अंभोरा:केबल स्टे पूलावर पर्यटकांची तूफान गर्दी(भाग-२)

या पूलाच्या निर्मितीमुळे भंडारापासून अंभोरापर्यंचा ८० किलोमीटरचा फेरा वाचला असून वेळ आणि पैशांची बचत झाली असल्याचे भंडा-यातून आलेल्या अनेक पर्यटकांनी ‘सत्ताधीश’सोबत बोलताना सांगितले.

या पुढील टप्पा आता अंभो-यातील तीर्थस्थळावरील पुरातन मंदिरांच्या जीर्णोद्वारातून साधण्यात येणार असून सार्वजनिक बांधकाम विभाग व विदर्भ विकास मंडळातर्फे अंभो-याच्या सौंदर्यीकरणावर २०० कोटी रुपये खर्च करण्यात येणार आहे.येत्या दोन वर्षात अंभोराचा कायापलट होणार असून,ज्येष्ठ नागरिकांना मंदिरात चढता यावे यासाठी लिफ्ट,सभागृह,मोठे किचन शेड,भाेजनाची व्यवस्था,व्हीआयपी गेस्ट हाऊस,शौचालयांची निर्मिती,नदीच्या किना-यांचे सौंदर्यीकरण,अस्थी विसर्जनासाठी येणा-यांसाठी सुविधा,आठ एकरमध्ये पार्कींग,१० एकरमध्ये पर्यटकांसाठी उद्यानाची निर्मिती,ओपर एअर थेटर,महादेवाचा भव्य पुतळा,प्रेक्षक गॅलरी इत्यादी अशा सुविधा सार्वजनिक बांधकाम विभाग निर्मित करणार असून यासाठी निविदा प्रक्रिया सुरु असल्याची माहिती बांधकाम विभागाच्या सहायक अभियंता प्रगती माटे देतात.

थोडक्यात,नागपूर जिल्ह्यातील अंभोरा हे ठिकाण येत्या काही काळात विदर्भातील महत्वाच्या तीर्थस्थळासोबतच सुप्रसिद्ध पर्यटन स्थळ म्हणून विकसित होण्याच्या मार्गावर असून, या प्रकल्पातून मोठ्या प्रमाणात रोजगार देखील उपलब्ध होणार असल्याचा दावा केला जात आहे.

……………………………………