरापस्त होते.

कारगिलच्या उंच टोकावरील बर्फ वितळण्यास सुरवात होताच भारतीय सैन्य आक्रमण करणार होते तसेच बर्फ पडण्या पूर्वी या युद्धात विजय मिळवण्यास सज्ज झाली होती.मे १९९९ मध्ये कारगिल युद्धाला सुरवात झाली व २६ जुलै १९९९ रोजी ‘ऑपरेशन विजय’ भारतीय सैन्यासह संपूर्ण देशातर्फे साजरा करण्यात आला.निवृत्त मेजर जनरल सी.प्रकाश यांनी सांगिल्याप्रमाणे ,कारगिल युद्धात पंतप्रधान अटल बिहारी बाजपेयी यांचे धोरण अतिशय आक्रमक होते.पाकिस्तानच्या सैन्याने एलओसी क्रॉस करुन भारतीय हद्दीत घूसखोरी केल्याचे कळताच त्यांनी सैन्याला पाकिस्तानी सैन्याला हूसकावून लावण्याचे आदेश दिले होते.मात्र….कोणत्याही परिस्थितीत भारतीय सैन्य एलओसी क्रॉस करुन पाकिस्तानच्या हद्दीत जाणार नाही,हे देखील त्यांचे आदेश होते!

पंतप्रधान नरेंद्र मोदी यांनी मात्र, एकवेळा नव्हे तर दोन वेळा पाकव्याप्त काश्‍मीरमध्ये घूसून दहशतवाद्यांची तळे उधवस्त करण्याचे आदेश भारतीय सैन्याला दिले.२०१९ मध्ये पुलवामा हल्ल्यात भारतीय सैन्याचे ४० जवान शहीद झाले, त्याचा सूड बालाकोट हवाईहल्ला घडवून घेण्यात आला.यासाठी पाकव्याप्त काश्‍मीरमध्ये घूसून दहशतवाद्यांची तळे उधवस्त करण्यात आली.२२ एप्रिल २०२५ रोजी काश्‍मीरच्या पहलगाम या पर्यटनस्थळी पुन्हा पाकिस्तानी दहशतवाद्यांनी २६ निरपराध पर्यटकांना गोळ्या घालून ठार केले,याचा सूड आज भारतीय सैन्याने ‘ऑपरेशन सिंदूर’राबवून घेतला.यावेळी फक्त पाकव्याप्त काश्‍मीर नव्हे तर पाकिस्तानच्या पंजाब प्रांतात भारतीय हद्दीच्या शंभर किलोमीटर आत घूसून दहशतवाद्यांची ४ तळे भारतीय सैन्याने काल मध्यरात्री अवघ्या २५ मिनिटात उधवस्त केली.यासाठी भारतीय सैन्याला भारतीय हद्द ओलांडण्याची देखील गरज भासली नाही.भारतीय हवाई दलाने एअर स्ट्राईकद्वारे हे ऑपरेशन यशस्वी केले.

‘ऑपरेशन सिंदूर’ अंतर्गत काल पाकिस्तानातील दहशतवाद्यांची एकूण ९ तळे उधवस्त करण्यात आली,यात हजारो निरपराध लोकांचा बळी घेणारा व पाकिस्तानच्या पंजाब प्रांतातीत बहावलपूरात ४७ एकर जागेत दहशतवाद्यांना ट्रेनिंग देणारा मौलाना मसूद अजहर याच्या कॅम्पचा देखील समावेश आहे.या हल्ल्यात मसूद याच्या कुटूंबातील १० व ४ सहकारी मिळून एकूण १४ जणांचा मृत्यू झाला असून,या हल्ल्यात त्याची मोठी बहीण,तिचा पती,एक पुतण्या,पुतण्याची पत्नी,एक पुतणी व त्यांच्या ५ मुलांचा समावेश आहे.याशिवाय त्याचे ४ सहकारी देखील या हल्ल्यात मारले गेले.या घटनेच्या पार्श्वभूमीवर मसूद याने प्रतिक्रिया देत, त्याला या हल्ल्यामुळे कोणतीही निराशा किवा अफसोस नाही, उलट माझ्या मनात हाच विचार आहे मी देखील या १४ मृतकांच्या खुशहाल कारवांमध्ये सहभागी का नाही’असे सांगून,माझ्याही जाण्याची वेळ आली होती मात्र,खुदाने त्यांना वाचवले,अशी प्रतिक्रिया बीबीसी या वृत्त वाहीनीला दिली.मसूद अझहर हा जैश-ए-मोहम्मदचा संस्थापक आणि मोस्ट वाँटेड पाकिस्तानी दहशतवादी आहे.मसूदने पाकिस्तानात राहून भारताविरोधात अनेक दहशतवादी हल्ले घडवून आणले आहे.

सहकुटूंब पहलगाममधील निसर्गाचा आनंद लृटत असताना २२ एप्रिल रोजी दहशतवाद्यांनी पर्यटकांना त्यांचा धर्म विचारुन,कलमा म्हणायला लावून नंतर कुटूंबियांसमोरच २६ पुरुष पर्यटकांच्या डोक्यात,कमरेत,मानेवरआणि पोटात गोळ्या घालून त्यांची निर्घृण हत्या केली.काश्‍मीरमधील या क्रौर्याचा बदला आज भारतीय सैन्याने घेतला.त्याच दिवशी तातडीने घटनास्थळी पोहोचलेले देशाचे गृहमंत्री अमित शहा यांनी‘दहशतवाद ठेचणार‘असा इशारा दिला होता.तर पंतप्रधान नरेंद्र मोदी यांनी ‘दहशतवाद्यांना पाताळातूनही शोधू’अशा इशारा देत, हल्ला करणारे आणि कटकारस्थान करणारे यांना ते कल्पनाही करु शकणार नाही,अशी अद्दल घडवली जाईल,१४० कोटी भारतीयांची इच्छाशक्ती दहशतवाद्यांना पाठीशी घालणा-यांचा कणा मोडून टाकेल,असा इशारा २४ एप्रिल रोजी दिला होता.काश्‍मीरमधील पहलगाम या निसर्गरम्य ठिकाणी दहशतवाद्यांनी केलेली ‘हिंदू ’पर्यटकांची हत्या,या घटनेने प्रत्येक भारतीयाला अस्वस्थ केले होते.पाकिस्तान पुरस्कृत दहशतवाद्यांची मजल एका नवपरिणीत जोडप्याला कायमचे विभक्त करण्यापर्यंत गेली व पहलगामच्या घटनेत अवघ्या सहा दिवसांपूर्वी विवाह बंधनात अडकलेले नौदलाचे लेफ्टनंट विनय नरवाल यांना त्यांची पत्नी हिमांशी नरवाल यांच्या समोरच डोक्यात गोळ्या घालून ठार करण्यापर्यंत गेली.आपल्या पतीच्या पार्थिव देहाकडे स्तब्ध होऊन बघत बसलेल्या हिमांशीचे छायाचित्र संपूर्ण देशालाच जणू दू:खाच्या शोकसागरात बुडवून गेला होता.

पंतप्रधान नरेंद्र मोदी यांनी या ऑपरेशनला ‘ऑपरेशन सिंदूर’हे नाव देऊन,भारतीय स्त्रीच्या कुंकवाची किंमत किती बहूमोल असते,जणू याची जाणीव पाकिस्तानच्या दहशतवाद्यांना करुन दिली,हे नाव देशपातळीवरील या ऑपरेशनला देऊन त्यांच्यातील संवेदनशीलतेवर मोहोर उमटली.हिमांशी हिच्यासह मोने,पुण्याच्या संतोष जगदाळे यांची पत्नी प्रगती जगदाळे,गणबोटे आदी यांच्याही पत्नींच्या कुंकूवाचा आसूड घेतला.पहलगामची धरणी त्यांच्या आयुष्याच्या जोडीदाराच्या रक्ताने लाल करणा-यांची धरणी देखील आज कुंकवाच्या रंगाची लाल झाली.पहलगामच्या हल्ल्यात २८ निरपराधांची हत्या झाली तर काल रात्री १.०५ ते १.३० वाजे दरम्यान अवघ्या पंचवीस मिनिटात पाकिस्तानात ९० दहशतवादी यमसदनी भारतीय सैन्याने धाडले.पाकिस्ताने मात्र या हल्ल्यात २६ नागरिक मारले गेल्याचा दावा केला आहे.